Bunge lapata msiba, Rais Kikwete atuma salamu za rambirambi

Anselm Lyatonga Mrema enzi za uhai wake

RAIS wa Jamhuri ya Muungano wa Tanzania, Mheshimiwa Dkt. Jakaya Mrisho Kikwete amemtumia Salamu za Rambirambi Spika wa Bunge la Jamhuri ya Muungano wa Tanzania, Mheshimiwa Anne Semamba Makinda kuomboleza kifo cha Mkurugenzi Msaidizi wa Idara ya Shughuli za Bunge, Bwana Anselm Lyatonga Mrema kilichotokea usiku wa tarehe 10 Novemba, 2013 katika Hospitali ya Mkoa wa Dodoma alikokuwa amepelekwa kwa matibabu ya ugonjwa wa shinikizo la damu.

“Nimepokea kwa mshtuko na masikitiko makubwa taarifa za kifo cha Mtumishi wa Ofisi yako ya Bunge, Mkurugenzi Msaidizi wa Idara ya Shughuli za Bunge, Bwana Anselm Lyatonga Mrema kilichotokea usiku wa tarehe 10 Novemba, 2013 katika Hospitali ya Mkoa wa Dodoma alikokuwa amepelekwa kwa matibabu akisumbuliwa na shinikizo la damu”, amesema kwa masikitiko Rais Kikwete katika Salamu zake za Rambirambi.

“Nilimfahamu Marehemu Anselm Lyatonga Mrema, enzi za uhai wake, kama Mtumishi Mwaminifu, Mwadilifu na Mchapakazi Hodari aliyejituma kikamilifu katika utekelezaji wa majukumu yake, sifa ambazo zilimfanya apande cheo kutoka kuwa Katibu Msaidizi Mwandamizi wa Bunge na kuwa Mkurugenzi Msaidizi wa Idara ya Shughuli za Bunge”, ameongeza kusema Rais Kikwete.

“Kutokana na msiba huo mkubwa, ninakutumia wewe Spika wa Bunge la Jamhuri ya Muungano wa Tanzania, Mheshimiwa Anne Semamba Makinda pamoja na Watumishi wote wa Bunge Salamu zangu za Rambirambi kwa kuondokewa na Mtumishi muhimu ambaye mchango wake katika Utumishi wa Bunge na Taifa kwa ujumla ulikuwa bado unahitajika sana”, amesema Rais Kikwete.

Rais Kikwete amemuomba Spika wa Bunge kumfikishia Salamu zake za Rambirambi na pole nyingi kwa Familia ya Marehemu Anselm Lyatonga Mrema kwa kupotelewa na Kiongozi na mhimili muhimu wa familia. Amewahakikishia Wanafamilia kuwa yuko pamoja nao katika kuomboleza msiba wa Mpendwa wao.

Amewaomba wawe na moyo wa uvumilivu na ujasiri katika kipindi chote cha maombolezo kwa kutambua kuwa yote ni mapenzi yake Mola.  Aidha Rais Kikwete amesema anamuomba Mwenyezi Mungu, Mwingi wa Rehema aipokee na kuilaza Mahala Pema Peponi Roho ya Marehemu Anselm Lyatonga Mrema, Amina.

Imetolewa na:
Kurugenzi ya Mawasiliano ya Rais,
Ikulu

9 wanaswa sakata la kuvamiwa, kujeruhiwa Dk Mvungi

Waziri wa Mambo ya Ndani ya Nchi, Dk. Emmanuel Nchimbi akizungumza na waandishi wa habari kuhusiana na tukio la kuvamiwa na kushambuliwa Dk Sengondo Mvungi, Mjumbe wa Tume ya Katiba. Waziri Nchimbi alisema upepelezi wa tukio hilo umefanikiwa kwa zaidi ya asilimia 80 ambapo tayari watuhumiwa tisa wamekamatwa wakiwa na mapanga na simu moja ya mkononi, watuhumiwa hao walitajwa majina yao katika mkutano huo uliofanyika katika Ukumbi wa Wizara ya Mambo ya Ndani ya Nchi, jijini Dar es Salaam leo. Hata hivyo, Waziri Nchimbi aliwaomba wananchi na waandishi wa habari wawe na subira wakati Jeshi la Polisi likiendelea na uchunguzi kwa ajili ya kuwakamata watuhumiwa wengine. Kushoto ni Naibu Waziri wa wizara hiyo, Pereira Ame Silima. Kulia ni Kamishna wa Polisi Kanda Maalum Dar es Salaam, Suleiman Kova. 

Kamishna wa Polisi Kanda Maalum Dar es Salaam, Suleiman Kova akiwaonyesha waandishi wa habari mapanga waliyoyakamata wakati wa msako mkali wa kuwasaka watuhumiwa waliomvamia na kumshambulia Dk Sengondo Mvungi Mjumbe wa Tume ya Katiba. Katika msakao huo watuhumiwa tisa walikamatwa wakiwa na mapanga na simu moja ya mkononi. Katikati (waliokaa meza kuu) ni Waziri wa Mambo ya Ndani ya Nchi, Dk Emmanuel Nchimbi. Kushoto ni Naibu Waziri wa wizara hiyo, Pereira Ame Silima. Hata hivyo, Waziri Nchimbi aliwaomba wananchi na waandishi wa habari wawe na subira wakati Jeshi la Polisi likiendelea na uchunguzi kwa ajili ya kuwakamata watuhumiwa wengine. Mkutano huo ulifanyika katika Ukumbi wa Mikutano wa Wizara ya Mambo ya Ndani ya Nchi, jijini Dar es Salaam leo. 

Sehemu ya waandishi habari waliohudhuria mkutano wa Waziri wa Mambo ya Ndani ya Nchi, Dk Emmanuel Nchimbi alipokuwa anazungumza na waandishi wa vyombo mbalimbali vya habari vya nchini na nje ya nchi kuhusiana na tukio la kuvamiwa na kushambuliwa Dk Sengondo Mvungi, Mjumbe wa Tume ya Katiba. Waziri Nchimbi alisema upepelezi wa tukio hilo umefanikiwa kwa zaidi ya asilimia 80 ambapo tayari watuhumiwa tisa wamekamatwa wakiwa na mapanga na simu moja ya mkononi, watuhumiwa hao walitajwa majina yao katika mkutano huo uliofanyika katika Ukumbi wa Wizara ya Mambo ya Ndani ya Nchi, jijini Dar es Salaam leo. Hata hivyo, Waziri Nchimbi aliwaomba wananchi na waandishi wa habari wawe na subira wakati Jeshi la Polisi likiendelea na uchunguzi kwa ajili ya kuwakamata watuhumiwa wengine.

 Picha zote na Felix Mwagara, Wizara ya Mambo ya Ndani ya Nchi.

Yanga yamkana Stewart yasisitiza Brandts mwanzo mwisho

Uongozi wa mabingwa watetezi wa Ligi Kuu Tanzania bara timu ya Young Africans umesema hauna mpango wa mazungumzo yoyote na aliyekua kocha mkuu wa timu ya Azam FC muingereza Stewart Hall juu ya kumpa ajira ya kuwa kocha na Ernie Brandts bado anaendelea na kazi yake ya ukocha mkuu.

Taarifa hii ya uongozi wa klabu ya Yanga inafuatia kuzagaa kwa taarifa hizo leo mchana kwenye baadhi ya mitandao mbali mbali ya kijamii kuwa wapo katika maongoezi na kocha huyo ili achukue nafasi ya kocha mholanzi Ernie Brandts.

Msiumizwe vichwa na taarifa hizo kwani wengi wao lengo lao ni kutaka kuivuruga Yanga sasa ili isiweze kufanya vizuri katika mzunguko unaofuata na mashindano ya kimataifa, uzuri tumelijua hilo na sisi tunauambia umma hatuna mazungumzo na kocha huyo na wala hatujawahi fikiria kufanya hivyo.

Tunaomba umma wa wapenzi wa soka nchini, wanachama, washabiki na wapenzi wa Young Africans watamabue kuwa Ernie Brandts bado ni kocha mkuu wa klabu yetu na hatuna mpango wa kufanya mabadiliko na wala hatujawahi kufikiria kufanya hivyo.

Mholanzi Ernie Brandts anatarajiwa kurejea nchini jumapili Novemba 24, 2013 tayari kabisa kwa kuanza mazoezi na vijana wake siku ya jumatatu Novemba 25, 2013 kwa ajili ya maandalizi ya mchezo wa Hisani (Nani Mtani Jembe) dhidi ya Simba SC Disemba 14, 2013.

Mara baada ya mchezo huo kikosi kitaendelea na maandalizi kujiandaa na mzunguko wa pili wa Ligi Kuu pamoja na mashindano ya kimataifa lakini pia timu inategema kushiriki wa mashidano ya Mapinduzi Cup kisiwani Zanzibar mapema mwezi Januari 2014. 

Msimu wake wa kwanza ameiongoza Yanga kutwaa Ubingwa wa Ligi Kuu ya Vodacom na hivi sasa anaongoza msimamo wa Ligi kwa kuwa na pointi 28 na mabao 31 ya kufunga na mabao 11 ya kufungwa.

Kocha Brandts mara baada ya mchezo wa mwisho dhidi ya JKT Oljoro alitoa mapumziko ya wiki mbili kwa wachezaji wake na benchi la ufundi kwa ajili ya kuwa na familia zao na mapumziko na ambapo timu inatarajiwa kuanza tena mazoezi tarehe 25 Novemba kujiandaa na michezo itakayokuwa inawaikabili timu. 

YSC

Nkongo, Chacha kuchezesha Chalenji, 18 watangazwa Tz watoa watatu tu!

BARAZA la Vyama vya Soka Afrika Mashariki na Kati (CECAFA), leo limetangaza majina ya waamuzi 18 watakaochezesha michuano ya mwaka huu ya Kombe la Chalenji itakayofanyika nchini Kenya.

Katibu Mkuu wa CECAFA, Nicholas Musonye amesema leo kuwa, kati ya waamuzi hao, tisa watakuwa wa kati na wengine tisa wasaidizi.

Musonye amesema waamuzi wote hao watalazimika kwenda Nairobi mapema kwa ajili ya kufanyiwa vipimo vya afya zao pamoja na uimara wa mwili.

Michuano hiyo imepangwa kuanza Novemba 27 mwaka huu, ikizishirikisha nchi zote wanachama wa baraza hilo kongwe barani Afrika.

Waamuzi wa kati ni :
1. Anthony Okwayo-Kenya
2. Denis Batte-Uganda
3. Wish Yabarow- Somalia
4. Israel Mujuni- Tanzania
5. Louis Hakizimana- Rwanda
6. Thiery Nkurunziza- Burundi
7. Waziri Sheha- Zanzibar
8. Gebremichael Luleseged- Eritrea
9. Kheirala Murtaz - Sudan
Waamuzi Wasaidizi ni:
1. Gilbert Cheruiyot- Kenya
2. Tonny Kidiya- Kenya
3. Mark Ssonko- Uganda
4. Fedinard Chacha- Tanzania
5. Suleiman Bashir- Somalia
6. Fraser Zakara-South Sudan
7. Simba Honore-Rwanda
8. Hamid Idam- Sudan
9. Kinfe Yimla-Ethiopia

Muumin kuvunja ukimya, kuibukia wapi?

 
MWANAMUZIKI mahiri wa muziki wa dansi nchini, Mwinjuma Muumin 'Kocha wa Dunia', amesema ataweka bayana  mipango yake kimuziki  wiki hii baada ya kuwa kimya kwa muda mrefu tangu alipoachana na bendi ya Victoria Sound 'Wana Gusa Gusa'.
Muumin, alisema tangu alipoachana na bendi hiyo aliyokuwa akiiongoza baada ya kutokea ugomvi baina yake na mwanamuziki mwenzake, Wazir Sonyo, aliamua kupumzika muziki na kutuliza akili yake kwa kutembea mikoani na atarajea wiki hii toka Kahama kuvunja ukimya.
Akizungumza na MICHARAZO kwa njia ya simu toka Kahama, Shinyanga, Muumin alisema atakuja kuweka bayana kitu gani kitafuata baada ya ukimya wake huo kwa sababu amekuwa wakiulizwa sana na mashabiki wake kuhusu shughuli zake za muziki.
"Mashabiki wamekuwa wakihoji ukimya wangu na wengine kudhani labda nipo huku mkoani nikifanya muziki, hapana nimekuja kupumzika tu na nijirudi Dar nitaweka bayana mustakabali mzima kuhusu wapi nitakapoibukia," alisema Muumin.
Mtunzi na muimbaji huyo nyota aliyewahi kutamba na bendi mbalimbali kama The Bantu Group, Africans Revolution 'Wana Tamutamu', Mchinga Sound, Double M Sound na nyingine alisema muziki ni fani yake na hawezi kuachana nayo ila alikuwa mapumzikoni kujipanga.
Kabla ya kutibuana na Victoria Sound, Muumin anayefahamika pia kwa jina la Mzee wa Chelsea alikuwa akimiliki bendi yake iitwayo Bwagamoyo International 'Wana Gusa Unase'.

Wanigeria 25 wanaswa wakiiuza Gongo, Ukahaba

POLISI nchini Uhispania, wamewakamata watu 25 wanaoshukiwa kuhusuka na sakata ya biashara ya ngono.

Washukiwa hao wanadaiwa kujihusisha na biashara ya kuwaleta wanawake kutoka Nigeria kufanya kazi kama makahaba nchini humo.
Wanawake hao waliodanganywa kwa mara ya kwanza kuwa watapata kazi nzuri barani Ulaya, mwanzo walipelekwa Mexico au Brazil wakisafiri kwa kutumia hati bandia za usafiri.
Kisha kutoka hapo, walisafirishwa hadi mjini Paris na kisha kuingizwa kimagendo nchini Uhispania kufanya kazi kama makahaba.
Polisi walisema kuwa wanawake 5 waliokuwa waathiriwa wa sakata hiyo waliachiliwa wakati wa msako.
Polisi walimkuta mmoja wa wanaume hao akimsaidia mwanamke mmoja kuavya kimba , kwa mujibu wa mwandishi wa BBC mjini Madrid,Tom Burridge.
Polisi waliwakamata watu kadhaa katika sehemu mbali mbali nchini Uhispania ikiwemo, mjini Madrid, Toledo, Cantabria na Palma de Mallorca.
Zaidi ya magari 100 yaliyokuwa na bidhaa za kifahari yalikamatwa.
Polisi walisema kuwa genge hilo lilitumia magari hayo kufanyia biashara haramu na kisha kupeleka faida nyumbani, Nigeria
Aidha polisi wanasema genge hilo liliundwa miaka 20 iliyopita katika vyo vikuu vya Nigeria, wanaojulikana kwa kuwatumia watu barua za kuomba pesa.
Watu 8 kati ya 25 waliokamatwa, walikuwa wanaishi nchini Uhispania kinyume na sheria.
BBC

Said Mbelwa, Karama Nyilawila washinda kwa KO

Bondia Said Uwezo (kushoto) akipambana na Sindano Paul  wakati wa mchezo wao uliofanyika jumapili katika ukumbi wa Zulu Paradise, Pugu Kilumba Dar es Salaam uwezo alishinda kwa pointi mpambano huo.

Refarii Saidi Chaku katikati akimnyosha mkono juu bondia Said Uwezo baada ya kumshinda kwa point mpinzani wake

Mabondia Kaminja Ramadhani (kushoto) na Karama Nyilawila wakioneshana umwamba wa kutupiana makonde wakati wa mpambano wao uliofanyika jumapili. Karama alishinda kwa KO ya raundi ya kwanza.

Bondia Twalibu Mchanjo (kushoto) akipambana na Mohamed Kashinde wakati wa mpambano wao uliofanyika jumapili. Mchanjo alishinda kwa KO ya raundi ya tatu katika mpambano huo uliokuwa wa kusisimua

Bondia Shabani Kaoneka (kushoto) akipambana na Saidi Mbelwa wakati wa mpambano wao uliofanyika jana, Mbelwa alishinda kwa KO ya raundi ya kwanza baada ya kumkalisha chini mpinzani wake kwa konde kali na kushindwa kuendelea.

Bondia Shabani Kaoneka akiwa chini hoi huku akihesabiwa na mwamuzi kulia ni mpinzani wake Said Mbelwa akimsubiri kwa hamu, hata hivyo pambano huo ulisha hapo hapo na Mbelwa kufanikiwa kushinda kwa KO ya raundi ya kwanza.