Mourinho, Tottenham waanza vyema Ligi Kuu England

Kocha Jose Mourinho akionesha ishara ya busu kwa mashabiki wa Chelsea waliofurika  Stamford Bridge 

Mfungaji wa bao la kwanza la Chelsea Oscar akishangilia na Torres. 

Oscar akishangilia bao lake

 

Mfungaji wa bao la pili la Chelsea akiwajibika uwanjani.

KOCHA wa Chelsea , Mreno, Jose Mourinho ameanza kwa kishindo  Stamford Bridge  tangu arejea kwa mara ya pili baaada ya kuibuka na ushindi wa mabao 2-0 dhidi ya timu mpya ya ligi kuu soka nchini England,  Hull City.

Ikiwa imepita takribani miaka sita tangu aondoke darajani na kurejea majira haya ya kiangazi, leo hii Mourinho alianza kibarua katika dimba la nyumbani na kushangiliwa na mashabiki lukuki wanaomuunga mkono kwa asilimia mia moja.

Katika mchezo huo, kiungo mkongwe wa Chelsea,  Frank Lampard alikosa mkwaju wa penati  dakika ya sita baada ya kipa wa Hull,  Allan McGregor kuokoa na baada ya hapo kipa huyo aliokoa tena mpira wa kichwa uliozamishwa na  Branislav Ivanovic , lakini teknolojia ya goli iligoma na kuwaambia Chelsea sio goli.

Bao la kwanza la Chelsea lilifungwa na Oscar katika dakika ya 13 akipokea pasi ya mwisho kutoka kwa Kevin de Bruyne, na bao la pili limefungwa na Frank Lampard dakika ya 25 na kufuta makosa ya kukosa penati.

Katika pambano jingine ;a mapema jana, Tottenham wakiwa ugenini waliipata ushindi wa bao 1-0 dhidi ya Crystal Palace.

Bao pekee lililoipa vijana wa Spurs ushindi huo lilifungwa na mchezaji mpya wa timu hiyo Roberto Saldado kwa njia ya penati dakika ya 50.

Wafuasi wa Sheikh Ponda waicharukia serikali ya CCM

WaFUASI wa Kiongozi wa Jumuiya na Taasisi za Kiislamu Tanzania, Sheikh Issa Ponda wamepiga kambi katika Gereza la Segerea, Dar es Salaam wakitaka kumwona bila mafanikio. 

Wakizungumza jana nje ya gereza hilo, wafuasi hao walisema walipofika hapo saa nne asubuhi waliambiwa kwamba tayari ndugu zake wanne walikwisharuhusiwa kuingia kumwona.

“Tumeambiwa kwamba idadi watu hao inatosha na kwamba wengine haturuhusiwi kumwona,” alisema mmoja wa wafuasi hao, Baraka Mohamed na kuongeza: “Tunaendelea kusubiri huruma za askari wa Magereza labda baadaye wanaweza kuturuhusu kumwona,” alisema.

Wafuasi hao ambao walijaza sehemu kubwa ya eneo la mapokezi na nje ya gereza hilo walilalamikia kitendo cha askari hao kutokuwaruhusu kumwona kiongozi wao.

“Nimefika hapa asubuhi na mapema, lakini utaratibu sikuupenda kwa kweli. Nimezuiwa nami nataka kumwona kiongozi wangu na si mimi tu tuko wengi hapa,” alisema mfuasi huyo.

Wafuasi hao hawakukata tamaa kwani licha ya kuzuiwa waliamua kukaa jirani na lango la gereza na wengine kusimama vikundi vikundi wakijadiliana namna ya kupata nafasi ya kumwona. Sheikh Ponda ambaye alikuwa amelazwa katika Taasisi ya Tiba na Mifupa Muhimbili (Moi) alipelekwa katika gereza hilo Alhamisi iliyopita.

Hatua hiyo ilikuja baada ya kusomewa shtaka la uchochezi akiwa kitandani akidaiwa kutenda kosa hilo katika maeneo mbalimbali ya Jamhuri ya Muungano wa Tanzania kati ya Juni 2 hadi Agosti 11 mwaka huu.

Kwa nini walizuiwa?

Ofisa Habari wa Jeshi la Magereza, Deodatus Kizinja alisema jana kuwa kisheria ni watu wawili katika kipindi cha wiki nne wanaoruhusiwa kumwona kila mahabusu.

Hata hivyo, alisema kwa kuzingatia sababu mbalimbali ambazo zimekuwa zikitolewa na wananchi, wamekuwa wakiruhusu idadi zaidi kila inapobidi.

“Kwa watu maarufu kama Ponda, Jeshi la Magereza linakuwa makini kudhibiti umati wa watu wanaotaka kumwona mahabusu kwa sababu hatuwezi kufahamu kama watu wote wana nia njema au la,” alisema Kizinja na kusisitiza kuwa ndugu zake wanne ambao walishaingia kumwona wanatosha.

Msemaji wa Familia ya Ponda, Isihaka Rashid alisema alikwenda katika gereza hilo kumwona kiongozi huyo Jumamosi iliyopita lakini alizungumza naye kwa muda mfupi akaomba akapumzike...  

“Jumamosi iliyopita tulimpelekea dawa, tukazungumza naye kwa muda mfupi akaomba akapumzike kwa sababu bado alikuwa anasikia maumivu,” alisema.

Lipumba ataka afutiwe mashtaka

Mwenyekiti wa CUF, Profesa Ibrahim Lipumba ameitaka Serikali imfutie kesi ya uchochezi Sheikh Ponda kwa madai kuwa ni ya kubambikiziwa.

Pia amelaani kitendo cha polisi kumwondoa Sheikh Ponda hospitali na kumpeleka gerezani huku akiwa bado anaendelea na matibabu ya jeraha alilopata.

Akizungumza na waandishi wa habari Dar es Salaam jana, Profesa Lipumba alisema: “Tunaitaka Serikali ifute makosa yote ya uchochezi aliyopewa Sheikh Ponda... kwani siku zote inafahamika mtu akisema ukweli anaonekana mchochezi.”

Waumini walia na Nchimbi, Shilogile

Wafuasi wa Sheikh huyo wamepanga kuandamana nchi nzima kushinikiza Waziri wa Mambo ya Ndani ya Nchi, Dk Emmanuel Nchimbi na Kamanda wa Polisi wa Mkoa wa Morogoro, Faustine Shilogile waachie ngazi.

Wakizungumza kwenye mkutano wa hadhara uliofanyika jana katika Viwanja vya Mwembe Yanga, Dar es Salaam walisema viongozi hao wameshindwa kuchukua hatua stahili kwa polisi waliohusika kumdhuru Sheikh Ponda.

Sheikh Ponda anadaiwa kupigwa risasi na polisi mjini Morogoro Agosti 10, mwaka huu.

Katika mkutano huo uliohudhuriwa na mamia ya wafuasi wake, viongozi wa Jumuiya na Taasisi za Kiislamu Tanzania walieleza kutokufurahishwa na jinsi Jeshi la Polisi lilivyoshughulikia suala la Sheikh Ponda.

Mwakilishi wa Jumuiya hiyo, Sheikh Kondo Juma alisema Dk Nchimbi na Shilogile wanapaswa kuachia ngazi kutokana na kumbambikia kesi Sheikh Ponda.

Sheikh Juma alisema mbali na kutaka Shilogile ajiuzulu, alitaka kamanda huyo afikishwe mahakamani kutokana na Sheikh Ponda kujeruhiwa.

“Hawa viongozi wawili wanapaswa kuwajibika. Tutaandaa maandamano nchi nzima ili kushinikiza wajiuzulu,” alisema Sheikh Juma kwenye mkutano huo ambao pia ulihudhuriwa na Kamanda wa Polisi Mkoa wa Temeke, Englebert Kiondo.

Sheikh Juma alieleza kuwa ikiwa viongozi hao wataendelea kushikilia nafasi hizo, watakinyima kura CCM mwaka 2015.

CCM waombe radhi

Akizungumza katika mkutano huo, Kiongozi wa Kiislamu kutoka Zanzibar, Sheikh Salum Amour aliitaka Serikali ya CCM kuomba radhi kutokana na suala la Sheikh Ponda kuhusishwa na matukio ya umwagaji wa tindikali.
 

Pia alitishia kuwa isipoomba radhi, watainyima kura CCM kwenye uchaguzi ujao.

Mwananchi

Inasikitisha! Mwalimu amlisha mwanae kinyesi kisa...!

MWALIMU wa Shule ya Msingi Morotonga, wilayani Serengeti, Mkoa wa Mara, Karata Mugunda, anashikiliwa na Jeshi la Polisi wilayani hapa, kwa tuhuma za kumpiga na kumlisha kinyesi mtoto wake wa kumzaa mwenye umri wa miaka 10. 


Mwenyekiti Mtendaji wa Kituo cha Sheria na Haki za Binadamu, Wilaya ya Serengeti, Samwel Mewama, alithibitisha kutokea kwa tukio hilo na kwamba mtoto huyo alilishwa kinyesi alichokuwa amejisaidia ndani ya nyumba yao.

Kwa mujibu wa Mewana, tukio hilo la kusikitisha lilitokea Agosti 14, mwaka huu saa 12 alfajiri.

“Chanzo cha tukio hili la kikatili ni mtoto huyo kujisaidia haja kubwa ndani ya nyumba, baada ya kuogopa kutoka nje usiku wa manane.

“Baada ya kujisaidia, baba yake ambaye ni mwalimu, alikasirika na kuamua kumwadhibu kwa kumchapa fimbo sehemu za makalio na kumsababishia majeraha ya kutisha.

“Pamoja na kumwadhibu kwa fimbo, alimlazimisha ale kinyesi chote alichojisaidia kisha akamlazimisha anywe maji kwa wingi,” alisema Mewana.

Akizungumzia jinsi alivyopata taarifa za tukio hilo, alisema ofisi yake ilipigiwa simu na mwalimu mmoja anayefundisha shule moja na mtuhumiwa.

Baada ya taarifa hiyo, alifuatilia ili kujua ukweli wake ndipo alipomkuta mwanafunzi huyo akiwa amejeruhiwa vibaya makalio yake.

“Kwa kweli nilimkuta ana hali mbaya, kwa hiyo nilichokifanya nilimchukua na kumpeleka Kituo cha Polisi Mugumu nikapewa PF 3 kwa ajili ya matibabu hospitalini,” alisema.

Aliongeza kwamba, baada ya polisi kupata taarifa hiyo na kushuhudia majeraha aliyokuwa nayo mwanafunzi huyo kupitia dawati lao la kijinsia, walikwenda kumkamata mwalimu huyo ili hatua zaidi ziweze kufuata.

Daktari wa Zamu katika Hospitali ya Nyerere DDH, Dk. Ohoka Joseph, alithibitisha kuwapo kwa tukio hilo.

Alisema mtoto huyo alijeruhiwa vibaya kwenye makalio yake na kwamba ameathirika kisaikolojia.

“Huyo mtoto ameathirika kisaikolojia, kwa hiyo, kuna haja akafanyiwe uchunguzi kutokana na athari za kipigo na tukio alilofanyiwa.

Huyu ni miongoni mwa waliotajwa na Dk Mwakyembe kuhusu 'unga'

Waziri wa uchukuzi Prof. Harrison Mwakyembe amemtaja mshukiwa mmoja wa dawa za kulevya aitwaye Nassoro Mangunga, lakini mshukiwa huyu pamoja na picha zake alishaandikwa na gazeti la SANI katika toleo lake la Agosti 7-9, 2013 (toleo la 1042) pamoja na namna alivyosafirisha mzigo pamoja na akina Masogange.

Isome taarifa yao:

Na Mwandishi Wetu
Unaweza kukimbia lakini huwezi kujificha. Msemo huu unaonekana kutimia kwa kijana anayedaiwa kuambatana na watuhumiwa wa dawa za kulevya waliokamatwa Julai 5 mwaka huu nchini Afrika Kusini, Agness Gerald 'Masogange' (25) na Melisa Edward (24), kunaswa na gazeti hili.
Kwa mujibu wa uchunguzi uliofanywa na gazeti hili, wasichana hao, Masogange na Melisa walisafiri ndege moja na kijana anayejulikana kwa jina la Nassoro Mangunga wakitoka Dar es Salaam kwenda Afrika Kusini, wakisafiri na ndege ya Shirika la Ndege la Afrika Kusini (SAA), yenye namba SA 189.
Wakiwa katika ndege hiyo Mangunga, Agness na Melisa walikaa kwenye viti vilivyo jirani kabisa huku Mangunga akiwa katikati yao, kwani Agness alikaa kiti namba 23B, Mangunga alikaa kiti namba 23D na Melisa alikaa kiti namba 23A.
Mangunga ambaye ni rafiki mkubwa wa wanamuziki wa Bongo Flava, Rashidi Abdallah Makwiro 'Chid Benz', Mgaza Pembe 'M2theP' na Albert Keneth Mangweha 'Mangwair', wakati akisafiri na mabinti hao walikuwa na jumla ya mabegi tisa kama kumbukumbu za nyaraka za shirika hilo la ndege zinavyoainisha.
Licha ya nyaraka za kusafirishia mabegi hayo kuonesha jina la Agness Gerald ambaye ni mpenzi wa Mangunga tangu mwanzoni mwa mwaka jana, kuwa ndiye aliyelipia mabegi hayo, ila kwenye sehemu ya anuani ya waraka pepe, imeandikwa ya Mangunga (inahifadhiwa) ya tovuti ya Gmail.
Aidha, mabegi hayo, yalikuwa na kilo 150 za dawa za kulevya lakini kila mmoja alitakiwa kusafiri na kifurushi cha kilo ishirini kama mzigo wa mkononi ambao husafiri bila malipo, hivyo watatu hao kwa pamoja walikuwa na kilo sitini wote kwa pamoja, hivyi kubaki kilo 90 ambazo walizozilipia Dola za Marekani 94 badala ya Dola 450.
Mangunga ambaye licha ya kuishi zaidi nchini Afrika Kusini, lakini pia ni mkazi wa maeneo ya Ilala jijini Dar es Salaam.
Agness na Melisa, walikamatwa Julai 5, 2013 katika Uwanja wa Ndege wa Oliver Thambo, Afrika Kusini wakiwa na dawa za kulevya zenye uzito wa kilo 150 aina ya Crystal Methamphetamine zenye thamani ya Sh bilioni 6.8 za Kitanzania, na walipotiwa mbaroni, walikuwa na mabegi sita tu kati ya tisa waliyokuwa nayo wakati wanapanda ndege jijini Dar es Salaam.
Inasemekana mabegi hayo matatu yaliondoka na Mangunga na kutokomea kusikojulikana, jambo linalolifanya Sani kuzamia zaidi ili kuweka mezani timu nzima inayohusika na mzigo huo.

Sani

Ukatili! Wanawake wawili wauwawa na kuchomwa moto, kisa...!

 WANAWAKE wawili ambao ni mtu na Mama yake wameuawa kikatili baada ya kukatwa mapanga na baadhi ya viungo vyao kuchomwa moto katika tukio linalohusishwa na imani za kishirikina lililotokea mkoani Shinyanga.

Wanawake hao vikongwe mtu na mtoto wake ni Jadi Temi (90) na mwanae Samara Mathias (70) wakazi wa kijiji cha Ikonda wilayani Shinyanga.

Wawili hao walishambuliwa na kuuawa juzi na watu wasiojulikana wakiwa wamekaa nje ya nyumba yao wakiota moto na kufurahi chakula cha usiku.

Kamanda wa Polisi Mkoa wa Shinha Kihenya Kihenya, alisema vikongwe walishambuliwa na mapanga sehemu mbalimbali za miili yao na kufa papo hapo huku baadhi ya viungo vya Samara vikitupwa kwenye moto uliokuwa jirani.

Kihenya alisema tukio hilo lilitokea Ijumaa saa 2:00 usiku katika kijiji cha Ikonda wilayani Shinyanga, wakati wawili hao wanaoishi peke yao wakila chakula na kuota moto.

Kihenya alifafanua kuwa mara baada ya kushambulia na kuua wauaji hao wakikata kichwa cha Samara, kiganja cha mkono wa kushoto na mguu wa kulia na kuvitupa kwenye moto uliokuwa jirani .

Alisema wauaji hawakuiba chochote na kuna wasiwasi kuwa mauaji hayo yamefanywa kutokana na ushirikina .

Yanga, Azam zavuna Sh. Mil 208 Ngao ya Jamii

Na Boniface Wambura

Mechi hiyo ya Ngao ya Jamii (Community Shield) kuashiria ufunguzi wa msimu mpya wa 2013/2014 iliyochezwa jana (Agosti 17 mwaka huu) Uwanja wa Taifa, Dar es Salaam imeingiza sh. 208,107,000. Washabiki 26,084 walikata tiketi kushuhudia mechi hiyo ambayo ilimalizika kwa Yanga kushinda Azam bao 1-0.

Mgawanyo wa mapato ya mechi hiyo uliokuwa kama ifuatavyo; asilimia 18 ya Kodi ya Ongezeko la Thamani (VAT) sh. 31,745,135.59, asilimia 10 ya mchango wa kusaidia jamii sh. 20,810,700, gharama ya tiketi sh. 7,309,866.

Uwanja sh. 22,236,194.76, gharama za mchezo sh. 13,341,716.86, Chama cha Mpira wa Miguu Mkoa wa Dar es Salaam (DRFA) sh. 5,188,445.44, TFF sh. 13,341,716.86 na Mfuko wa Maendeleo ya Mpira wa Miguu (FDF) sh. 6,670,858.43. Kila klabu imepata mgawo wa sh. 43,731,183.03.

25 wajitokeza kuchukua fomu uchaguzi wa TFF

Na Boniface Wambura 

WANAMICHEZO 25 wamechukua fomu kuwania nafasi mbalimbali za uongozi katika uchaguzi wa Shirikisho la Mpira wa Miguu Tanzania (TFF) unaotarajiwa kufanyika Oktoba 27 mwaka huu.

Fomu hizo zilianza kutolewa juzi (Agosti 16 mwaka huu) ambapo wawili wamechukua nafasi ya Rais na wengine wawili Makamu wa Rais wakati waliobaki wanaomba ujumbe wa Kamati ya Utendaji wakiwakilisha kanda mbalimbali.

Waliochukua fomu za kuomba kuteuliwa kuwa wagombea urais ni Jamal Malinzi na Omari Musa Nkwarulo wakati umakamu wa rais hadi sasa umewavutia Wallace Karia na Ramadhan Nassib.

Waliochukua fomu za ujumbe ni Athuman Kambi, Charles Komba, Davis Mosha, Elias Mwanjala, Eliud Mvella, Epaphra Swai, Farid Nahdi, Hussein Mwamba, Jumbe Magati, Kamwanga Tambwe na Khalid Mohamed.

Wengine ni Muhsin Balhabou, Omari Abdulkadir, Omari Walii, Samwel Nyalla, Shaffih Dauda, Stanley Lugenge, Twahir Njoki, Vedastus Lufano, Venance Mwamoto na Wilfred Kidao.

Kwa upande wa Bodi ya Ligi Kuu aliyechukua fomu mpaka sasa ni Hamad Yahya anayeomba kuteuliwa kugombea nafasi ya uenyekiti.

Fomu za maombi pia zinapatikana kupitia tovuti ya TFF ambayo ni www.tff.or.tz Mwisho wa kuchukua na kurudisha fomu ni saa 10 kamili jioni ya Agosti 20 mwaka huu.

Fomu zikiambatanishwa na risiti ya malipo (receipt) au malipo ya benki (deposit slip) kupitia akaunti ya TFF namba 01J1019956700 iliyoko CRDB tawi la Holland House zirejeshwe kwa Katibu Mkuu wa TFF kwa mkono au kwa barua pepe (email) ambayo ni tanfootball@tff.or.tz .

Bondia Idd Mnyeke amtwanga Mwalimu Aloni

Monday, August 19, 2013

Mabondia Mwalimu Alon kushoto na Iddy Mnyeke wakioneshana uwezo wa kutupiana makonde wakati wa mpambano wao wa kirafiki uliofanyika manzese mwishoni mwa wiki iliyopita.

Bondia Iddy Mnyeke kushoto akimshambulia Mwalimu Alon wakati wa mpambano wao uliofanyika Manzese Dar es salaam mwishoni mwa wiki iliyopita Mnyeke alishinda kwa pointi

Bondia Lucas Mkenya kushoto akipambana na Adamu Yahaya wakati wa mpambanbo wao wa upingwa wa Taifa uliofanyika mwishoni mwa wiki iliyopita 

Lucas Mkenya akivalishwa mkana baada ya kumdunda mwenzi

Bondia Sadick Momba kushoto akipambana na Amos Mwamakula wakati wa mpambano wao wa kugombania ubingwa wa taifa momba alishinda K,O raundi ya kumi.

Bondia Sadick Momba kulia akipambana na Amos Mwamakula wakati wa mpambano wao wa kugombania ubingwa wa taifa momba alishinda K,O raundi ya kumi.

Mpango wa Damu Salama wavuka lengo

Ofisa Masoko na Uhusiano wa Mpango wa Taifa wa Damu Salama, Bw. Rajab Mwenda akizungumza na waandishi wa habari jana kutoa takwimu za makusanyo ya damu kwa mwezi Aprili mpaka Juni mwaka huu ambapo ulivuka malengo kwa asilimia 111 kutoka chupa 36,278 mpaka 38,948. Kulia ni Ofisa Msaidizi wa Masoko na Uhusiano Bi. Rayah Hamad  (Picha na Mpiga picha maalum).

                                  

                                                      PRESS RELEASE                           

MPANGO wa Taifa wa Damu Salama umevuka lengo la makusanyo ya damu katika kipindi cha mwezi Aprili hadi Juni mwaka huu kwa kukusanya chupa za damu 38,948 ambazo ni asilimia 111 ikilinganishwa na chupa 36,278 zilizokusanywa kutoka Januari hadi Machi mwaka huu.

Ofisa Masoko na Uhusiano wa Mpango wa Damu Salama, Bw. Rajab Mwenda akizungumza jana Dar es Salaam alisema kanda inayongoza kwa uchangiaji ni Mashariki na Kanda ya Ziwa.

Alisema mafanikio hayo yametokana na uanzishajiwa mpango wa damu salama wa  kampeni ya kuhamasisha uchangiaji damu kwa hiari  katika jamii na kushirikisha wadau.

 Bw. Mwenda alisema maadhimisho ya siku ya wachangia Damu duniani ambapo lengo la kukusanya chupa za Damu 8,500 kutoka kanda sita za mpango wa Taifa wa damu salama liliwekwa na mpango ulifanikiwa kukusanya jumla ya chupa 8,683

Alisema Mpango wa Damu salama kushirikiana na wadau mbalimbali kama asasi za kiraia  nayo imeongeza makusanyo ya damu toka vituo vidogo vya kuchangia damu Mnazi Mmoja jijini Dar es Salaam,  Morogoro na Dodoma kutoka chupa za damu 2,560 mpaka chupa 3,151 kufikia Aprili hadi Juni mwaka huu.

 Aliwaomba wadau kuendelea kuelimisha na kuhamasisha jamii kuhusu umuhimu wa kuchangia damu kwa hiari kwa kutumia vyombo vya habari, mitandao ya jamii na vipeperushi.

Bw. Mwenda alisema ushirikiano ni mdogo kati ya wahamasishaji wa Mpango  wa damu salama na viongozi wa Taasisi mbalimbali, matumizi mabaya ya damu kidogo inayopatikana katika hospitali zetu na miundo mbinu hafifu hususan barabara mbovu wakati wa ukusanyaji  na usambazaji wa damu.

Alisema changamoto nyingine ni uuzwaji wa chupa za damu kunakofanywa na baadhi ya watumishi wa hospital ambao si waaminifu hivyo kukatisha tamaa wachangia damu kwa hiari.

Bw. Mwenda alisema Serikali kupitia Wizara ya Afya na Ustawi wa Jamii ilianzisha Mpango wa Taifa wa Damu Salama mwaka 2005 ili kuhakikisha uwepo wa damu salama na ya kutosha kwa wote wanaohitaji.

Alisema shughuli za mpango ni pamoja na uhamasishaji jamii kuhusu uchangiaji damu wa hiari, ukusanyaji upimaji na usambazaji wa damu salama mahospitalini.

“Mpango wa Taifa wa Damu salama unafanya kazi kwa kushirikianana kitengo cha kuzuia magonjwa (CDC)  na wadau wengine wa Chama cha Msalaba Mwekundu na Jeshi la Ulinzi la Wananchi wa Tanzania (JWTZ)” alisema Bw. Mwenda.

Alisema Mpango wa Taifa wa Damu salama uliweka lengo la kupunguza maambukizi ya virusi vya ukimwi (VVU) katika damu iliyokusanywa asilimia 1.1 kwa kipindi Aprili- Juni ikilinganishwa na asilimia 1.2 kipindi cha Januari hadi Machi baada ya kujikita katika suala la uhamasishaji na kutoa damu toka kwa jamii ambayo ni salama, kuboresha dodoso la wachangiam damu na kuendelea kuelimisha jamii kuhusu umuhimu wa kuchangia damu na wachangiaji kujiepusha na tabia hatarishi ili wawe wachangiaji wa kujirudia.