Golden Bush Veterani, Baker Rangers zashindwa kutambiana

Mlezi wa timu ya Golden Bush Veterani, Onesmo Waziri 'Ticotico' akihojiwa na wanahabari

BAADA ya kuzimwa na vijana wao kwa mabao 2-1 wiki iliyopita, timu ya Golden Bush Veterani jana ilijitutumua na kulazimisha sare ya bao 1-1 dhidi ya Bakers Rangers katika pambano la kirafiki lililochezwa kwenye uwanja wa Kinesi, Ubungo.
Pambano hilo maalum kwa Golden Bush ikijiandaa kuwavaa wapinzani wao wa jadi, Wahenga Fc wakati wa sikukuu ya Pasaka, lilioshuhudiwa Golden Bush wakianza kupata bao kupitia 'Pro' wao kutoka Kongo, Sadick Mihambo kabla ya Baker Rangers iliyokuwa na nyota kama Mussa Hassani Mgosi, Abuu Ramadhani 'Amokachi', Kamba Luffo na mkongwe Abdallah Kinyunyu ilisawazisha bao hilo.
Mfungaji wa bao hilo la kusawazisha lililofanya hadi mapumziko timu zote kutoka nguvu sawa uwanjani, lilipachikwa wavuni na Kinyunyu.
Kipinsi cha pili timu ziliendelea kushambuliana kwa zamu, japo hazikuweza kuongeza bao lolote na kufanya hadi pambano lilipomalizika ziwe sare ya bao 1-1.
Mlezi na Msemaji wa Golden Bush aliyeipenyezea Blog hii matokeo ya mechi hiyo, alisema wamefarijika kupata sare hiyo, japo walipania kuibuka na ushindi, huku wakidai pambano hilo limekuwa kipimo tosha la kujiandaa na mechi yao dhidi ya Wahenga watakaomenyana nao wakati wa sikukuu ya Pasaka.
Golden Bush na Wahenga zimeshakutana mara tatu mpaka sasa na kila moja kuibuka na ushindi wa mechi moja na pambano jingine kutoshana nguvu ya kufungana bao 1-1, na msemaji huyo wa Golden Bush, Onesmo Waziri 'Ticotico' amedai mechi yao ijayo ni lazima watainyamazisha Wahenga ili kuisherehekea vema sikukuu ya Pasaka.

MZIMBA AGONGWA NA BODABODA, RAIS KIKWETE AMTEMBELEA

MZIMBA AGONGWA NA BODABODA, RAIS KIKWETE AMTEMBELEA

Rais Jakaya Mrisho Kikwete akimjulia hali na kumpa pole Mzee` Yusuf Mzimba, mmoja wa wazee marufu wa Klabu ya Dar es salaam Young Africans (YANGA) ambaye amelezwa katika Hospitali ya Taifa ya Muhimbili akiuguza majeraha kufuatia kugongwa na BodaBoda wiki iliyopita Barabara ya Nyerere jijini Dar es salaam. Mzee Mzimba amevunjika mguu wa kushoto na kupata majeraha ya usoni na mikononi. Hadi jana hali yake ilikuwa inaendelea vyema na Rais Kikwete amempa pole  kwa maumivu aliyoyapata na kumtakia apate nafuu ya haraka. PICHA NA IKULU

Ushindi Simba yafufua matumaini, wazima 'uasi' Msimbazi

Haruna Chanongo akijiandaa kufumua shuti katika lango la Coastal Union

USHINDI wa mabao 2-1 iliyopata Simba jioni ya leo licha ya kufufua matumaini yao ya kutetea taji lao ambalo linaoonekana kunyemelewa na Yanga, lakini pia imefanikiwa kuzima hasira za mashabiki wake ambao wamekuwa wakitoa shinikizo la viongozi wa klabu hiyo kuachia ngazi kwa timu kufanya vibaya.
Aidha kufanikiwa kufunga mabao mawili katika kipindi cha kwanza kwa Simba kumekuwa kama rekodi kwao kwani karibu mechi zote imekuwa ama ikienda mapumziko wakiongoza kwa bao moja kupata ushindi wake katika kipindi cha pili tofauti na ilivyokuwa leo mbele ya Wagosi wa Kaya.
Mashabiki wa Simba wamekuwa na hasira na timu yao kutokana na kuwanyima raha tangu mwishoni mwa duru la kwanza mwishoni mwa mwaka jana kwa kupoteza mechi au kuambulia sare kiasi kwamba imesababisha baadhi ya viongozi wake kuamua kiuachia ngazi huku mashabiki hao wakiwa na hamu ya Simba ingeteleza leo ili wawe na sababu ya kuuong'oa uongozi mzima chini ya Ismail Aden Rage.
Hata hivyo mabao mawili ya Mrisho Ngassa na Haruna Chanongo yalitosha kuzima 'uasi' Msimbazi kwa kuongeza hazina ya pointi katika mbio zao za kutetea taji la ligi kuu.
Hata hivyo Simba italazimika kupata ushindi katika mechi zake saba zilizosalia huku wakiiombea Yanga na hata Azam ziteleze katika michezo yao ili kuweza kulitetea taji lake, vinginevyo wanaweza kujikuta wakiikosa hata nafasi ya pili.
Yanga yenye pointgi 45, inahitaji pointi 14 tu katika mechi zake saba zilizosalia kuweza kujihakikishia ubingwa na 12 tu kufikisha pointi 57 ambazo zitaivua Simba taji kwani mabingwa hao watetezi uwezo wa kwa sasa ni kufikisha poingti 55 tu.
Hata hivyo kwa vile soka halitabiriki na Simba na Yanga zenyewe zinatarajiwa kukutana katika mechi ya marudiano itakayofungia msimu Mei mwaka huu, yanaweza kutokea maajabu kama ilivyokuwa misimu miwili iliyopita ambapo Yanga iliwazidi kete Simba dakika za mwishoni na kuwapoka taji kwa uwiano wa mabao ya kufunga na kufungwa baada ya muda mrefu kuachwa nyuma na watani zao hao pamoja na Azam walioambulia nafasi ya tatu msimu wa 2010-2011.

MARY RUTTA ATWAA TAJI LA MISS UTALII TALENT 2013

MARY RUTTA ATWAA TAJI LA MISS UTALII TALENT 2013

Mary na warembo wenzake wakishangilia ushindi huo.Mary Chrisostom Rutta, kutoka Mkoa wa Manyara (katikati) akifurahi baada ya kutangazwa mshindi. Kushoto ni Jamia Abdul (Kagera) na Joan John kutoka Lindi ambao waliingia tatu bora.

Warembo wakionesha vipaji kwa kucheza ngoma za asili.

Wakionesha vazi la ubunifu.

Msanii wa ngoma za asili kutoka Bagamoyo, Chemundu Gwao, akicheza na warembo hao.

Ilikuwa ni shangwe na furaha tupu kwa washiriki na ubunifu wao.

Mwakilishi wa Kagera, Jamia Abdul, akicheza ngoma ya Kihaya.

Mikogo pia ilipewa nafasi yake mbele ya meza kuu.

Rais wa Miss Utalii Tanzania na Jaji Mkuu wa kinyang’anyiro hicho, Gideon Chipungahero ‘Chipss’ (kulia) na majaji wenzake wakikusanya pointi.

Meya wa Manispaa ya Temeke, Maabad Hoja, akimvisha Sasha mrembo huyo baada ya kutangazwa mshindi.

DJ Max (kulia) na Mc Adria Cleophace walifanya kazi kubwa ya kunogesha tukio hilo.MREMBO Mary Rutta kutoka Mkoa wa Manyara jana usiku aliwabwaga warembo wenzake 26 katika kinyang’anyiro cha kumsaka mrembo wa Miss Utalii mwenye kipaji. Kinyang’anyiro hicho kilifanyika Uwanja wa Taifa wa Burudani wa Dar Live.(PICHA : RICHARD BUKOS / GPL)

SERIKALI YAWAPIGA 'STOP' MAAFISA WAANDAMIZI JESHI LA POLISI

SERIKALI YAWAPIGA 'STOP' MAAFISA WAANDAMIZI JESHI LA POLISI

Waziri wa Mambo ya Ndani ya Nchi, Dk Emmanuel Nchimbi

Na Lydia Churi- MAELEZO

SERIKALI imewasimamisha kazi na itawafungulia mashtaka ya kijeshi maafisa watano wa Jeshi la Polisi nchini kutokana na tuhuma mbalimbali za ukiukaji wa maadili na taratibu za jeshi hilo.

Waziri wa Mambo ya Ndani ya Nchi Dkt. Emmanuel Nchimbi amewataja waliosimamishwa kazi kuwa ni  Elias Mwita aliyekuwa Mkuu wa Upelelezi Mkoa wa Mbeya, Jacob Kiango aliyekuwa Msaidizi wa Mkuu wa Upelelezi Mkoa wa Mbeya na Charles Kinyongo aliyekuwa Mkuu wa kikosi cha kutuliza Ghasia Mkoa wa Mbeya.

Akizungumza na Waandishi wa Habari leo jijini Dar es Salaam, Dkt. Nchimbi alisema viongozi hao wamesimamishwa kazi tangu jana kutokana na kukiuka maadili ya jeshi la Polisi nchini ambapo wanatuhumiwa kwa madai kuwa walipeleka chumvi na sukari kwenye Ofisi ya Mkemia Mkuu badala ya kilo 1.9 ya madawa ya kulevya aina ya Cocaine yaliyokamatwa na askari mkoani Mbeya mwezi Machi mwaka jana.

Waziri Nchimbi alisema vitendo hivyo vinavyofanywa na viongozi wa jeshi la Polisi vinawavunja moyo na kuwapa hofu askari wa ngazi ya chini ambao hushindwa kufanya kazi zao kwa uadilifu unaotakiwa.  

Katika hatua nyingine, aliyekuwa mkuu wa Upelelezi mkoani Kagera Peter Matagi amesimamishwa kazi na atafunguliwa mashtaka ya kijeshi kutokana na kukiuka taratibu za kazi kwa kuwabambikiza kesi zisizo na dhamana wananchi 13 wa kata ya Nyakasimbi wilaya ya Karagwe mkoa wa Kagera Kutokana na vurugu za kugombea ardhi ambazo hazikuwiana na aina ya mashtaka walioshtakiwa hali inayoonesha dalili ya uwepo wa rushwa

Waziri Nchimbi alisema wananchi hao walibambikizwa kesi ya ujambazi wa kutumia silaha ambapo walikaa mahabusu kwa muda wa miezi miwili na baadaye timu ya uchunguzi iliyoongozwa na waziri mwenyewe kugundua kuwa mashtaka waliyoshtakiwa hayakuwa sahihi hali ambayo ilisababisha Mwendesha Mashtaka Mkuu wa Serikali (DPP) aliifuta kesi.

Aidha, Serikali pia imemsimamisha kazi aliyekuwa Mkuu wa Polisi wilaya ya Serengeti Paul Mng’ong’o kwa kosa la kuingia katika Hifadhi ya Mbuga za wanyama ya Serengeti na kupanga njama ya kuchimba madini aina ya dhahabu ndani ya hifadhi hiyo hali iliyosababisha kiongozi huyo kushtakiwa  kwenye mahakama ya kiraia huko Serengeti.

Wakati huo huo Kamishna Msaidizi Mwandamizi wa Polisi aliyekuwa anasimamia ajira katika jeshi hilo nchini Renatus Chalamila amepewa likizo ya mwezi mmoja baada ya kutajwa mara nyingi kuhusika na kuwatoza fedha vijana walioomba ajira ya jeshi la polisi ili awapatie kazi hiyo.

Alisema Chalamila amepewa likizo hiyo na mapendekezo kupelekwa kwa Rais wa Jamhuri ya Muungano wa Tanzania kama mamlaka ya nidhamu  ili Rais afanye maamuzi juu ya tuhuma zinazomkabili askari huyo.

Kufuatia hali hiyo jeshi la polisi limelazimika kuwaondoa katika mafunzo askari wanafunzi 95 waliokuwa wamejiunga na chuo cha polisi baada ya kubainika kuwa walipata fursa hiyo kwa kutoa fedha.

Waziri Nchimbi alitoa wito kuwa Serikali itawaunga mkono askari wanaofanya kazi kwa uadilifu ila watakaoenda kinyume na maadili na taratibu za jeshi la polisi serikali haitasita kuwachukulia hatua za kisheria ikiwemo kuwafukuza kazi.

Hatua zilizochukuliwa na Serikali kwa viongozi wa jeshi la polisi ni sehemu ya makubaliano ya Maafisa waandamizi wa jeshi la Polisi nchini waliokutana hivi karibuni mjini Dodoma kulinda maadili ya jeshi hilo na kukabiliana na vitendo vyote vinavyolichafua jeshi hilo kwa jamii ili  kutatua kero za wananchi na kuzingatia utawala bora.

Mapato Yanga, Toto Africans kiduchu

MAPATO ya mechi ya Yanga dhidi ya Toto Africans yamekuwa kiduchu zaidi ya yote kwa vinara hao wa ligi katika mzunguko wa pili wa Ligi Kuu ya Bara msimu huu baada ya watazamaji 7,412 tu kuhudhuria kwenye Uwanja wa Taifa jijini Dar es Salaam jana. Sh. 42,508,000 zilipatikana.

Mechi hiyo namba 135 iliyochezeshwa na Andrew Shamba kutoka mkoani Pwani ilimalizika kwa Yanga ambao wanaongoza VPL wakiwa na pointi 45 kuibuka na ushindi wa bao 1-0. Goli hilo lilifungwa na Nizar Khalfan. Mahasimu wao Simba, ambao mambo yao si mazuri, watajaribu kurekebisha hali ya hewa leo kwenye Uwanja wa Taifa dhidi ya Coastal Union ambayo iko katika kiwango cha juu.

Viingilio vilikuwa sh. 5,000, sh. 8,000, sh. 15,000 na sh. 20,000 huku kila klabu ikipata mgawo wa sh. 9,406,764.95 wakati Kodi ya Ongezeko la Thamani (VAT) iliyolipwa ni sh. 6,484,271.19.

Kiingilio cha sh. 5,000 ndicho kilichovutia watazamaji wengi ambapo waliokata tiketi hizo walikuwa 6,708 na kuingiza sh. 33,540,000 wakati idadi ndogo ya washabiki ilikuwa ya kiingilio cha sh. 20,000 kilichovutia washabiki 89 na kuingiza sh. 1,780,000.

Mgawo mwingine wa mapato hayo ni asilimia 15 ya uwanja sh. 4,783,100.82, tiketi sh. 4,136,390, gharama za mechi sh. 2,869,860.49, Kamati ya Ligi sh. 2,869,860.49, Mfuko wa Maendeleo ya Mpira wa Miguu (FDF) sh. 1,434,930.25 na Chama cha Mpira wa Miguu Mkoa wa Dar es Salaam (DRFA) sh. 1,116,056.86.

Simba yawatafuta Wagosi wa Kaya Taifa

MABINGWA watetezi wa Ligi Kuu Tanzania Bara, Simba leo imezinduka kwa kuweza kuilaza Coastal Union ya Tanga mabao 2-1 katika mechi yao ya kwanza ikiwa chini ya kamati maalum ya ushindi inayoongozwa na Malkia wa Nyuki.
Ikichezesha asilimia kubwa ya wachezaji wa kikosi cha pili, Simba ilionyesha uhai licha ya kusubiri mpaka dakika za lala salama za kipindi cha kwanza kuweza kupata mabao yake ya chapchap na kwenda mapumziko wakiongoza 2-0.
Mrisho Ngassa aliiandikia Simba bao dakika za nyongeza za kipindi cha kwanza na dakika moja baadae Haruna Chanongo aliiongezea Simba timu yake bao la pili akimalizia pasi ya Ngassa na kufumua shuti lililomshinda kipa Shaaban Kado.
Kipindi cha pili, Coastal waliokuwa wamelipania pambano hilo ili wakalie nafasi ya tatu, walionyesha uhai na kufanikiwa kupoata bao lao la kufutia machozi lililofungwa katyika dakika ya 50 lililofungwa na kiungo Razak Khalfan bao lililofanya hadi mwisho wa mchezo matokeo kusomeka hivyo kwa Simba kuibuka kidedea kwa ushindi wa mabao 2-1.
Kwa matokeo hayto Simba imeendelea kukalia nafasi ya tatu ikifikisha pointi 34 tatu nyuma ya Azam wote wakiwa wamecheza mechi 19 sawa na vinara Yanga wanaoongoza kwa pointi 45.
Katika pambano la leo Simba ilipangwa hivi; Abbel Dhaira, Nassor Masoud ‘Chollo’, Miraj Adam, Hassan Hatibu, Shomari Kapombe, Jonas Mkude, Amri Kiemba, Rashid Ismail/Salim Kinje, Abdallah Seseme, Haruna Chanongo na Mrisho Ngassa/Ramadhan Singano ‘Messi’.
Coastal Union; Shaaban Kado, Hamad Hamisi, Abdi Banda, Mbwana Hamisi, Philip Mugenzi, Razak Khalfan, Daniel Lyanga/Twaha Shekuwe, Mohamed Athumani, Deangelis da Silva, Suleiman Kassim ‘Selembe’ na Joseph Mahundi/Castory Mumbara.