DRFA yapongezwa kuzawadia klabu RCL

Mwenyekiti wa DRFA, Almas Kasongo (kushoto) akimkabidhi mmoja wa viongozi wa timu tatu walizozipa msaada wa fedha kushiriki vyerma katika RCL. Tukio ambaklo wadau wa soka wamelipongeza.

WADAU wa soka mkoa wa Dar es Salaam wamekipongeza chama cha soka mkoa huo (DRFA) kwa kitendo chake cha kuzizawadia timu zake tatu zilizofuzu Ligi ya Mabingwa (RCL) wakidai ni kitendo kigeni kuwahi kufanywa na chama hicho kwa miaka mingi iliyopita.
Uongozi wa DRFA ulizipa fedha timu hizo wakiwamo mabingwa Red Coast, Abajalo na Friends Rangers kwa kufanya vyema kwenye Ligi Daraja la Pili, ili kuzisaidia kufanya vyema kwenye  ushiriki wao wa Ligi ya Mabingwa wa Mikoa, iliyoanza juzi Jumapili.
DRFA iliwapa mabingwa wa mkoa huo Red Coast Sh. 700,000 na washindi wa pili Abajalo (Sh 600,000) huku walioshika nafasi ya tatu Friends Rangers wakiwapa Sh. 500,000.
Mmoja wa wadau walioipongeza DRFA kwa kitendo hicho ni Onesmo Waziri 'Ticotico' wa klabu ya Golden Bush FC, ambaye alisema kilichofanywa na uongozi mpya wa mkoa wao ni kigeni na kinachoonyesha uongozi huo ulivyo na dhati ya kuinua soka la mkoa huo.
Uongozi huo mpya wa DRFA uliingia madarakani mwishoni mwa mwaka jana baada ya kufanyika uchaguzi mkuu uliomaliza miongo kadhaa ya utawala wa aliyekuwa kiongozi mwandamizi wa chama hicho, Amin Bakhresa aliyeenguliwa mapema kwa kukosa sifa.

Casillas wa Mtibwa aikana Simba

Kipa Husseni Sharrid 'Casillas' akiwa mazoezini

GOLIKIPA wa kutumainiwa wa klabu ya Mtibwa Sugar, Hussein Sharrif 'Casillas' amekanusha ripoti kwamba yupo mbioni kujiunga na Simba mwisho wa msimu huu.
Sharrif alisema taarifa kwamba ameshakutana na baadhi ya viongozi wa Simba ili kumalizana nao anazisikia na kuzisoma kwenye magazeti na mitandaoni tu, lakini hakuna kitu kama hicho.
Akizungumza na MICHARAZO jana, kipa huyo aliyeng'ara msimu huu kiasi cha kuitwa na kocha Mdenmark Kim Poulsen katika kikosi cha timu ya taifa (Taifa Stars), alisema hajui uvumi huo unatokea wapi wakati hajawahi kukutana wala kuzungumza na viongozi wa Simba.
"Hakuna kitu kama hicho siyo kiongozi wa Simba wala wa Yanga ambao nimewahi kukutana na kuzungumza nao juu ya mustakabali wangu wa soka kwa msimu ujao, sasa sijui hizi taarifa zinatokea wapi. Mimi ni mchezaji wa Mtibwa na nitabaki Mtibwa," alisema Sharrif.
Alisema kwa sasa akili yake ipo katika mechi yao ya mwisho dhidi ya JKT Ruvu ili kuisaidia Mtibwa imalize katika Nne Bora ili ifuzu kucheza Ligi ya Super8.
"Suala la usajili kwa sasa halipo kichwani kwangu, nawaza namna nitakavyoisaidia Mtibwa Sugar imalize msimu vizuri," alisema Sharrif.
Kipa huyo ni miongoni mwa wachezaji 30 walioitwa kwenye kikosi cha Young Taifa Stars kitakachotumika kupata wachezaji wa kuitumikia Taifa Stars, ambayo wakati ikijiandaa na pambano lao dhidi ya Morocco kipa huyo pia alijumuishwa japo hakucheza.
Sharrif aliyewahi kung'ara na Villa Squad kabla ya kunyakuliwa Mtibwa Sugar, amelazimika kutoa ufafanuzi huo baada ya kuzagaa habari kupitia vyombo vya habari kwamba alikuwa katika mipango ya kuhamia Msimbazi baada ya kuzibania Simba na Yanga kwenye ligi msimu huu.

Kaseba kuzipiga na Mmalawi, aahidi kushinda

BONDIA machachari wa ngumi za kulipwa anayeshikilia taji la ubingwa wa taifa nchini, Japhet Kaseba anatarajiwa kupamba ulingoni mwezi ujao kuzipiga na Mmalawi Rasco Simwanza katika pambano la kimataifa la uzito wa kati.
Kwa mujibu wa Rais wa Shirikisho la Ngumi za Kulipwa Tanzania (PST) litakalosimamia pambano hilo, Emmanuel Mlundwa, mabondia hao  watapigana Juni 8 jijini Dar es Salaam na watasindikizwa na michezo kadhaa ya utangulizi yatakayowakutanisha mabondia kadhaa.
Hilo litakuwa pambano la kwanza la kimataifa kwa Kaseba tangu aliporejea kwenye mchezo huo akitokea kwenye Kick Boxing ambapo aliwahi kutwaa ubingwa wa Dunia unaotambuliwa wa WCL na WKL.
Mlundwa alisema maandalizi yote ya pambano hilo lililoandaliwa na kampuni ya Tan Academy, yanaendelea vyema na kwamba mashabiki wasubiri kupata burudani siku ya mpambano huo.
Mapambano ya utangulizi kwa siku hiyo itawakutanisha Juma Fundi dhidi ya Moro Best, Ibrahim Mahokola atakayepamba na  Kamanda wa Makamanda, Juma Seleman dhidi ya Issa Omar, na Ignas atakayeonyeshana kazi na Karega Suba.
Michezo mingine ni kati ya Jackie Hamis dhidi ya Kadani Chamwana, Aman Machuga dhidi ya Muhidini 'Ndolanga', Joseph Mbowe atakayepigana na Abdallah Mohammed na Kais Ramadhani atakayepepetana na Mikidadi Tyson.
Kaseba aliiambia MICHARAZO kwamba amejiandaa vyema kwa ajili ya pambano hilo kutokana na mazoezi anayoyafanya na kiu yake ya kutaka kujenga heshima katika ngumi kama alivyofanya kwenye Kick boxing.
"Nimeajiandaa vyema na kama nilipoahidi nilipotangaza kurejea kwenye ngumi naamini nitashinda pambano hilo na kuendelea kutamba ndani na nje ya nchi," alisema Kaseba anayefahamika zaidi kimichezo kama 'Champion'.

Imani za Kishirikina nusura livunje pambano la fainali 'mchangani'

wanaodaiwa watu wa 'kamati ya Ufundi' wakionyesha yao

Kikosi cha Manunda Fc

Kikosi cha G West walioibuka kidedea

PAMBANO la fainali la kugombea 'Kombe la Mbuzi' na Jezi kati Manunda Fc na G-West lililofanyika juzi kwenye uwanja wa Msisiri A, Mwananyamala nusura lishindwe kufanyika kutokana na vimbwanga vya vitu hizo kukataa katakata kubadili jezi zilizokuwa zikirandana kwa madai kwamba tayari zilishapitia kwa 'Babu'.

Licha ya jtihada ya mwamuzi na watu wenye ushawishi, kuzibembeleza timu hizo kukubaliana na pendekezo la waamuzi timu moja kubadili jezi, hakuna upande uliokubali na kumfanya mwamuzi kuafiki maamuzi ya timu hizo ili kuhofia kuvunja fainali hiyo iliyosisimua.

Pambano hilo liliishia kwa timu ya G West kuibuka mabingwa kwa njia ya mikwaju ya penati 4-2 baada ya dakika za kawaida matokeo yakiwa bao 1-1.

Wafungaji katika muda huo wa kawaida walikuwa Msimbe aliyeifungia Manunda kwenye dakika 43 na bao la kuwasawisha na wapinzani wao lilifungwa na Mome dakika 9 kabla ya mechi kumalizika.

Mbali na kimbwanga cha kugomea kubadilisha jezi hizo zilizofanana pambano hilo pia lilighubikwa na mambo ya kishirikina baada ya wachezaji wawili wa G-West kuanguka uwanjani kwa imani za kuzidiwa na majini, huku mashabiki kuvunja nazi na mayai kwa imani za ushirikina na wachezaji wa G-West kunyweshwa maji yaliyochanganywa na majani mithili ya Alovera badala ya maji ya kawaida na timu yao kuibuka mabingwa kwa mikwaju hiyo ya penati.