Wanawake Mbeya wamcharukia Mchumba wa Dk Slaa kwa kumkashifu Mama Salma Kikwete

UMOJA wa wanawake  wa chama cha Mapinduzi Mkoani Mbeya(UWT) umemshukia Bi.Josephine Mushumbusi ambaye ni mchumba Katibu Mkuu wa chama cha
Demokrasia na maendeleo CHADEMA kufuatia kauli za udhalilishaji dhidiya Mke wa Rais Mama Salma Kikwete.


Hatua hiyo inatokana  na kauli za kiudhalilishaji zilizotolewa mwishoni mwa wiki na mchumba huyo wa Katibu Mkuu wa Chadema kuwa mama Kikwete ameshindwa kumshauri   Rais ambaye ni mume wake  kuiongoza nchi vizuri.

Kauli hiyo imetolewa jana na Mwenyekiti wa Umoja wa Wanawake Mkoa wa Mbeya Bi.Priscilla Mbwaga wakati  akitoa Tamko   kwa waandishi wa habari juu ya Matusi ya wazi yaliyotolewa na Bi.Mushumbusi   kwa Mke wa Rais katika mikutano ya hadhara iliyofanyika Wilayani Mbozi Kata ya Vwawa Mkoani hapa.

Bi.Mbwaga alisema kuwa katika mikutano yake ya Hadhara Bi.Mushumbusi alidai kuwa  mama Salma Kikwete  ameshindwa kumshauri  mume wake kuingoza nchi na kuacha Twiga wakiwa wanakunjwa na kuondoka na kwamba yeye akiwa Ikulu hataacha kumshauri mume wake Dkt.Slaa katika masuala ya kuingoza Nchi
 
Hata hivyo Mwenyekiti huyo alisema kama umoja huo wanalaani  vikali lugha chafu na za kichochezi zinazopandikizwa  chuki miongoni mwa jamii ya watanzania .

Alisema kuwa kama umoja wa wanawake  wanalaani matusi hayo na kwamba umoja huo  ulifuatilia  mikutano  hiyo na kugundua kuwa ilikuwa imetawaliwa  na  matusi badala ya kutoa sera  kwa wananchi kuwa wanataka kufanya nini.

“Sisi kama umoja wa wanawake  Mkoa tunaeleza umma  ambao una imani na  kuwa katika utamaduni   na maadili  yao hawapendi  na wala hawajazoea kusikia matusi  katika  jamii yao hivyo wakiangalie vizuri na kwa  makini Chadema  kuwa  cha hicho kina  watu  wa maadili gani , mahali  pote  siku zote  na miaka  yote  ni matusi,kuongea uongo, uzushi  na kashfa wasimamapo majukwaani “alisema Mwenyekiti huyo.

Aidha Bi.Mbwaga alisema kuwa wanawake wa mkoa wa Mbeya  wanadhani kuwa kauli ambazo zimetolewa na  Mushumbusi ni  ni za kuwadhalilisha wanawake wote wa Tanzania  kwani Mama Salma ni Kiongozi wa juu pamoja
na Mushumbusi .

“Tunamshangaa sana  Mushumnbusi anaposimama majukwaani na kutoa kashfa nzito za namna hii ni  kama nani kwa wanawake  wa Tanzania 'alihoji Mwenyekiti huyo.

Kwa upande wake Mwenyekiti wa Umoja wa vijana wa Chama cha Mapinduzi Mkoani hapa (CCM),Bw.Amani Kajuna  alisema  kauli aliyotoa Dkt.slaa kuwa Rais Kikwete  ana Udini ni ulaghai  mkubwa  ambao anaufanya kwa wananchi  na kuendelea kuiweka nchi katika mazingira magumu .

“Kama vijana  tunatambua kuwa  Rais Kikwete ni kiongozi wa watanzania, na kwamba hana sifa ya Udini hii ajenda inaanzishwa kisiasa ili kujipatia umaarufu wa bure wa kudhani kuwa ndiyo njia ya kuwapeleka ikulu  mwaka 2015 jambo ambalo halitawezekana ,maana  watanzania hawataweza kukubali" alisema Mwenyekiti huyo.

Hata hivyo Bw.Kajuna aliendelea kusema kuwa Dkt. Slaa amekuwa akimtuhumu  Rais Kikwete kuwa  ni FREEMASON , “hebu tumuulize huyu mtu amekutana lini na Rais kwenye iman hiyo” na kwamba katika uongozi wake watanzania  wameona miradi mikubwa  ya maendeleo ya nchi yetu kwa ukuaji wa wa pato la Taifa.

 

CHANZO:MPEKUZI HURU

Hivi Ndivyo Yanga walivyoitambia Simba Taifa

Beki wa Simba, Musa Mudde (kushoto) akichuana na mshambuliaji wa Yanga, Didier Kavumbagu katika mchezo wa Ligi Kuu ya Soka Tanzania Bara uliofanyika kwenye Uwanja wa Taifa jijini Dar es Salaam, leo. 

Beki wa Simba, Shamte Ramadhani akimtoka mshambuliji wa Yanga, Simon Msuva

Nahodha wa Yanga, Nidir Haroub 'Canavaro' akiwa amenyanyua kombe la Ubingwa wa Ligi Kuu ya Soka Tanzania Bara pamoja na wachezaji wenzake.

Shabiki wa Yanga akipelekwa kupewa huduma ya kwanza baada ya kuzimia wakati mchezo ukiendelea.

Kikosi cha Simba.

Makocha wa yanga wakipanga mikakati ya Ushindi.

Timu zikiingia uwanjani.

Timu zikisalimiana.

Kocha wa Simba, Patrick Liewig

Kocha wa Yanga, Ernst Brandts

Beki wa Simba, Shomari Kapombe akimtoka mshambuliji wa Yanga, Simon Msuva

Msanii Juma Nature akitumbuiza wakati wa mchezo huo. 

Mshambuliaji wa Simba, Felix Sunzu akitafuta mbinu za kuwatoka mabeki wa Yanga. 

Mashabiki wa Yanga.

 Raha ya ushindi.

 Kocha wa Yanga, Ernst Brandts akiwa amebebwa na wachezaji wake.

 Kiduku

KARIBU JANGWANI NGASA

Mashabiki wa Yanga wakiwa wamembeba mshambuliaji wa Simba, Mrisho Ngasa mara baada ya mpira kumalizika, ikiwa ni ishara ya kumkaribisha katika klabu yao. 

Mashabiki wa yanga.

Wachezaji wa timu ya Yanga wakishangilia ubingwa wa Ligi Kuu ya Vodacom baada ya kuifunga Simba 2-0 katika mchezo uliofanyika kwenye Uwanja wa Taifa  jijini Dar es Salaam

Kipa wa Simba, Juma Kaseja akijaribu bila mafanikio kuokoa mpira wa kichwa uliopigwa na mshambuliaji wa Yanga, Didier Kavumbagu katika mchezo wa kufunga pazia la Ligi Kuu ya Soka Tanzania Bara uliofanyika kwenye Uwanja wa Taifa jijini Dar es Salaam.

KARIBU NYUMBANI

Mashabiki wa Yanga wakiwa wamembeba mshambuliaji wa Simba, Mrisho Ngasa mara baada ya mpira kumalizika, ikiwa ni ishara ya kumkaribisha katika klabu yao. 

Refa wa mechi ya Simba na Yanga, Nartin Saanya akiwa chini baada ya kugongwa kwa bahati mbaya na mchezaji wa Yanga, Didir Kavumbagu.

Refa, Martin Saanya akipata matibabu.

 

PICHA ZOTE NA FRANCIS DANDE WA HABARI MSETO

Majina ya wanavyuo walionaswa wakijiuza haya hapa

Wanafunzi wa kike wa chuo kikuu cha Dar es salaam [UDSM],Chuo cha elimu ya biashara [CBE]na chuo cha mamlaka ya Elimu na ufundi  stadi [VETA],Dar es salaam ,wamefikishwa katika mahakama ya jiji samora wakidaiwa kufanya biashara ya kuuza mili yao.

Washitakiwa hao waliokamatwa  katika eneo la kona Baa Ambiance Sinza wilayani kinondoni ambao ni miongoni mwa wanawake 35 wanaodaiwa kufanya biashara hiyo na wote walifikishwa mahakamani hapo.

Kesi hiyo ilikuwa chini ya hakimu Willian Mtaki ambapo muendesha mashitaka,bwana John Kijumbe,alisema wasichana hao walikamatwa katika mazingira tofautitofauti.

Wanafunzi hao ni Yasinta Kilimo mwenye miaka 21 CBE mkazi wa upanga,Morin Masatu miaka 19 UDSM,mkazi wa kinondoni na mwanafunzi wa VETA aliyefahamika kwa jina moja la Khadija.

“Nilikwenda pale baa kuchukua simu yangu ambayo ilipotea hivyo waliniita nikaichukue ndipo askari wa jiji wakanikamata,”Alisema Khadija akijitetea.

Kwa mujibu wa bw. Kijumbe washitakiwa  hao wamekosa dhamana baada ya kushindwa kutimiza masharti ya kila mmoja kuwa na wadhamini wawili au kulipa faini ya kulipa sh. 200,000.

Kesi hiyo inatarajiwa kusikilizwa tena mei 28 mwaka huu,ambapo washitakiwa wote walipelekwa Segerea.

Wakati huohuo, jeshi la Polisi mkoa wa kinondoni , limewakamata watuhumiwa 716 waliokuwa wakijihusisha na biashara ya kuuza miili kati yao wanaume 38 na wanawake 678.

Akizungumza na waandishi wa habari jana, Kamanda wa Polisi mkoa wa kipolisi Kinondoni Charles Kenyela, alisema watu hao walikamatwa kwenye msako uliodumu kwa miezi sita kwenye maeneo mbalimbali ya Kinondoni.

Maeneo hayo ni baa, kumbi za starehe, madanguro, sehemu za wazi katika ufukwe wa Bahari ya Hindi, na makaburini ambapo kati ya wanaume waliokamatwa wengine ni mashoga pamoja na wateja wa machagudoa.

“Msako huo ulifanyika Maisha   Club, Coco Beach, Barabara ya Tunisia , Travertine Hotel, Tandale Uwanja wa Fisi, Ambiance Club, Shekilango pamoja na Mwinanyamala” Alisema

Kamanda Kenyela aliongeza kuwa , jeshi hilo pia limewakamata raia 12 kutoka nchini Ethiopia walioingia nchini bila kibali kati ya Mei 2 na 6, mwaka huu katika eneo la Kimara Mwisho na Tegeta Kibaoni.

Alisema kukamatwa kwao kulitokana na taarifa walizozipata kutoka kwa raia wema waliowaona maeneo.

Credit:Mpekuzi Huru

Mbunge Chadema aanguka ghafla Bungeni

Mhe. Taratibu Abama

MBUNGE wa Viti Maalum, pichani Mwanamrisho Taratibu Abama (Chadema), ameanguka  bungeni, baada ya kujisikia vibaya.

Mbunge huyo alianza kujisikia vibaya, hali iliyomfanya kuketi katika viti vilivyo karibu na zahanati ya Bunge.

Kwa mujibu wa watu walioshuhudia walisema mbunge huyo alipata huduma ya kwanza katika zahanati hiyo kwa zaidi ya saa mbili kabla ya kupelekwa katika Hospitali ya  Rufaa ya Mkoa ya Dodoma.Kwa mujibu wa taarifa kutoka ndani ya hospitali hiyo, zinasema mbunge huyo alilazwa wodi namba 18.

Kaimu Mganga Mfawidhi wa Hospitali ya Rufaa ya Mkoa wa Dodoma, Dk. Zainab Chaula, alithibitisha kupokelewa kwa mbunge huyo.

“Ni kweli yupo hapa  na hali yake inaendelea vizuri sasa ,”alisema.

Bondia Jonas Segu ang'ara Thailand

Jonas Segu akimuadabisha mpinzani wake

Segu akimkong'ota m,pinzani wake

TANZANIA imetengeneza historia mpya kwenye ngumi za kulipwa nchini Thailand baada ya mabondia wake kuwa wanapigwa kila mara wanapokwenda kuiwakilisha nchi na bara la Afrika. Safari hii JEMBE, kijana mtanashati anayeinukia kwenye masumbwi Jonas Segu kutoka katika ukumbi wa mazoezi wa Respect Gym Boxing Club ya Mabibo Loyola chini ya kocha Christopher Mzazi ameonyesha kipaji kikubwa cha kusukuma msumbwi alipoushangaza umati wa maelfu ya wananchi wa Thailand pamoja na nchi za ukanda wa Indo-China.

Segu alikuwa anachuana na bingwa wa IBF katika mara la Asia Pacific Patomsuk Pathompothong kutoka Thailand katika uzito wa Light Welter ambaye ni bondia namba 7 duniani katika viwango vya IBF. Mpambano wao ulifanyika katika jiji lenye mahekalu ya dhahabu la Bangkok na kurushwa na television katika nchi zote za ukanda wa Indo-China za Laos, Myanmar, Cambodia, Vietnam na Thailand yenyewe.

Mpambamo wa Segu na Pathompothong ulianza kwa bondia wa kitanzania kuchomoka kama upinde kwenye kona yake na kumshambulia Pathompothong kwa makonde mazito ya kumshikisha adabu. Segu alitupa makonde ya mchanganyiko na kumzidi Pathompothong kutokana na uzito na umakini wa ngumi zake. Kwa kipindi chote cha raundi ya kwanza ilimbidi Pathompothong ajilinde na kukimbia akizunguka ndani ya ulingo ili kudhoofisha masumbwi ya Segu aliyekuwa anayachanganya kama mashine ya kukomboa mpunga ambao unalimwa kwa wingi nchini Thailand!

Jonas Segu alikuwa chini ya uangalizi makini wa bondia maarufu mstaafu George “Lister” Sabuni ambaye aliweza kumpa maelekezo ya nini cha kufanya kwenye mpambano huo wa mwaka. Katika raundi ya 2, 3 na 4 Segu aliuonyesha umati wa mashabiki wa Thailand kuwa yeye kweli ni bingwa mtarajiwa na hakwenda Thailand kula wali wao ila kuiwakilisha nchi yake ya Jamhuri ya Muungano wa Tanzania. Segu alimhenyesha Pathompothong vilivyo kwa kumchakaza kwa makondde mfululizo hususan akiutumia mkono wake hatari wa kulia ambao ulionekana dhahiri kuwa unaleta madhara makubwa kwa Pathompothong.

Ilididi timu ya wataalam wa Pathompothong kutafakari namna ya kumdhibiti kijana huyo wa Kitanzania ambaye kweli alionekana kuwa alienda Thailand kuuchukua mkanda wa IBF Pan Pacific na sio kufuata ulaji!

Raudi ta 5 Pathompothong aliingia ulingoni akiwa mtu tofauti kabisa akirusha msumbwi mfululizo na kutembea ulingoni kama siafu huku akimvuta Segu kenye kamba ili amkandamizie masumbwi yake. Kijana huyo nadhifu wa kitanzania (mwenye sura nzuri ya kuvutia na ambaye wasichana wengi wa Thailand walishinda karibu na hoteli aliyoshukia ili kuweza kuongea naye) alitumia wakati huo kumwonyesha Pathompothong kuwa yeye hababaishwi na masumbwi yake kwani amefanya mazoezi ya kutosha. Segu alibadilishana masumbi na Pathompothong vilivyo na kuufanya umati wa mashabiki waliojazana kwenye ukumbi huo kumshangilia kama vile yeye ndiye bondia wao wakiimba Tanzania, Tanzania, Tanzania!

Katika raundi ya 6 mabondia wote waliingia ulingoni kama vifaru na kubadilishana masumbwi ya mchanganyiko (combinations) wakitafuta kudhibiti harakati za mpinzani mwenza. Ni katika kubadilishana huku kwa masumbwi ambako Segu aliumizwa mkono na Mthailand Pathompothong. Inawezekana kuwa ni katika juhudi za kumzuia ili asiendelee kurusha masubwi ya nguvu na kudhoofisha nguvu zake.

Kuumia mkono kwa Segu ilikuwa dhahiri kwani mwanzoni mwa raundi ya saba wakati Pathompothong alipokuwa anamiliki ulingo dhidi ya kijana huyo mtanashati wa kitanzania. Katikati ya raundi ya saba Segu aliona kuwa hawezi kuutumia mkono wake vizuri na kumwashiria refarii wa mpambano kuwa anaacha!

Segu aliacha pambano hilo katika raundi ya saba wakati mashabiki wengi katika ukumbi huo wakiwa wanaimba Tanzania, Tanzania, Tanzania kwa jinsi alivyokuwa anapeperusha vyema bendera ya “Jamhuri ya Muungano wa Tanzania”

 

Yanga yazima ngebe za Simba, Toto, Polisi zaungana na Lyon kushuka daraja

Kipa Ally Mustafa 'Barthez' alkidaka penati ya Simba

Didier akishangilia bao lake dhidi ya Simba leo

LICHA ya kutimia ahadi ya kuibuka na ushindi mbele ya watani zao, Mabingwa wapya wa Ligi Kuu ya Tanzania Bara, Yanga imeshindwa kulipa kisasi kwa Simba.
Yana iliyonyukwa mabao 5-0 msimu uliopita na kujitapa kwamba leo ni lazima ingelipa kisasi imeishia kushinda mabao 2-0 na kunogesha ubingwa wao.
Mabao ya kila kipindi yaliyofungwa na nyota wa kimataifa wa Yanga, Didier Kavumbagu na Hamis Kiiza 'Diego' yalitosha kuzamisha jahazi la Msimbazi ambao walipoteza pia penati waliopata.
Kavumbagu aliiandikia Yanga bao la kwanza dakika ya nne kwa kuunganisha mpira wa kona uliopigwa na Haruna Niyonzima kabla yha Simba kupata penati baada ya Ngassa kluchezwa rafu na Mussa Mudde kushindwa kuukwamisha kwa kumlenga kipa Ally Mustafa 'Barthez'.
Bao la pili lilitupiwa kimiani katika dakika ya 63 na Kiiza baada ya kuunganisha krosi iliyomkana na mpira wa kurushwa wa Mbuyi Twite na mabeki wa Simba kuzembea kuruka na Kiiza kufungwa kwa kichwa na kuiandikia Yanga bao lililokata ngebe za kocha msaidizi wa Simba, Jamhuri Kihwelu 'Julio' aliyedai wangeifunga Yanga iwe isiwe kwa ubora wa kikosi chao.
Julio akizungumzia mechi hiyo alisema wanakubali kipigo, lakini wamefurahi kwa kushindwa kulipa kisasi cha mabao 5-0.\
Pamoja na kushindwa kulipa kisasi, lakini Yanga imeendeleza rekodi yake ya kutopoteza mechi yoyote katika duru la pili na ndani ya mwaka 2013.
Katika tukio lililosisimua mashabiki waliokuwa uwanjani ki kitendo cha mwamuzi, Martin Saanya kuanguka wakati akienda kuwaamulia Kavumbangu na Nassoro Masoud 'Chollo' na kufanya pambano hilo kusimama kwa muda ili atibiwe na jingine ni lile la Ngassa kuvishwa jezi ya Yanga na kushangiliwa kwa kubebwa na wanachama wa Yanga walioimba karibu nyumbani.'
Katika mechi nyingine, Toto African na Polisi Moro licha ya kushinda mechi zao za nyumbani dhidi ya Ruvu Shooting na Coastal Union, zimejikuta zikishuka daraja zikiungwana na African Lyon.
Toto iliifunga Ruvu mabao 2-0 kwenye uwanja wa CCM Kirumba na Polisi kuinyoa Coastal 2-0 kwenye uwanja wa Jamhuri Morogoro kwa mabao ya Kenneth Masumbuko na Ally Shomari.
Timu hizo zimeshuka daraja kwa vile Mgambo JKT ikiwa uwanja wa Mkwakwani ikipata ushindi wa bao 1-0 dhidi ya Lyon na kuvikisha pointi 28 ambazo zimeshindwa kufikiwa na Toto na Polisi ambazo zimemaliza na poinbti 25 tu.Nao Mtibwa Sugar imejikuta ikiloa mbele ya JKT Ruvu kwenye uwanja wa Chamazi, huku JKT Oljoro ilikubali kipogo cha bao 1-0 toka kwa Azam kwa bao la Seif Abdallah, na Kagera Sugar kuizamisha Prisons Mbeya kwa bao 1-0 kupitia kwa Paul Ngway alifunga dakika ya 87 katika lililofanyika uwanja wa Sokoine Mbeya na kumaliza kwenye nafasi ya nne nyumba ya Simba.

Msimamo baada ya kumalizika kwa msimu wa 2012-2013:

                             P     W     D     L     F      A     D      Pts
Young Africans     26     18     6     2     47    14    33     60 
Azam                   26     16     6     4     46    20    26     54   
Simba                  26     12     9     5     39    26    13     45
Kagera Sugar       26     12     8     6     28     20     8     44    
Mtibwa Sugar      26     10     9     7      29     25    4     39  
Coastal Union     26      8     11      7     25     24    1     35   
Ruvu Shooting     26      8     7      11     23     28    -5    31    
JKT Oljoro FC   26      7     8      11     22     29    -7     29    
Tanzania Prisons  26      7     8     11     16     23     -7     29   
Ruvu Stars          26      8     5     13     22     39    -17     29
JKT Mgambo     26      8     4     14     17     27    -10     28
Toto Africans      26     5     10    11     24     33     -9     25
Polisi Morogoro  26     5     10    11     15     23     -8     25   
African Lyon       26     5     4     17     16     39     -23    19

Ugaidi? Watano wanaswa na vifaa vya milipuko Dar

Kamanda Kova

WAKATI  hofu ya ugaidi iliyotanda Jijini Arusha hivi karibuni haijatulia, Jeshi la polisi nchini linawashikilia watuhumiwa watano, akiwamo mwanamke mmoja baada ya kuwanasa na vifaa vya milipuko mbalimbali ya hatari eneo la Kunduchi Mtongani jijini Dar es Salaam.

Watuhumiwa hao ni Juma Khalifani (24), Ruben Patrick (26), Happy Charles (28), Sadick Self (32) na Iddi Shaban (40) wote ni wakazi wa Kunduchi Mtongani.

Akizungumza na waandishi wa habari jana jijini,  Kamanda wa Kanda Maalum ya Dar es Salaam, Sulemain Kova, alisema kupitia oparesheni yao walifanikiwa kuwakamata wahalifu hao ambao walikuwa na milipuko hatari kinyume cha sheria.

Alisema kuwa watuhumiwa hao hawana uhalali wa umiliki wa vifaa hivyo hali ambayo iliwapa shaka zaidi juu ya suala hilo.

Kamanda alisema watuhumiwa hao baada ya kukamatwa walifanikiwa kuwakuta na nyaya 62 za milipuko zikiwa zimefungwa betri, vifaa vya kusababisha milipuko zikiwa nane (Supreme Plain detonator), nyaya ndefu mizunguko minne, mabomba 20 ya urefu wa sentimenta 30 ambazo zilijazwa mbolea ya urea na tambi rola moja.

Kova alisema vifaa hivyo ni hatari vikiunganishwa vinaweza kuhatarisha maisha ya watu pamoja na mali zao.

Pia alisema milipuko hiyo hutumika kupasulia miamba na kwamba jeshi la polisi linaendelea na uchunguzi zaidi ili kujua madhumuni halisi ya watuhumiwa hao katika kumiliki vifaa saidizi na milipuko hatari.

Hata hivyo, alisema katika tukio hilo walifanikiwa kukamata dawa za kulevya aina ya bhangi gunia moja.

Kamanda Kova alisema wanashikilia gari aina ya Noah iliyosajiliwa kwa namba T.772 BYC pamoja na bajaji ya miguu mitatu yenye namba T959 BTE ambazo zimekamatwa zikiwa nyumbani kwa mtuhumiwa Sadick Seif ambaye alishindwa kuthibitisha uhalali wa kumilki  vyombo hivyo vya usafiri.

Alisema baada ya upelelezi kukamilika watuhumiwa hao wanatarajiwa kufikishwa mahakamani.
Aidha Kamanda Kova amewataka watu ambao wanatumia milipuko hiyo kujisalimisha kwa haraka lasivyo watachukuliwa hatua kali kwa mujibu wa sheria za usalama za nchi.

Kwa upande wake Kamanda wa Polisi Mkoa wa Kinondoni, Charles Kenyela, alisema kuwa wamejipanga vyema katika suala la oparesheni ili kuwakamata wahalifu wote.

Alisema katika mkoa wake kuna matapeli wa aina mbalimbali na kwamba hivi karibuni kuna watuhumiwa walimtapeli raia wa kichina kumuuzia kiwanja ambacho tayari kilishatolewa hati ya uhalali kwa mtu mwingine.

Kenyela alisema katika tukio hilo wanamshikilia wakili mmoja wa kujitegemea kuhusika katika utapeli huo na kwamba atafikishwa mahakamani hivi karibuni.

Alisema tatizo jingine ni kuwepo kwa raia wa kigeni kuingia nchini bila kuwa na kibali hali ambayo inasababishia kuhatarisha usalama na kwamba tayari wameshachukuliwa hatua.

Pia aliwataka wananchi kutoa taarifa dhidi ya watu wahalifu ili waweze kuchukuliwa hatua

CHANZO: NIPASHE

Cheka amcheka Mwakyembe, kisa...!

Bondia Francis Cheka akiwa na mataji aliyonyakua katika ngumi

Bondia Benson Mwakyembe

BINGWA wa IBF Afrika, Francis Cheka amesema si kwamba anakwepa kukutana na Benson Mwakyembe wa Songea bali bondia huyo hana uwezo wa kupigana naye ulingoni.

Akizungumza na MICHARAZO, Cheka alisema si kweli kuwa amewapiga mabondia wa Dar Es Salaam tu katika maisha yake kwani Karama Nyilawila anatokea Mbeya na Mada Maugo ambaye pia amewahi kupata kipigo kutoka kwake ni wa mkoa wa Mara.

Cheka alikuwa akizungumzia madai ya Mwakyembe ya wiki iliyopita kuwa bondia huyo wa Morogoro amekuwa akikwepa kukutana naye huku akijitapa kuwapiga wachezaji wa Dar Es Salaam tu.

Cheka alisema pia tangu 2008 amewapiga mabondia wa nje ya nchi katika ardhi ya Tanzania bila kupoteza pambano.

"Nyilawila sio wa Dar, maskani yake ni Mbeya, Maugo anatoka Mara, labda Kaseba, Rashid Matumla, Hassani Matumla na Mtambo wa Gongo (Maneno Osward) ndio wa Dar," alisema.

"Ila mimi sikuwa napigana na bondia kimikoa... hii sio michuano ya ridhaa ni ngumi za kulipwa yeyote anayekuja hutambuliwa bondia wa uzito husika na sio eneo analotoka.

"Lazima wanipe heshima yangu kama mabondia bora Tanzania kwa sasa, kama hawamheshimu bingwa wao wanataka wampe nani heshima hiyo?

"Waangalie nimetetea taji la IBF Afrika mara ngapi na kushinda, wapigane wenyewe kwa wenyewe waache nihangaike anga la kimataifa nililete heshima kama alivyofanya Snake Man (Rashid Matumla)," alisema.

Leo ndiyo leo, Simba au Yanga leo Taifa?

Wekundu wa Msimbazi watawapa nijni mashabiki wao kwa Yanga leo?

Vijana wa Jangwani wataweza kulipa kisasi kwa Simba leo Taifa?

LICHA ya kwamba ni pambano la kuhitimishia ratiba tu na hakuna kitakachoweza kubadilisha matokeo kwa timu hizo mbili kwa msimu huu wa 2012-2013, lakini upinzani wa jadi ulioppo baina ya Simba na Yanga ndiyo unaolifanya pambano lao la leo kwenye uwanja wa Taifa kuwa na msisimko mkubwa.
Tambo za timu hizo kutoka kwa viongozi, makocha na wachezaji mbali na mashabiki na wanachama wao kwa karibu wiki mbili mfululizo, wengi wanataka kuziona zinahitimishwa vipi baada ya dakika 90 za mtanange huo ambao utachezeshwa na mwamuzi, Martin Saanya.
Yanga ambao wameshatwaa taji la Ligi Kuu msimu huu wakiwanyang'anya watani zao hao wameapa kutoa kipigo kwa Wekundu wa Msimbazi ili kunogesha sherehe zao za ubingwa, wakati Simba wakipania kuwavurugia sherehe hizo.
Viongozi na makocha wa pande zote mbili wameelea matumaini yao kwa pambano hilo la leo wakiamini kwamba vikosi vyao vitaibuka na ushindi na kuzima ngebe za wapinzani wao.
Yanga wenyewe watashuka dimbani wakitokea visiwa vya Pemba wakati watani zao wanatokea Unguja walipokuwa wameenda kuweka kambi kujiandaa na mechi hiyo ambayo inasubiriwa kwa hamu na mashabiki wakikumbushia pambano kama hilo la msimu uliopita kuwa na matokeo ya aina yake.
Jangwani waliokuwa kwenye mgogoro mkubwa kati ya wanachama na viongozi wao waliaibishwa kwa kunyukwa mabao 5-0 na Simba na kunyang'anywa taji lao huku wakiongezewa idadi ya deni la vipigo baada ya kushindwa kulipa kisasi cha mabao 6-0 walichopewa tangu mwaka 1977.
Safari hii Yanga wapo vyema wana amani na utulivu na wameshanyakua taji la ubingwa mapema, tofauti na wapinzani wao ambao ni hivi karibuni hali imerejea kuwa shwari klabuni kwao.
Simba iliyo chini ya kocha Patrick Liewig kutoka Ufaransa inapewa nafasi kubwa ya kuizima Yanga inayonolewa na Mholanzi, Ernie Brandts kutokana na rekodi nzuri iliyowekwa na kikosi chake cha vijana waliopewa jukumu baada ya 'mafaza' kudengua na kuenguliwa kikosi cha Mfaransa huyo.
Hata hivyo Yanga wanapewa turufu zaidi kwa uimara wa kikosi chao na reklodi yao ya kutopoteza mechi yoyote katika duru zima la pili na mwaka mzima wa 2013 mpaka sasa, huku safu yake ya mbele ikiwa kama wembe na safu yao ya ulinzi kuwa kama zege kwa kutopitika kirahisi.
Lakini kwa soka la Simba na Yanga lenye kila aina ya mbinu lolote linaweza kutokea na pengine burudani wanayoisubiria mashabiki wa timu hizo na soka kwa ujumla kushindwa kuipata kwa nama timu zilivyokamiana.
Timu zote zina wachezaji wazuri wenye vipaji na uwezo mkubwa wa kufanya lolote muda wowote na katika eneo lolote la uwanja, hivyo mashabiki wanapaswa kusubiri kuona kipi kitakachotokea baada ya filimbi ya mwisho ya mwamuzi Saanya toka Morogoro na wasaidizi wake.
Katika pambano la raundi ya kwanza timu hizo zilitoshana nguvu kwa kufungana bao 1-1 na Simba itaingia uwanjani leo ikiwa na kumbukumbu ya mwaka mmoja tangu kiungo wao nyota na aliyekuwa mfungaji wa moja ya mabao yaliyoizamisha Yanga Mei 6 mwaka jana , Patrick Mutesa Mafisango alipofariki kwa ajali ya gari Mei 17, 2012 ambapo inaelezwa wachezaji watavaa vitambaa vyeusi kama ishara ya kumkumbuka.
Pia mashabiki maalum wameandaliwa kwa mechi ya leo wakiwa na jezi namba 30 aliyokuwa akiivaa mchezaji huyo kama ishara ya kumuenzi mkali huyo kutoa DRC, ingawa alikuwa pia na uraia wa Rwanda.
Mbali na pambano hilo la Taifa pia leo kuna mechi nyingine sita katika viwanja vingine zitakazofungia msimu huu, huku masikio na macho ya mashabiki yakielekezwa kwenye mechi inazozihususisha timu zinazopigana kuepuka kushuka daraja inazozihusisha timu za Polisi Morogoro, Toto Africana na Mgambo JKT.
Toto wenyewe watakuwa uwanja wa nyumbani CCM Kirumba kuwakaribisha Ruvu Shooting, kama itakavyokuwa kwa Polisi Morogoro watakaokuwa Jamhuri, Morogoro kuumana na Coastal Union ya Tanga kadhalika Mgambo JKT watakuwa uwanja wa Mkwakwani kuumana na African Lyon iliyoshuka daraja.
Matokeo yoyote ya viwanja hivyo vitatu vitatoa picha halisi ya timu zipi mbili za kuungana na Lyon kucheza Ligi Daraja la Kwanza msimu ujao na kuzipisha rasmi Ashanti United, Mbeya City na Rhino Rangers zilizopanda daraja.
Mechi nyingine za leo za kuhitimishia msimu ni JKT Oljoro watakaowakaribisha washindi wa pili wa ligi hiyo, Azam kwenye uwanja wa Sheikh Amri Abeid, Arusha, JKT Ruvu wataumana na Mtibwa Sugar uwanja wa Chamazi, Dar es Salaam na Prisons Mbeya itaialika Kagera Sugar katika uwanja wa Sokoine Mbeya.
Je, ni Simba au Yanga itakayocheza leo Taifa ama ni Toto, Polisi na Mgambo itakayoungana na Lyon? Tusubiri.

Real Madrid wamaliza msimu kwa aibu Hispania

Wachezaji wa Atletico Madrid wakitanua na taji lao la Mfalme

Ronaldo alipomuumiza Gabi na kuzodolewa akitolewa uwanjani

WALIOKUWA mabingwa wa Hispania, Real Madrid wamemaliza vibaya msimu wa 2012-2013 baada ya kubanjuliwa mabao 2-1 na wapinzani wao, Atletico Madrid katika Fainali ya Kombe la Mfalme, huku nyota wao Cristiano Ronaldo na kocha Jose Mourinho walilimwa kadi nyekundu kwa nyakati tofauti.

Atletico waliokuwa kwenye uwanja wa ugenini wa wapinzani wao, Santiago Bernabeu walipata ushindi huo na kunyakua taji hilo katika muda wa nyongeza kwa mabao ya Diego Costa aliyefunga dakika ya 35 na lile la jioni la jioni la dakika ya 99 kupitia Joao Miranda lilitosha kuikata ngebe za Real waliotangulia kupata bao.

Bao hilo liliwekwa kimiani na Ronaldo dakika ya 14 tu ya mchezo huo kabla ya kujikuta akiishia kutolewa nje na mwamuzi kwa kumpiga mchezaji wa Atletico, gabi kama ilivyokuwa kwa kocha wake ambaye ni mreno mwenzie, Mourinho maarufu kama 'the Only One' a.k.a Special One.

Kipigo hicho kimeifanya Real Madrid kumaliza msimu huu bila taji lolote kutokana nna ubingwa waliokuwa wanaushikili wa Ligi ya Hispania kunyakuliwa na watani zao Barcelona pia kuondolewa kwenye nusu fainali za Ligi ya Mabingwa Ulaya.

Redd's Miss Bagamoyo 2013 kufanyika Mei 24

Rose Lucas, Mshindi wa shindano la Redd's Miss Bagamoyo 2012

JUMLA ya warembo 10 wanatarajiwa kuchuana kwenye shindano la kuwania taji la urembo la mji wa Bagamoyo 'Redd's Miss Bagamoyo 2013' litakalofanyika Mei 24 kwenye ukumbi wa TaSUBA, Bagamoyo.
Mratibu wa shindano hilo ambaye pia ni Mkurugenzi wa kampuni ya Asilia Decoration, Awetu Salim aliiambia MICHARAZO alisema kambi ya mazoezi kwa warembo hao inaendelea mjini humo na kwamba maandalizi kwa ujumla yamekamilika na anatarajiwa fainali za mwaka huu kuwa za aina yake.
Anasema hii inatokana na warembo waliojitokeza safari hii ambao alidai ni vimwana haswa wenye sifa na vigezo vyote na kuwataka mashabiki wa fani hiyo kujitokeza kwa wingi kuhudhuria.
Awetu aliongeza kuwa katika kusindikiza shindano hilo siku hiyo ukumbi kutakuwa na burudani mbalimbali za muziki na ngoma asilia toka kwa wasanii na makundi tofauti akiwamo mwanadada Aisha Ramadhani a.k.a Isha Mashauzi na bendi yake ya Mashauzi classic, muziki wa kizazi kipya kutoka kwa Chuo cha Sanaa(tasuba), ngoma ya kabila la wakwere wenyeji wa Bagamoyo na nyinginezo.

MSAM kuwaaga wenzao kwa harambee ya ujenzi wa msikiti

Jengo la Chuo cha Kumbukumbu ya Mwl Nyerere linavyoonekana kwa mbali

NA MWANDISHI WETU

UMOJA wa Wanafunzi wa Kiislam Chuo cha Kumbukumbu ya Mwalimu Nyerere (MSAM) kilichopo Kigamboni  Jijini  Dar es Salaam unaomba wadau mbalimbali kujitokeza katika mahafali ya kuwaaga wanafunzi wa kiislam wanaomaliza chuo ambayo yataambatana na harambee ya uchangiaji  wa fedha za ujenzi wa msikiti chuoni hapo.

Ombi hilo limetolewa na Katibu Mkuu wa MSAM Abdullatif Jafari wakati akizungumza na mwandishi wa habari hivi karibuni Jijini Dar es Salaam.

Jafari alisema chuo kimewapa  ruhusa ya kutafuta mdhamini wa ujenzi wa msikiti kwa kipindi kirefu ila hadi sasa hawajapata mafanikio kwani baadhi ya wahisani wamekuwa wakiaahidi bila mafanikio pamoja na ukweli kwamba MSAM imekuwa ikiteleza maagizo yao kila wanapohitaji.

Alisema matarajio yao ni kuhakikisha kuwa wanapata kiasi cha shilingi milioni mia moja za kuanzia ujenzi hivyo basi wanaaomba watu wenye nia nzuri kwa vijana wa kiislam wanaoishi maeneo ya chuo waweze kufanikisha zoezi hilo mapema.

Katibu huyo alisema wanafunzi wamekuwa wakichanga mara kwa mara ila juhudi zao zimekwama hivyo wanaomba mtu, taasisi yoyote yenye uweze kuwasaidia ujenzi wa msikiti huo ili waweze kumuabudu mungu kwa amani na kwa wakati.

’’Jumamosi ijayo tunawaaga wenzetu wanaomaliza hivyo basi tunataka kutumia fursa hiyo kuweza kuchangisha fedha za ujunzi wa msikiti nadhani nao watakuwa wameacha alama Fulani katika haarakati hizi’’, alisema.

Jafari alisema iwapo tutapata ushirikiano kutoka kwa wadau mabalimbali nchini tunaamini kuwa upo uwezekano mkubwa wa kufanikisha zoezi hilo mapema na dhana ya kufikiria mtu mmoja tutaondokana nayo.

Alisema ni vema jamii ikatambua kuwa kufanikisha ujenzi huo itakuwa imechangia msaada mkubwa katika kujenga imani na maadili ya vijana ambao wanasoma katika chuo hicho cha Kumbukumbu ya Mwalimu Nyerere Kigamboni.

Aidha Katibu huyo alitoa rai kwa wale wote wenye nia ya kuchangia ujenzi huo wa msikiti na hawataweza kufika wanaweza kutoa michango yaao kwa njia za M Pesa 0766656730, Tigo Pesa 0713774828 au akaunti namba ya jumuiya Muslim Students Association of Mwalimu Nyerere (MSAM) 3300825636 Kenya Commercial Bank Samora Avenue.