Tume kurekebisha Sheria inayohusu wazee, ili kutoa usawa

Wazee kama hawa wanahitaji kusaidiwa

Na Suleiman Msuya

KATIKA kuhakikisha kuwa usawa unakuwepo katika jamii yote kwa pamoja Tume ya Kurekebisha Sheria Tanzania ipo kwenye mapitio ya mfumo wa sheria ya huduma ya jamii kwa wazee (elderly social care).

Hayo yalisemwa na Afisa Habari wa tume hiyo Munir Shemweta wakati akizungumza na mwandishi wa habari hii leo jijini Dar es Salaam.

Alisema mapitio hayo yana lengo la kubaini mapungufu yaliyoko kwenye mfumo huo na kutoa mapendekezo stahiki ili kuweza kuwa na mfumo mzuri wa sheria  utakaolenga ustawi na hifadhi kwa wazee wote wenye miaka zaidi ya 60 wa mjini na vijini.

Shemweta alisema utafiti unaonyesha kuwa wazee wakishafikisha miaka 60 na kuendelea uwezo wao wa kufanya kazi unakuwa mdogo hali ambayo inawafanya wakose mahitaji muhimu kama chakula, mavazi,malazi pamoja na kupungua nguvu kazi kwa Taifa.

“Tume ipo katika mchakato wa kufanyia mapitio ya mfumo wa sheria ya huduma ya jamii kwa wazee kwani kuna dalili za kufanya wazee wawe katika maisha magumu,” alisema.

Afisa Habari huyo alisema pamoja na kuwa na sera ya Taifa ya Wazee (National Ageing Policy 2003) Tanzania haina sheria maalumu katika eneo hilo, hali ambayo inachangia mgawanyiko baina ya kundi hilo.

Alisema sheria mbalimbali za mafao zinawagusa wazee wanaostaafu kazi Serikalini na sekta binafsi ambao ni sehemu ndogo ya kundi la wazee wengi wanaokosa huduma muhimu za maisha.

“Ikumbukwe kuwa wazee hawa ni wale waliotumikia Taifa kwa nguvu na moyo wote kwenye ngazi mbalimbali wakati wakiwa na nguvu zao hivyo wanapokuwa wamezeeka ni muhimu wakawekewa mfumo bora wa kisheria ili kuhakikisha wanaishi maisha mazuri bila kujali kupungua kwa uwezo wao wa kujishughulisha katika kazi,” alisema.

Shemweta alisema Tume inaendelea na rasimu ya awali ya kuangalia hali halisi ya Tanzania kuhusiana na suala zima la wazee ikiwemo mikataba ya kimataifa, mifumo ya kisheria na jamii pamoja na sera.

Alisema matarajio ya Tume ya Kurekebisha Sheria Tanzania  ni kuwa baada ya kukamilika kwa mapito ya mfumo huo wa kisheria kuhusiana na huduma za jamii kwa wazee, Tume itakuja na mapendekezo ya kisheria na yasiyo ya kisheria ambayo yataleta tija kwa Taifa kwa ujumla.

Mauaji Misri, vikosi vya serikali waendelea kuwauwa wafuasi wa Mohammed Morsi

Waandamanaji wakimuokoa majeruhi.

WAFUASI wa rais wa Misri aliyeondolewa madarakani na jeshi,Mohamed Morsi wamesema zaidi ya watu laki moja na ishirini wameuwawa katika mapambano na vikosi vya ulinzi na usalama mjini Cairo.

Polisi waliingia katika mkusanyiko wa usiku wa wafuasi wa Morsi saa chache baada ya waziri wa mambo ya ndani kusema wafausi wa Morsi na chama chao cha Musl im Brotherhood waliokusanyika kwenye viunga vya msikitini wa Rabba Al Adawiya lazima waondoke.
Muslim Brotherhood wamelilaumu jeshi kwa kuwapiga risasi na kuwauwa wafuasi wao.
Daktari katika hospitali ya muda amesema watu wawili walifikishwa wakiwa kichwa na viwili wili vyao vimetenganishwa huku wengine wakiwa na matundu ya risasi vichwani na kifuani.
Hospitali hiyo imekuwa katika hali ngumu ya kumudu miili ya marehemu na majeruhi wanaofikishwa hospitalini hapo. Mwandishi wa BBC anasema ni mapigano mabaya zaidi tangu jeshi limuondoe rais Morsi madarakani.
Wakati huo huo, Uingereza imekemea matumizi ya nguvu yanayopoteza maisha ya watu nchini Misri. Waziri wa masuala ya kigeni William Hague amewataka wenye mamlaka kumaliza mapigano na vurugu hizo.
Amesema wale waliohusika na mauaji hayo ni lazima wawajibike na haki ya wanaoandamana kwa amani ni wajibu ilindwe. Bwana Hague pia amelitaka jeshi kuwachilia huru viongozi wa Muslim Brotherhood waliowekwa kizuizini akiwemo rais Mohamed Morsi. 

BBC

Rais JK amjulia hali bosi wa HSC aliyemwagiwa tindikali

MFANYABISHARA maarufu Said Mohammed Saad anayemiliki maduka ya Home shopping centre na jengo jipya la Msasani City Mall ambalo ndani yake kuna maduka ya nguo na viatu. yote yakiwa  yanamilikiwa na yeye tu. bado yupo Afrika kusini akiendelea na matibabu baada ya kumwagiwa tindikali.

Said alimwagiwa tindikali na mtu ambae hakufahamika ambapo muda mfupi baadae alikimbizwa hospitali Afrika Kusini kwa ajili ya matibabu ambapo Rais Jakaya Kikwete mtu wa watu ni miongoni mwa waliokwenda kumjulia hali kama unavyomuona kwenye picha.

 

Kelly Rowland wa Destiny's Child anusurika kufa maji

MWANAMUZIKI wa zamani 'membaz' wa kundi la Destiny’s Child, Kelly Rowland amenusurika kufa maji baada ya kuokolewa  kuzama katika pwani ya Massachusetts Ijumaa iliyopita baada ya boti waliyokodi kusukumwa mbali nje ya bahari.

Mkali huyo wa nyimbo za ‘Survivor’ na 'Dirty Laundry' alikuwa katika safari ya kitalii akiwa na jamaa zake wanne wakati boti yao ilipopoteza mwelekeo kutokana na upepo mkali na nahodha kulazimika kuwapigia simu walinzi wa pwani katika hifadhi ya taifa ya baharini ya Stellwagen kuomba msaada.

Maofisa hao wa usalama baadae jioni walimsindikiza Rowland na wenzake hadi kwenye mji wa Provincetown, na kwa mujibu wa gazeti la Wicked Local, mwimbaji huyo na rafiki zake walikuwa salama.

Kwa mujibu wa mtandao wa jarida la UsMagazine, Rowland aliweka nyuma matatizo hayo siku iliyofuata na kuingia madukani kufanya manunuzi kwa ajili ya zawadi.

Mkimbiaji Mkenya aangukia na kuzimia akimaliza mbio

Daktari wa kwanza kabisa kumkimbilia Irine Cheptai akihaha kuuzindua moyo wake baada ya kuzimia, alipokuwa akimaliza mbio za mita 3,000 kwenye Uwanja wa Olimpiki jijini London jana.

Jopo la Madaktari wakihangaika kumpatia huduma ya kwanza Irine Cheptai, alianguka na kuzimia wakati akimaliza mbio za mita 3,000 kwenye Uwanja wa Olimpiki.

Cheptai akiwa ametungikiwa mtungi wa hewa ya oksijeni, baada ya kuanguka na kuzimia kutokana na shambulio la moyo. Hata hivyo alikuja kurejewa na fahamu zake akiwa hospitali.

Cheptai (wa pili kulia) akikimbia mbio za mita 3,000 kwenye Uwanja wa Olimpiki jijini London.

LONDON

MKIMBIAJI wa mbio ndefu wa kimataifa wa Kenya, Irine Chebet Cheptai jana alikimbizwa hospitali kwa matibabu baada ya kupatwa na mshituko wa moyo kwenye Uwanja wa Olimpiki baada ya kumaliza mbio za mita 3,000.

Cheptai, binti wa miaka 21, alimaliza mbio akiwa nafasi ya 11, katika muda bora zaidi katika rekodi yake binafsi, alipotumia dakika 8:56.20, lakini akaanguka ghafla na kupoteza fahamu baada tu ya kuvuka mstari wa kumalizia.

Madaktari waliokuwa uwanjani hapo wakaharakisha kumtundikia mtungi wa Oksijeni, ambapo kwa mujibu wa taarifa kuhusiana na tukio hilo zilipasha kuwa alikuja kurejewa na fahamu akiwa hospitalini.

Tukio lake limeshtua wengi kutokana na kukimbia katika mbio fupi kulinganisha na zile alizozoea za mita 5,000, ambazo ameshiriki Diamond League mara mbili msimu huu, na anakumbukwa kwa rekodi yake ya dakika 14:50.99 jijini Shanghai, Mei mwaka huu.

Daily Mail

Javu achekelea kutua Jangwani

Husseni Javu

MSHAMBULIAJI mpya wa klabu ya Yanga, Hussein Javu amesema amefurahi mno kusajiliwa na mabingwa hao wa kandanda nchini kutokana na kiu yake ya muda mrefu ya kuchezea timu kubwa.
Anasema hakuwa na furaha kutokana na ukimya uliokuwa ukiendelea tangu alipofuatwa na viongozi wa Yanga kumshawishi kutua Jangwani na kitendo cha kumsainisha mkataba wa miaka miwili kimempa furaha.
Javu, alimaliza na Yanga juzi kwa kusaini mkataba huo baada ya kuvunjwa kwa mkataba wake wa mwaka mmoja uliokuwa umesalia ndani ya klabu yake ya zamani, Mtibwa Sugar.
"Nimefurahi baada ya kuona ndoto na maombi yangu yakitimia ya kutua katika moja ya klabu kubwa nchini," alisema.
Javu alisema kwa mchezaji yeyote mwenye kiu ya maendeleo ndoto zake ni kucheza timu kubwa za nchi soka la kulipwa na kwake anaamini kutimiza lengo moja ni sababu ya kufunguka kwa nafasi ya kwenda nje ya nchi kusakata kandanda la kulipwa.
Mshambuliaji huyo aliyeitungua kwa misimu mitatu Yanga katika mechi za Ligi Kuu Tanzania Bara ikiwamo ushindi wa mabao 3-0 iliyopata Mtibwa dhidi ya Yanga katika mechi ya duru la kwanza kwa kufunga mabao mawili, anasema anaamini kiwango chake kitazidi kukua kwa kutua kwake Jangwani ambako tayari ameshaanza mazoezi tangu juzi asubuhi.
"Kwa muda mchache wa kuanza mazoezi nimeona mazingira niliyopo yatasaidia kuinua kiwango changu kutoka mahali kilipo, japo bado nahitaji muda kuzoeana na wachezaji wenzangu wa Yanga, ili kuweza kuitumikia vyema klabu yangu mpya, " alisema.
Kusajili kwa Javu Jangwani kunafanya atimize idadi ya washambuliaji sita ndani ya kikosi hicho wengine wakiwa ni Didier Kavumbagu, Jerson Tegete, Said Bahanuzi, Shaban Kondo (aliyesajiliwa toka Msumbiji) na Realintus Lusajo (kutoka Machava- Moshi).

Maskini Tanzania! Yanyukwa Uganda na kung'oka CHAN

 

Stars iliponyukwa na Uganda The Cranes jijini Dar

Na Boniface Wambura

TIMU ya soka ya Tanzania (Taifa Stars) imeshindwa kufuzu Fainali za Afrika kwa Wachezaji wa Ndani (CHAN) kwa mara ya pili mfululizo baada ya leo (Julai 27 mwaka huu) kufungwa mabao 3-1 na Uganda Cranes, hivyo kutolewa kwa jumla ya mabao 4-1.

Stars ambayo ilicheza fainali za kwanza zilizofanyika Ivory Coast mwaka 2009 ilimaliza kipindi cha kwanza katika mechi hiyo iliyochezwa Uwanja wa Taifa wa Mandela ulioko Namboole nje kidogo ya Kampala ikiwa sare ya bao 1-1.

Wenyeji ndiyo walioanza kufunga bao dakika ya saba katika mechi hiyo iliyochezeshwa na Kanoso Abdoul Ohabee kutoka Madagascar. Frank Kalanda alifunga bao hilo akimalizia mpira uliopigwa ndani ya eneo la hatari la Tanzania.

Bao hilo halikuonekana kuichangaza Taifa Stars, kwani ilitulia na kufanikiwa kusawazisha dakika ya 18 mfungaji akiwa Amri Kiemba kutokana na pasi nzuri ya Mrisho Ngasa kwenye kona ya eneo la mita 18.

Dakika ya 32 nusura Taifa Stars ipate bao, lakini mkwaju maridadi wa Mrisho Ngasa ambao tayari ulikuwa umempira kipa HAmza Muwonge uligonga mwamba kabla ya kuokolewa na mabeki wa Uganda Cranes.

Mabao mengine ya Uganda Cranes yalifungwa dakika ya 48 kupitia kwa Brian Majwega na lingine dakika ya 63 mfungaji akiwa tenda Kalanda kutokana na makosa ya Salum Abubakar kupokonywa mpira wakati akiwa katika nafasi nzuri ya kutoa pasi kwa mwenzake.

Kocha Kim Poulsen alifanya mabadiliko dakika ya 43 kwa kumuingiza Simon Msuva badala ya Frank Domayo aliyeumia, na dakika ya 78 akawaingiza kwa mpigo Haruni Chanongo na Vincent Barnabas badala ya David Luhende na John Bocco. Hata hivyo mabadiliko hayo hayakubadili matokeo ya mchezo.

Kikosi cha Stars kilipangwa hivi; Juma Kaseja, Erasto Nyoni, David Luhende/Vincent Barnabas, Aggrey Morris, Kelvin Yondani, Athuman Idd, Frank Domayo/Simon Msuva, Salum Abubakar, John Bocco/Haruni Chanongo, Amri Kiemba na Mrisho Ngasa.

Stars inayodhaminiwa na Kilimanjaro Premium Lager itarejea nyumbani kesho (Julai 28 mwaka huu) saa 4 usiku kwa ndege ya PrecisionAir.

Kazi ataka wajumbe TFF wakamilishe Kazi aanze Kazi

Osman Kazi akiwa kazini katika pambano la Wabunge wa Simba na Yanga

MWAMUZI wa zamani wa kimataifa, Osman Kazi amewaomba wajumbe wa mkutano mkuu wa uchaguzi wa shirikisho la soka (TFF) kuhakikisha wanachagua viongozi bora ambao wataleta maendeleo ya mchezo huo nchini.
Aidha mwamuzi huyo amesema anajiandaa kurejea tena kwenye kazi yake baada ya kujiondoa kimya kimya tangu alipokumbwa na adhabu ya kifungo cha miezi mitatu kwa tuhuma za rushwa.
Akizungumza na MICHARAZO, Kazi alisema anawaomba wapiga kura wa TFF kutofanya makosa katika uchaguzi mkuu unaotarajiwa kufanyika Septemba.
Kazi alisema kosa lolote litakalofanywa na wajumbe hao wa TFF kunaweza kuirejesha nyuma nchi kama ilivyokuwa miaka iliyopita kabla ya uongozi wa Rais anayemaliza muda wake, Leodger Tenga.
Alisema wapiga kura wahakikishe wanachagua viongozi ambao watakuwa na maono ya mbele ili nchi irejeshe heshima yake katika medani ya kimataifa katika mchezo huo ikiwemo kutoa waamuzi katika michuano ya kimataifa.
"Rai yangu kwa wajumbe wa TFF wahakikishe hawafanyi makosa kwa kuchagua viongozi watakaoturejesha nyuma, wawachague viongozi bora na makini na wenye uchungu wa kweli na mchezo wa soka badala ya kushinikizwa kuchagua watu kwa uwezo wao kifedha," alisema.
Kuhusu hatma yake ya uamuzi, Kazi alisema anajiandaa kurejea tena dimbani ila itategemea na aina ya viongozi watakaoingia madarakani TFF.
Alidai kama watakuwa ni wababaishaji, ni bora aendelee na uratibu wake wa matamasha na kama watakuwa ni wenye weledi atashiriki Copa Test ya Desemba.
"Bado nina miaka sita mbele kabla ya kustaafu rasmi kwa sheria za kimataifa za urefa, hivyo kama viongozi watanivutia kwa uwezo wao nitarejea kwa kuanza Cooper Test ya Desemba ili mwakani niwanie beji ya FIFA niliyovuliwa kimizengwe tangu mwaka 2005," alisema Kazi.

Serikali yaja na mikakati ya kuibua ajira 30,000 kwa wahitimu wa Vyuo Vikuu

Waziri wa Kazi na Ajira, Gaudencia Kabaka

Na Suleiman Msuya
WIZARA ya Kazi na Ajira ipo katika mkakati wa kuanzisha programu ambayo itahusisha vijana waliomaliza vyuo vikuu na kuweza kuzalisha ajira 30,000 kwa kipindi cha miaka mitatu.
Hayo yamebainishwa na Msemaji wa Wizara hiyo Ridhiwan Wema wakati akizungumza na mwandishi wa habari leo jijini Dar es Salaam.
Alisema programu hiyo itatekelezwa na Serikali kwa kushirikiana na vyuo vya elimu ya juu nchini, taasisi za fedha na wabia wa maendeleo mbalimbali.
Wema alisema kwa kuanzia wake utaanza kwa kuendeleza programu ya mfano iliyoanzishwa na Idara ya kilimo, uchumi na biashara katika Chuo Kikuu cha Sokoine (DAEA-SUA) na hatimaye kuwafikia wahitimu wa vyuo vingine vya elimu ya juu.
Msemaji huyo alisema kwa kuanzia Serikali imekubaliana na Benki ya CRDB kuanzia utoaji wa mikopo kwa vijana mara utekelezaji wa programu utakapoanza.
“Tumekuja na programu mpya ambayo tunatarajia kuwa itaweza kuzalisha ajira 30,000 baada ya miaka mitatu na itagharimu shilingi bilioni 54.451 kwa kuhusisha vijana wa vyuo vikuu nchini wanaomaliza kwani takwimu zinaonyesha kila mwaka ni asilimia 48,” alisema.
Alisema madhumuni ya programu hiyo ni katika utekelezaji wa sera ya Taifa ya Ajira ya mwaka 2008 ya kuhamasisha uzalishaji wa kitaifa kufanikisha ajira kalimi  yenye kipato.
Wema alisema lengo la programu hiyo ambayo inahusisha vijana ni kuhakikisha kuwa vijana zaidi ya laki moja (100,000) wanapata ajira kupitia hatua mbalimbali kulingana na sifa zao.
Msemaji huyo pia lengo hilo ni kuongeza idadi ya vijana wanaomiliki shughuli rasmi za kiuchumi na wamejiajiri na kuajiri wengine, kukuza utamaduni wa kijasiriamali pamoja na ubunifu na kuhamasisha matumizi bora ya nguvu kazi.

Lissu aponda uendeshaji wa Bunge, adai unakwamisha mengi ya maana

Tundu Lissu akiwa Bungeni

Na Suleiman Msuya
MBUNGE wa Jimbo la Singida Kaskazini Tundu Lissu amesema itakuwa maajabu kwa wabunge wa Bunge la sasa kufanya maajabu kutokana na mfumo wa uendeshaji wake.
Lissu alisema hayo jijini Dar es Salaam wakati akichangia katika kongamano linaloratibiwa na taasisi ya  Jukwaa la Jamii (Policy Forum) kila mwisho wa mwezi.
Alisema kumekuwepo na dhana kuwa wabunge ndio wanaweza kufanya maamuzi katika masuala ya kitaifa lakini kusema ukweli mfumo wa uendeshaji wake itakuwa jambo gumu kwa sasa.
Mbunge huyo ambaye pia ni Mnadhimu Mkuu wa Kambi ya Upinzani Bungeni alisema ili Bunge hilo liweze kuwa na tija ni wakati muafaka kwa wananchi kufanya maamuzi sahihi pindi wanapopatiwa fursa hiyo.
“Jamani Watanzania napenda kuwaambia kuwa kwa mfumo wa Bunge hili la sasa wasitarajie kutokea maajabu kwani inabidi iwe hivyo ila wakati wa kufanya mabadiliko unakaribia,” alisema.
Lisu alisema dhana ya kuwa uchangiaji wa wabunge kuonekana wa mashaka unachangiwa na elimu alikanusha suala hilo na kusema mfumo mzima ndio chanzo cha matatizo hayo hivyo ni vema wananchi wakawa na subira ili kuhakikisha kuwa mabadiliko yanatokea.
Alisema elimu sio sababu ya kuonekana kwa uwezo mdogo kutokana na ukweli kuwa hakuna mtu yoyote ambaye anaweza kuwa mjuzi wa kila jambo.
Mbunge huyo alisema wabunge wengi hawana ofisi jambo ambalo linachangia kufanya kazi hata wakiwa baa hali ambayo haiwezi kuleta tija kwa maslahi ya nchi.
Alisema kumekuwepo na changamoto kubwa juu ya nguvu ya maamuzi kati ya Bunge na Serikali hali ambayo inachangia upande mmoja kujiona ndio wenye sifa ya kufanya maamuzi ya mwisho.
Lisu alisema Bunge limekuwa likinyimwa nafasi kutokana na dhana kuwa iwapo watakuwa na msimamo juu yabhoja Fulani ni dhahiri kuwa upo uwezekano wa Bunge kuvunjwa ambapo wabunge waliowengi wanaamini kuwa wanaweza wasirudi baada ya uchaguzi.
Kwa upande wake Mbunge wa Kisesa Luhanga Mpina alisema mfumo wa kuwasilisha bajeti bado unachangamoto nyingi ambazo zinahitaji kufanyiwa marekebisho ili kuhakikishakuwa bajeti inaleta tija kwa jamii.
Mpina alisema kumekuwepo na tabia ya kuwasilisha vitu nusu nusu wakati bunge likiendelea na vingine kutowasilishwa jambo ambalo linatia shaka juu ya nini kinafichwa katika mchakato huo.
Alizitaja changamoto hizo kuwa ni pamoja na kukosekana kwa ofisi ya Bunge ya bajeti, kutopatikana kwa vitabu vya mapato, uwazi juu ya matumizi ya misaada, taarifa za mkaguzi na zinginezo nyingi.
Mbunge huyo ambaye amekuwa na msimamo wa kujiamini pindi anapochangia hija zake Bungeni alisema ni vema kukawa na uwazi juu ya masauala ya katiba, uelewa na kuhakikisha kuwa wabunge wanashiriki kikamilifu tangu awali.

UNYAMA! Baba awauwa wanae wawili Kigoma, kisa mibangi!

Mauaji dhidi ya watoto kila kona. Hapa ni mwili wa mtoto Ayoub Agen ulipokuwa ukienda kuzikwa baada ya kuuwawa kinyama huko Rungwe mkoani Mbeya hivi karibuni. Watoto watafanyilia ukatili kama huo mpaka lini?

MATUKIO ya kikatili dhidi ya watoto wasio na hatia yamezidi kuendelea safari hii watoto wawili wachanga wamejikuta wakiuwawa kikatili na baba yao mzazi ambaye anashikiliwa na Jeshi la Polisi mkoani Kigoma kwa mauaji hayo yaliyotokea juzi asubuhi katika kijiji cha Mvugwe wilayani Kasulu.
Kwa mujibu wa Kamanda wa Polisi wa Kigoma, Fraiser Kashai, unyama huo ulifanywa na Majuto Thobias, 27 Jumatano asubuhi kwa kuwauwa watoto wake mwenyewe, mmoja akimchoma kisu na mwingine kichanga cha miezi mitatu kwa kumbamiza sakafuni na kumtoa uhai.
Kamanda huyo alisema majuto alimchoma kitu Loyce Majuto mwenye miaka miwili kifuani na kukishindilia hadi alipokata roho kabla ya kumgeukia kichanga kingine kilichokuwa kitandani chenye miezi mitatu kikiwa hakina jina bado na kumbamiza chini mara tatu hadi alipokufa.
Inaelezwa kuwa wakati mwanaume katili akifanya unyama huo, mkewe alikuwa nje akipika na aliposikia vilio vya wanae alikimbilia ndani na kukumkuta mtuhumiwa huyo akifanya ukatili huo kwa watoto wao.
Kamanda alisema mwanamke huyo aliamua kupiga mayowe kuita majirani baada ya kuwashuhudia wanawe wakiuwawa kikatili na ndipo walipofanikiwa kumkamata mtuhumiwa huyo na kumfikisha kituo cha Polisi.
"Inaelezwa kuwa mtuhumiwa huyo ambaye tunamshikilia alifanya ukatili huo kwa watoto wake kutokana na kile kinachoelezwa kuwa mtumiaji sugu wa dawa za kulevya aina ya bangi na kwamba upelelezi juu ya tukio hilo unaendelea kufanyika kabla ya kumfikisha mahakamani kwa makosa yanayomkabili" alisema.

Serikali yawakumbuka wanyonge

Na Suleiman Msuya

SERIKALI kupitia Wizara ya Sheria na Katiba ipo katika mchakato wa kutunga sheria ya Msaada wa Kisheria ambayo inalenga kuwasaidia wananchi na uwezo wa kulipia gharama zinazotozwa na Mawakili wa kujitegemea.

Hayo yamebainishwa Msemaji wa Wizara hiyo Farida Khalfan wakati akizungumza na waandishi wa habari leo jijini Dar es Salaam.

Alisema Wizara ya Sheria mwaka 2010 iliiunda kikosi kazi ambacho kilishirikisha wadau mbalimbali kufanya utafiti na kutoa mapendekezo juu ya mfumo sahihi ambao utakidhi hitaji kwa kila raia.

Msemaji huyo alisema baada ya kikosi kazi hicho kuwasilisha mapendekezo s.erikali kupitia Wizara ya Katiba na Sheria ilianza utaratibu wa kutunga sheria itakayojulikana kama (Sheria ya Msaada wa Kisheria)

Khalfan alisema maandalizi ya sheria hiyo yapo katika hatua za mwisho ambapo matarajio yao ni kuhakikisha kuwa sheria hiyo inawasilishwa Bungeni ifikapo Januari mwaka 2014.

“Tumekuwa tukifuatilia changamoto ambazo zinawakuta wananchi hasa katika masuala ya kisheria ila kutokana gharama kubwa ila tunaaamini kuwa mwakani utatuzi utakuwa ukipatikana,” alisema.

Alisema katika sheria hiyo itaunda chombo huru kitakachokuwa na majukumu mbalimbali ambayo ni kusajili taasisi zinazotoa msaada wa kisheria, kusajili watoa msaada wa kisheria, kuweka ubora wa viwango katika utoaji msaada wa kisheria na kuvisimamia.

Khalfan alisema pia chombo hicho kitasimamia nidhamu na maadili ya watoa huduma za msaada wa kisheria, kutambua wasaidizi wa kisheria na kutafuta fedha ili kutekeleza majukumu yake.

Alisema matoke ya kuwepo kwa sheria hiyo ni dhahiri kuwa watoa msaada wa kisheria atatakiwa kusajiliwa ili waweze kutoa huduma hiyo kupitia vituo vilivyosajiliwa kutoa msaada huo.

Msemaji huyo alisema kukosekana kwa sheria hiyo ndio sababu mojawapo ya kuwepo kwa watu wasio na sifa za kutoa huduma hiyo ambao wanatambulika kama (Bush Lawyers) ambao wamekuwa wakiwarubuni wananchi kuwa wanaweza kuwasaidia kisheria.

Alisema kupita kwa sheria hiyo kutasaidia jamii mbalimbali kama watoto, wajane na watu wote ambao wamekuwa wakipata shida ya msaada wa kisheria nchini kutokana na gharama kubwa zinazotozwa na wanasheria .

Miyeyusho kumvaa Mzambia Dar Live siku ya Idd Mosi

Bondia Francis Miyeyusho kushoto akitia saini mkataba wa makubaliano ya kucheza siku ya sikukuu ya Idd Mosi dhidi ya Darius Lipupa wa Zambia mpambano utakaopigwa katika ukumbi wa Dar Live kushoto ni Rais wa TPBO LIMITED Yassin Abdallah 'Ustaadh'

Bondia Francis Miyeyusho kushoto akitia saini ya Dole Gumba  mkataba wa makubaliano ya kucheza siku ya sikukuu ya Idd Mosi na Darius Lipupa wa Zambia mpambano utakaopigwa katika ukumbi wa Dar Live kushoto ni Rais wa TPBO LIMITED Yassin Abdallah 'Ustaadh'

Rais wa TPBO LIMITED Yassin Abdallah 'Ustaadh' kushoto akimkabidhi kiasi cha pesa bondia Francis Miyeyusho kama sehemu ya maandalizi ya mpambano wake utakaofanyika siku ya Sikukuu ya Idd katika ukumbi wa Dar Live