Dekula Band kutambulisha mpya 'Little Nairobi'

Vumbi Dekula Kahanga akipagawisha mashabiki katika ukumbi wa Lilla Wien, nchini Sweden unaofahamika zaidi kama 'Nairobi Ndogo'

MWANAMUZIKI mahiri wa zamani wa bendi ya Orchestra Marquiz, Allain Dekula Kahanga 'Vumbi' akiwa na kundi lake la Dekula Band 'Ngoma ya Kilo' linalowajumuisha wakali kama Bobo Sukar, Yaya Sella na Sam Kasule wanatarajia kutambulisha nyimbo mpya kwenye onyesho litakalofanyika Mei 17-18.

Kwa mujibu wa taarifa ambazo Vumbi ameitumia blog hii hivi punde ni kwamba onyesho hilo litafanyikia kwenye ukumbi wa Lilla Wien maarufu kama 'Little Nairobi' nchini Sweden.

Vumbi alisema mashabiki wa bendi hiyo na wengine wa muziki waliopo Sweden na maeneo ya jirani watapa burudani kabambe kupitia nyimbo za albamu zao za zamani wakiwa kundi moja la Makonde Band na nyingine binafsi ikiwamo mpya inayoandaliwa kwa sasa.

Mcharaza gitaa huyo ambaye ni mtunzi na muimbaji, alisema watakaohudhuria maonyesho hayo mawili mfululizo bila shaka watasuuza nyoyo zao kwa namna Dekula Vumbi walivyojiandaa kuwapa kitu roho inapenda.

TANGAZO LAO LINASOMEKA HIVI

"Wazee Wapewe" present's;
Sammy Kasule,Bobo Sukari & Yaya Sella
Dekula Band (Ngoma Ya Kilo)
Place: Lilla Wien"Little Nairobi"
Date:17-18/05/2013
Time:21.00-01.00
Addr: Swedenborgsg.20
Pendel: Södra Station

Azam yaikata maini Simba, yatinga CAF kwa kishindo

Azam Fc yaliokata tiketi ya kucheza michuano ya CAF na kuzima ndoto za Simba

TIMU ya Azam imezifuta ndoto za waliokuwa mabingwa wa Ligi Kuu Tanzania, Simba kupata nafsi ya uwakilishi wa nchi katika michuano ya kimataifa mwakani baada ya jioni hii kuidadavua Mgambo JKT kwa mabao 3-0 na kunyakua nafasi ya pili kwa msimu wa pili mfululizo.
Azam ilikuwa ikimenyama na Mgambo inayosaka pointi moja ya kujinusuru kushuka daraja kwenye pambano pekee lililochezwa leo na lililofanyika katika uwanja wa Chamazi, Mbagala Dar es Salaam.
John Bocco 'Adebayor', Kipre Tchetche na Joackins Atudo ndiyo waliioifungia Azam mabao na kuifanya inyakue pointi tatu na kufikisha pointi 51 ambazo haziwezi kufiwa na timu yoyote hata Simba waliokuwa wakiiota nafasi ya pili baada ya kupata ushindi wa mechi tatu mfululizo na kurejea kwenye nafasi ya tatu.
Azam inaungana na Yanga kuiwakilisha Tanzania katika michuano ya kimataifa ya Afrika mwakani, yenyewe ikicheza tena Kombe la Shirikisho la Yanga wanaoisubiri Simba Mei 18 katika mechi ya kufunga dimba itacheza Ligi ya Mabingwa Afrika.
Kipigo cha jioni ya leo kimezidi kuitia tumbo joto Mgambo inayosaka pointi moja katika mechi ya pili sasa bila mafanikio, ili kujiepusha kushuka daraja na sasa kulazimika kusubiri pambano lake la mwisho dhidi ya African Lyon kuwaamua kama wataungana na wapinzani wao hao walioshuka daraja au la.
Mgambo ina pointi 25 na tishio la kuenguliwa katika nafasi na timu za Toto African na Polisi Moro zenye pointi 22 kila mmoja ambazo pia zikishinda mechi zao za mwisho huenda zikafikisha idadi hiyo na kusubiri kuangalia tofauti na uwiano wa mabao ya kufunga na kufungwa ila iwapo kama Polisi watalala kwa Lyon.

Adebayor aipeleka Spurs Top 4 wakiiua Stoke City

Emmanuel Adebayor

BAO la dakika ya 83 lililtumbukizwa kimiani na Emmanuel Adebayor muda mfupi uliopita limeiwezesha Tottenham Hotspur kuiengua kwenye nafasi ya nne timu ya Arsenal baada ya kuinyuka Stoke City nyumbani kwake mabao 2-1.
Spurs kwa ushindi wa leo imefikisha pointi 69, mbili zaidi ya Arsenal ambayo inatarajiwa kushuka dimbani Jumanne kuumana na Mabingwa wapya wa FA, Wigan Athletic.
Wageni hao walishutuliwa kwa bao la mapema la dakika ya tatu tu ya mchezo huo lililowekwa kimiani na Steven N'Zonzi kabla ya Spurs kuchomoa dakika 17 baadaye na Clint Dempsey na kufanya hadi mapumziko matokeo yawe bao 1-1.
Kipindi cha kilianza kwa wenyeji kumpoteza kiungo wake Charlie Adam baada ya kuonyesha kadi ya pili ya njano kwa kumchezea vibaya Jan Vertonghen na kutolewa hivyo katika dakika ya 47.
Ndipo zilipokuwa zimesalia dakika saba pambano hilo kuisha Mtogo Adebayor aliiandikia Spurs bao la pili na la ushindi lililokuwa likihitajika na kuifanya Spurs kuvuna pointi zote tatu na kukwea nafasi ya nne ikiitoa kwa muda Arsenal.
Ligi hiyo inaendelea muda huu kwa mechi kadhaa ambapo tayari baadhi ya nyavu za viwanja vinavyochezwa zimeshatikiswa mabao.

Lady Jaydee kutimba mahakamani kesho kisa...!

Lady Jaydee 'Anaconda a.k.a Comandoo

 

 Na Andrew Chale

MWANAMUZIKI mahiri nchini wa muziki wa kizazi kipya na kiongozi wa bendi yenye mvuto nchini  ya ‘Machozi’,  Judith Wambura ( Lady Jay Dee) au  Jide ama #Teamaanaconda#,  anatarajia kuripoti Mahakama ya Kinondoni siku ya Jumatatu Mei 13, kufuatia kufikishiwa kwa taarifa hizo Gadna G Habash ‘Captain’ ambaye ni Meneja na mume wa Lady Jay Dee.

Akizungumza na mwandishi wa habari hizi jana mchana, Gadna amesema ni kweli wamepata taarifa za kutaarifiwa kwa Lady Jay Dee kufika Mahakama ya Kinondoni, siku ya Jumatatu.

“Ni kweli tumepata wito na Mahakama ya Kinondoni,  Hii ni kufuatia kwa jana  kufika watu ambao walijielezea kuwa wanatoka Mahakama hiyo na walikuja na barua ya kumkabidhi Lady Jay Dee mwenyewe hata hivyo hawakumkuta” amesema Gadna.

Ameendelea kueleza kuwa, hata alipowaeleza watu hao wamkabidhi yeye hiyo barua watu hao walisema ilikuwa si rahisi zaidi alitakiwa akabidhiwe mlengwa, hivyo kumueleza kuwa wito wa kufika mahakamani siku ya Jumatatu, na  aliwakubalia kwa hilo.

Hata hivyo, Gadna amesema hajajua Lady Jay Dee anaitiwa nini na kwa sababu ya nini amemwelezea na amesema watatekeleza wito huo wa kufuka Jumatatu Mahakamani hapo.

Aidha, kupitia kwenye ukurasa wake wa Kijamii wa facebook,  Lady Jay Dee aliandika: “Ratiba ya Usiku wa leo,  ni Machozi Band, kama kawaida, ila ratiba ya Jumatatu natakiwa Mahakama ya Kinondoni..Taarifa zaidi zitafuata nikijua kinachoendelea…” aliandika Jide  kwenye ukurasa huo ambao mpaka hatua ya mwindishi anatembelea ‘post’ hiyo ilikuwa na maoni mengi ambayo watu mbalimbali walipata kuchangia.

Maoni hayo yanayokaribia zaidi ya 558 na, ‘Like’ zaidi ya 756 na ‘Share’ zaidi ya 20,  ambapo wengi wao wameweza kumuhusisha moja kwa moja na Mkurugenzi wa Clouds Fm, Ruge Mutahaba kuwa ndie aliyefanya hivyo.

Kwa mujibu wa vyanzo mbalimbali na moja ya gazeti hivi karibuni ilimnukuu Ruge kuwa amejiandaa kuchukua hatua  ikiwemo ya kisheria dhidi ya Lady Jay Dee baada ya kumsema kupitia kwenye mitandao ya kijamii.

Aidha, katika kuelekea shoo yake ya Miaka 13 ya Lady JayDee, amemtangaza rasmi msanii machachari wa bongo fleva, Juma Nature.

Jide amesema Nature ameongezeka katika list ya wasanii watakaokuwepo kushiriki miaka 13  ambapo ataungana na wasanii wengine wengi siku hiyo  ambapo tayari tiketi zimeanza kuuzwa. “Naomba mujitokeze kwa wingi na tiketi zinapatikana karibu sehemu zote ikiwemo Shear Illusions Mlimani City, City Sports Lounge Mjini Posta, BM Salon Kinondoni, American Nails n Hair Salon,  bila kusahau Nyumbani Lounge mahala patakapofanyika shoo hiyo.

MAMA AMCHOMA MOTO NYETI MTOTO KISA KUNYWA UJI

MAMA AMCHOMA MOTO NYETI MTOTO KISA KUNYWA UJI

ELIZABETH Bureko (26), mkazi wa Kata ya Nyamatare, Manispaa ya Musoma, amepandishwa kizimbani katika Mahakama ya Wilaya ya Musoma, kwa tuhuma za kumchoma na moto sehemu za siri mtoto wa kike mwenye umri wa miaka minane. Mbele ya Hakimu Mkazi wa Mahakama hiyo, Baraka Maganga, ilidaiwa na Mwendesha Mashitaka wa Polisi, Sajini Stephano Mgaya, kuwa mwanamke huyo anadaiwa kutenda kosa hilo Aprili 24 mwaka huu, saa 3 asubuhi.
Kwa mujibu wa mwendesha mashitaka huyo, mshitakiwa alikiuka kifungu cha sheria namba 169 cha mwenendo wa makosa ya jinai kama sheria hiyo ilivyofanyiwa marekebisho na kuwa namba 16, mwaka 2002.
Alidai kwamba, mshitakiwa huyo alimchoma katika sehemu zake za siri na mdomoni baada ya kumtuhumu mtoto huyo wa wifi yake, kwamba alikuwa akinywa uji wa mtoto aliyekuwa akimnywesha. Mshitakiwa alikana shitaka na kurudishwa mahabusu hadi Mei 25 mwaka huu, kesi yake itakapotajwa tena.

Golden Bush Veterani watepeta tena kwa vijana wao walambwa 3-1

Hiki ndiko kikosi cha Golden Bush Fc kinachowanyanyasa wazee wao kila wanapokutana katika mechi za kujipima nguvu. Wa kwanza kulia (waliosimama) ni kocha wao, Katina Shija na mwishoni ni Meneja wao Wazir Mahadhi 'Mandieta'.

WAKALI wa soka la veterani jijini Dar es Salaam, Golden Bush imeendelea kuwa 'urojo' na kushindwa kabisa kupata 'tiba' ya kuepuka vipigo toka kwa vijana wao wanaoshiriki Ligi Daraja la Nne Wilaya ya Kinondoni, Golden Bush FC baada ya asubuhi ya leo kukubali kipigo kingine cha mabao 3-1.

Hicho ni kichapo cha pili mfululizo kwa Veterani hao toka kwa vijana wao baada ya mwezi uliopita kunyukwa mabao 2-1.

Katika pambano la asubuhi ya leo 'wazee' hao wanaowatumia nyota wa Simba na Yanga walishindwa kuwazuia vijana wao na kukubali kipigo hicho kilichotokana na mabao ya Ayoub Lipati na Ibrahim Ramadhani aliyetumia mawili kabla ya Kudra Omar, kuipatia Golden Bush Veterani bao la kufutia machozi.

Mlezi na Msemaji wa timu ya wazee, Onesmo Waziri 'Ticotico' amekiri kwamba kikosi chake kimeshindwa kupata dawa ya kuwadhibiti vijana wao walioimarika zaidi kwa sasa huku wakiongoza msimamo wa kundi lake katika Ligi ya TFF-Kinondoni..

"Hawa vijana hatuwazi tena maana wanatufanya watakavyo kama tunavyowanyanyasa watani zetu Wahenga Fc. Wameimarika sana kwa sasa," alisema Ticotico ambaye hucheza kama mshambuli wa pembeni.

Real Madrid wateja taji la Ligi Kuu Hispania, Barca wapeta kilaini

Nyota wa Real Madrid Cristiano Ronaldo akiwania mpira na mchezaji wa Espanyol jana

MABINGWA wa zamani wa Ulaya, Barcelona inayojiandaa kujitupa ugenini mjini Madrid kupambana na wenyeji wa Atletico Madrid, imewavua rasmi ubingwa wapinzani wao wa jadi Real Madrid, baada ya vijana hao wa Jose Mourinho kulazimishwa sare ya 1-1 ugenini dhidi ya Espanyol.
Barcelona imetwaa taji hilo kwa kufikisha pointi 88 ambazo haziwezi kufikiwa na wapinzani hao hata kama watashinda mechi zao mbili walizonazo mkononi kwa sasa.
Real Madrid waliokuwa watetezi wa taji hilo kwa sare ya jana wamefikisha pointi 81 na wakishinda mechi zao zilizosalia watafikisha pointi 87 tu ambazo zimeshapitwa na Barca walio na michezo minne mkononi.
Vijana wa Mourinho walilazimika kusawazisha bao katika kipindi cha pili baada ya wenyeji wao kuwatangulia kwa bao la dakika ya 23 lililofungwa na Mruaguay Cristhian Stuani.
Bao hilo la kusawazisha la Madrid liliwekwa kimiani na Muargentina Gonzalo Higuain akimalizia kazi ya kiungo nyota wa Croatia, Luka Modric.

Kagera Sugar ndiyo basi tena, Azam yahitaji pointi moja kutinga CAF

Ruvu Shooting

Kagera Sugar

SARE ya bao 1-1 iliyopata Kagera Sugar nyumbani dhidi ya Ruvu Shooting imeihakikishia waliokuwa mabingwa wa Ligi Kuu Tanzania Bara, Simba kumaliza kwenye Tatu Bora ya ligi ya msimu huu.
Kagera waliokuwa wamekalia nafasi ya tatu kwa muda mrefu kabla ya kuenguliwa na Simba hivi karibuni imepoteza matumaini ya kocha wake, Abdallah Kibadeni aliyeapa mwanzoni mwa msimu kuwa ni lazima amalize kwenye Tatu Bora msimu huu kama moja ya mikakati yake alipojiunga na timu hiyo.
Timu hiyo iliyosaliwa na mechi moja kabla ya kufunga msimu kwa sare ya jana imefikisha pointi 41 na hata ikishinda mechi ya mwisho itafikisha pointi 44 ambazo zimeshapitwa na Simba yenye pointi 45 na mchezo mmoja mkononi.
Katika mechi ya jana kwa mujibu wa Afisa habari wa Ruvu Shooting, Masau Bwire, Kagera ndiyo waliokuwa wa kwanza kupata bao katika dakika ya 14 lililofungwa na Daud Jumanne kabla ya timu yake kusawazisha dakika 11 baadaye kupitia Juma Mdindi na kudumu hadi wakati wa mapumziko.
Katika kipindi cha pili timu zote zilifanya mabadiliko ya wachezaji na kushambuliana kwa zamu licha ya kutoweza kuongeza bao lolote na kuzifanya zigawane pointi moja moja.
Ligi hiyo itaendelea jioni ya leo kwa pambano moja tu kati ya waliokuwa wawakilishi wa Tanzania katika michuano ya Kombe la Shirikisho, Azam dhidi ya Mgambo JKT pambano litakalochezwa Chamazi, jijini Dar.
Azam inahitaji sare yoyote kuweza kufikisha pointi 49 ambazo hazitaweza kufikiwa na Simba na kukata tiketi nyingine ya kushiriki michuano hiyo ya Shirikisho mwakani.
Azam wana pointi 48 na imesaliwa na mechi moja baada ya pambano wakatalocheza leo, ambapo mbio zao za kuwania ubingwa zilikatishwa na Coastal Union waliowalazimisha sare ya bao 1-1 na kuipa Yanga ubingwa kilaini bila yenyewe kushuka dimbani.
Yanga waliotwaa taji hilo kwa mara ya 24 tangu kuanza kwa Ligi Kuu mwaka 1965 imejihakikishia kitita cha Sh Milioni 70 kutoka kwa wadhamini wa Ligi hiyo kampuni ya mtandao wa simu za mkononi, Vodacom na kukata tiekti ya Ligi ya Mabingwa Afrika.
Azam iwapo itanyakua nafasi ya pili itavuna kitita cha Sh. Milioni 35 na Simba tayari wana hakika ya kubeba Sh Mil 25 kwa kujihakikishia nafasi ya tatu.
Ligi hiyo itafikia tamati Jumamosi ijayo ambapo timu zote 14 zinazoshiriki ligi hiyo zitashuka dimbani, huku jicho na sikio la mashabiki likisubiri kwahamu pambano la watani Simba na Yanga litakalochezwa kwenye uwanja wa Taifa.