Shaa abadili Sifa Ujinga kwa Subira

WIMBO mpya wa mwanadada Sarah Kais 'Shaa' unaofahamika kwa jina la 'Sifa Ujinga' unatarajiwa kuachiwa hadharani mwezi ujao ukiwa umebadilishwa jina na kuitwa 'Subira'.
Mmoja wa mabosi wa msanii huyo, Said Fella 'Mkubwa' aliliambia MICHARAZO kuwa, wadau waliousikiliza wimbo huo ndiyo waliotoa mapendekezo ya kubadilishwa kwa jina ili kuweza kuwa na mvuto kwa wasikilizaji.
Fella alisema kwa sasa wanafanya mipango ya kukamilisha video ya wimbo huo wa pili kwa Shaa chini ya lebo ya Mkubwa na Wanae aliyoingia nayo mkataba wa miezi sita ili kazi hiyo iachiwe rasmi mwishoni mwa Februari.
"Wimbo wa Shaa uitwao 'Sifa Ujinga' utaachiwa mwezi ujao lakini ukiwa na jina jipya la 'Subira' baada ya wadau wetu kuusikiliza na kupendekeza jina hilo jipya ambalo nasi tumeliafiki," alisema.
Shaa, nyota wa zamani wa Coca Cola Pop Star akishinda nchini na kuunda kundi moja na wasanii wenzake Witness na marehemu Langa na kuliita Wakilisha alitaoa 'Sugua Gaga' chini ya lebo hiyo Mkubwa na Wanawe.
Kabla ya hapo staa huyo wa nyimbo kadhaa ukiwamo wa 'Promise' alikuwa akifanya kazi chini ya umeneja wa prodyuza mkongwe wa muziki wa kizazi kipya nchini, Joacqim Kimario 'Master J'.

Sikinde kupeleka Kibogoyo wao Meeda Club-Sinza Mori

BENDI kongwe ya muziki wa dansi ya Mlimani Park 'Wana Sikinde' kwa mara ya kwanza  inatarajiwa kutambulisha nyimbo zao mpya ukiwamo 'Kibogoyo' na 'Kukatika kwa Dole Gumba' kwa mashabiki wao wa Sinza na vitongoji vya jirani.
Mlimani inayoendelea kufanya mipango ya kukamilisha albamu yao mpya tangu walipotoa albamu ya mwisho mwaka 2010 watatambulisha nyimbo hizo katika ukumbi maarufu wa Meeda Club, uliopo Sinza Mori.
Katibu wa bendi hiyo, Hamis Mirambo aliiambia MICHARAZO baada ya maombi ya muda mrefu toka kwa mashabiki wao wameamua kupeleka burudani yao kwa mashabiki hao wa Sinza Mori ambapo watazitambulisha nyimbo zote zitakazokuwa katika albamu yao ijayo pamoja na kukumbushia nyimbo za zamani zilizoifanya Sikinde kuwa Mabingwa wa Muziki wa Dansi Tanzania.
Mirambo alisema baadhi ya nyimbo mpya zitakazotambulishwa katika onyesho hilo maalum ni pamoja na 'Jinamizi la Talaka', 'Kibogoyo', 'Kukatika kwa Dole Gumba', 'Deni Nitalipa' na 'Nundu ya Ng'ombe'.
"Pia tutawapigia karibu nyimbo zetu zote za miaka ya nyuma tangu miaka ya 1970 mpaka zile za miaka ya 2000 pamoja na kuwaonyesha jinsi ya kucheza 'Nginde' kwani naamini mashabiki hao watakuwa wamesahau kutokana na kipindi kirufu kutopeleka burudani katika eneo hilo," alisema.
Mirambo alisema, anaamini mashabiki watakabahatika kufika katika onyesho hilo watapata burudani ambayo wameikosa kwa muda mrefu pamoja na kuwaona 'live' wanamuziki wakongwe ambao pengine baadhi ya mashabiki wamekuwa wakiyasikia majina yao kwa miaka mingi iliyopita na ikiwezekana watapiga nao picha kwa ajili ya ukumbusho.
"Fikiria mtu kama Hassani Reheni Bitchuka, Habib Jeff, Ally Jamwaka, Yusuf Benard, Mjusi Shemboza, Othman Mbaraka na wengine wana miaka mingi katika fani hii na majina yao yamekuwa yakisikika, lakini baadhi ya mashabiki wa sasa wa dansi pengine hawawajui kabisa hivyo ni fursa yao kuwaona na kupiga nao picha za ukumbusho," alisema Mirambo anayepuliza tarumbeta katika bendi hiyo.

Mbwana Samatta Mchezaji Bora wa TP Mazembe 2013

Samatta akiokota mpira nyavuni baada ya kutupia

MSHAMBULIAJI Nyota wa Kimataifa wa Tanzania anayeichezea TP Mazembe, Mbwana Samata, amechaguliwa kuwa mchezaji bora wa mwaka 2013 wa klabu hiyo ya DR Congo.
Mbwana alipata kura nyingi zaidi, kuwashinda wenzake, ambao kwa mujibu wa tovuti ya TP Mazembe, yeye alipata pointi 248, huku nafasi ya pili ikishikwa na Asante Solomon aliepata kura 219.
Ulikuwa ni mwaka wa mafanikio pia kwake, pia akiwa na kumbukumbu ya kutajwa kati ya wachezaji ambao wanawania tuzo za Wachezaji wanaocheza barani Afrika, nakuchujwa baadae.
Zaidi ya hiyo, ameisaidia timu yake ya TP Mazembe katika michuano ya ndani na kimataifa, bila kusahau msaada pia aliuutoa kwa timu yake ya Taifa ya Tanzania, Taifa Stars.

Kaseba kurejesha Ligi ya Kick Boxing

BINGWA wa Taifa wa Ngumi za Kulipwa anayetambuliwa na PST, Japhet Kaseba 'Champion', amesema yupo katika mikakati ya kuirejesha tena ligi ya mchezo wa kick boxing aliyoianzisha siku za nyuma kabla ya kusimama.
Ligi hiyo iliyokuwa ikishirikisha mabingwa wa mikoa mbalimbali nchini ilisimama miaka miwili iliyopita baada ya Kaseba kujikita zaidi kwenye mchezo wa ndondi.
Akizungumza na MICHARAZO, bingwa huyo wa zamani wa dunia wa kick boxing alisema, ligi hiyo ilikwama awali kutokana na kukosa wadhamini na kitendo cha yeye kuelekeza nguvu zake kwenye mchezo wa ngumi.
Kaseba alisema kutokana na kutambua kwamba hakuna aliyejitokeza kuuendeleza mchezo huo nchini ameamua kujipanga upya ili kuirejesha ligi hiyo.
"Nipo katika mchakato wa kutaka kuirejesha tena ligi ya kick boxing ambayo ilianza kujizolea sifa kwa kukutanisha vipaji kutoka sehemu mbalimbali za nchi, nahangaika kwa sasa kusaka wadhamini kabla ya kuitangaza rasmi," alisema.
Kaseba alisema mmoja wa wadhamini ambao anatarajiwa kuwavaa kuwaomba wamsaidie kurejesha ligi hiyo ni Eric Shigongo wa Global Publishers, aliyedai ni kati ya wadau wakubwa wa michezo nchini anayeamini atamsaidia.
Mkali huyo alisema anaamini akipata wadhamini itamsaidia kuongeza msisimko kwenye ligi hiyo iliyochezwa mfululizo kwa miaka mitatu kabla ya kuzimika kimya kimya.
Kabla ya kutumbukia kwenye ngumi, Kaseba ndiye aliyekuwa bingwa wa mchezo huo nchini na kufanikiwa kunyakua ubingwa wa dunia wa WKL na WCL.

Fainali CHAN 2014 ni Ghana v LIbya, Nigeria kuwania mshindi wa tatu

Add caption

BLACK Stars ya Ghana usiku wa kuamkia leo iliifuata Libya iliyokuwa imetangulia hatua ya fainali baada ya kuichapa kwa mikwaju ya penati mahasimu wao, Nigeria katika pambano la nusu fainali lililokuwa kali na la kusisimua.
Ghana ilipenya hatua hiyo baada ya kumaliza dakika 120 na wapinzani wao wakiwa nguvu sawa kwa kutofungana kabla ya kuishinda kwa mikwaju ya penati 4-2.
Pamoja na kucheza pungufu kwa kumpoteza beki wake Adusei baada ya kuonyeshwa kati ya pili ya njano na kuunganishiwa nyekundu, lakini iligangamala na kuibana Nigeria ambayo ilipewa nafasi kubwa ya kuwa mabingwa wapya wa CHAN-2014.
Baada ya dakika 90 kumalizika Ghana wakipwa pungufu na kuongezwa dakika 30 Black Stars walikomaa mpaka hatua ya matuta ambayo ilishuhudiwa vijana wa Stephen Keshi wakipachika mkwaju mmoja kati ya penati tatu walizopiga, mbili zikishindwa kuingia kimiani.
Wafungaji wa penati za Ghana walikuwa Akuffu, Anobaah, Ainooson na Attobrah, huku ile ya Super Eagles ikifungwa na Uzoenyi na zile za Kwambe na Uzochukwu zikikosa macho.
Kwa matokeo hayo Ghana itakwaruzana na Libya usiku wa Jumamosi, na Nigeria itapepetana na Zimbabwe katika pambano la jioni ya siku hiyo na kufungwa pazia la michuano hiyo ambayo taji halina mwenyewe baada ya Tunisia kukwama kwenda Afrika Kusini.