Mizengo Pinda kuzindua albamu ya Family Singers Dec 7

Mkurugenzi wa kikundi cha uimbaji wa muziki wa Injili cha Family Singers, Daniel Masheto Jr akizungumza na wanahabari leo juu ya uzinduzi wa albamu yao utakaofanyika Desemba 7

Mwenyekiti wa Family Singers, Jonas Danny akifafanua jambo kwa wanahabari (hawapo pichani) wakati akitangaza uzinduzi wa albamu yao uya pili ya 'Usilie' utakaofanyika Des 7 katika ukumbi wa PTA.

Bango lenyewe na uzinduzi huo

Kikundi chetu hatuimbi tu muziki wa Injili pia tunajitolea kuihudumia jamii. Mkurugenzi Masheto Jr akitoa ufafanuzi

WAZIRI Mkuu, Mizengo Pinda anatarajiwa kuwa mgeni rasmi katika uzinduzi wa albamu ya 'Usilie' ya kundi la waimbaji wa muziki wa injili la Family Singers.
Uzinduzi huo unatarajiwa kufanyika Desemba 7, mwaka huu kwenye Ukumbi wa PTA maarufu kama Sabasaba, Temeke jijini Dar es Salaam na kusindikizwa na waimbaji wa muziki wa Injili na kwaya mbalimbali na wasanii wa Bongo Movie.
Akizungumza jana jijini Dar es Salaam, Mkurugenzi wa kundi hilo, Daniel Misheto Jr, alisema hiyo ni albamu yao ya pili baada ya awali kutamba na ile ya 'Machozi Yatafutwa' na kwamba waziri mkuu ndiye atakayekuwa mgeni rasmi baada ya kuwasiliana naye na kuwathibitishia atakuwapo siku ya uzinduzi huo.
Misheto alisema kundi lao mbali na kushughulika na masuala ya uimbaji wa muziki wa Injili, pia limekuwa likijitolea kwa jamii kwa kutoa huduma mbalimbali ikiwamo ya afya na kwamba hata siku ya uzinduzi huo kutakuwa na huduma ya afya bure kwa wananchi kuanzia saa mbili asubuhi hadi saa sita mchana kabla ya kupisha huduma ya uimbaji itakayoongozwa na wasanii mbalimbali.
"Tunatarajia kuzindua albamu yetu ya pili iitwayo 'Usilie' na shughuli hiyo itafanyika Desemba 7 katika Ukumbi wa PTA na Waziri Mkuu, Mizengo Pinda ndiye atakayekuwa mgeni rasmi na viongozi mbalimbali wamealikwa na tutasindikizwa na wasanii kadhaa akiwamo Leah Mudy, AIC (T) Vijana Chang'ombe, Martha Mwaipaja na wengine kutoka nje ya nchi," alisema.
Naye Mwenyekiti wa Family Singer Jonas Danny, aliwahimiza wananchi kujitokeza kwa wingi siku hiyo kwa ajili ya kupata huduma ya afya itakayoendeshwa na madaktari 20 kutoka hospitali za Muhimbili,  Dk Kairuki na IMTU.

Mcheza Kriketi mahututi baada ya kupigwa na gongo uwanjani

MCHEZA Kriketi nyota wa nchini Australia, Phil Hughes yupo mahututi akiipania roho yake hospitalini mjini Sydney baada ya kugongwa kichwani na gongo la kuchezea mchezo huo wakati wa mechi ya Sheffield Shield.
Nyota huyo aliyeichezea mechi yake mechi 26 Australia ikiwemo michuano mitatu ya Ashes, amefanyiwa upasuaji na yupo kwenye kitengo cha wagonjwa walio katika uangalizi maalum.
Hughes, 25, aliyeichezea Australia Kusini dhidi ya Wales Kusini mpya katika michuano ya Sydney Cricket Ground (SCG), alipigwa na gongo hilo akiwa na helmet kichwani na Sean Abbott kabla ya kupoteza fahamu na kukimbizwa hospitali.
Mara baada ya tukio hilo mchezaji huyo alizimia uwanjani na kuwafanya madaktari kuharaakisha kumwahisha hospitalini alipofanyiwa upasuaji huyo, lakini inaelezwa hali yake bado tete na mamia wa mashabiki wake wakiendelea kumuombea apate nafuu haraka.

Sepp Blatter azidi kuandamwa FIFA

RAIS wa Shirikisho la Soka Duniani, FIFA, Sepp Blatter ameendelea kuandamwa baada ya Rais wa  Ligi ya Soka ya Ujerumani-DFL, Reinhard Rauball kumtaka rais huyo kujiuzulu nafasi yake.
Rauball alikaririwa na gazeti la Kicker akidai kuwa anadhani wakati wa Blatter kuachia nafasi hiyo umefika kutokana na kashfa mbalimbali ambazo zimeendelea kuliandama shirikisho hilo.
Kashfa ambayo inaiandama shirikisho hilo kwa sasa ni kuhusu ripoti ya uchunguzi ya Michael Garcia yenye kurasa 430 ambayo FIFA imegoma kuichapisha kwa kuogopa kukiuka sheria.
Rauball amesistiza kuwa kashfa hiyo inayohusu mchakato wa kutafuta wenyeji wa michuano ya Kombe la Dunia mwaka 2018 na 2022 inapaswa kumpelekea Blatter kujiuzulu ili kulinda heshima ya michuano hiyo. Michuano hiyo imepangwa kufanyika Russia na Qatar.
Rauball alifafanua kuwa jambo hilo kabla ya kuzungumza na vyombo vya habari alimpigia simu Blatter na kumueleza mawazo yake kuhusiana na hilo

Messi ndiye baba lao Ulaya, apiga hat trick ya 31

MSHAMBULIAJI nyota wa Argentina, Leonel Messi amevunja rekodi ya mabao katika Ligi ya Mabingwa Ulaya baada ya kuiongoza Barcelona kupata ushindi mnono wa mabao 4-0 ugenini mjini Nicosia, Cyprus katika mfululizo wa michuano hiyo.
Messi ambaye amekuwa gwiji wa kuvunja rekodi zilizowekwa na wanasoka wenzake, alifunga 'hat trick' iliyomfanya kufikisha mabao 74 katika michuano hiyo na kumpita aliyekuwa akishikilia rekodi ya mabao mengi katika michuano hiyo Raul aliyekuwa na mabao 71.
Nyota huyo wa Barcelona alikuwa akilingana na Raul baada ya kufunga mabao mawili dhidi ya Ajax mapema Novemba, lakini 'hat trick' hiyo ya 30 katika maisha yake ya soka yalimfanya awapiku wachezaji wote.
Messi alifunga mabao hayo katika dakika ya 38 akimalizia kazi nzuri ya Rafinha, ambalo lilikuwa bao la pili la timu yake baada ya mapema kwenye dakika ya 27 Luis Suarez kufungua akaunti yake ya mabao katika klabu hiyo aliyojiunga nayo msimu huu akitokea Liverpool, alipofunga bao la kuongoza akimalizia kazi nzuri ya Jordi Alba.
Nyota huyo anayeshikilia rekodi kibao katika ulimwengu wa soka ikiwamo wa kuwa Mfungaji Bora wa La Liga akiwa na mabao 253, alifunga mabao mengine mawili katika dakika za 58' na 87 kwa kumalizia pasi za wachezaji wenzake, Dani Alves na Pedro.
Ushindi huo umeifanya Barcelona kushika nafasi ya pili katika kundi lake la F wakiwa na pointi 12, moja pungufu na vinara wa kundi hilo PSG ambayo ilipata ushindi mnono nyumbani dhidi ya Ajax katika mfululizo wa michuano hiyo ya Ulaya.
Akizungumza na Waandishi wa Habari baada ya mechi Messi amesema: "Nina furaha sana kuvunja rekodi hususan katika mashindano muhimu kama haya, lakini huu ulikuwa mchezo mkubwa kwetu mbali na rekodi zote," amesema.
Mshindi huyo mara nne wa tuzo ya Mwanasoka Bora Duniani, mwenye umri wa miaka 27, kwa mabao yake dhidi ya APOEL yamemfanya afikishe jumla ya mabao 371 akiwa na kikosi cha Barcelona, mbali na mabao 45 aliyonayo akiifungia timu yake ya taifa ya Argentina.
Naye Suarez aliyefunga bao lake la kwanza kwa Barcelona tangu aliposajiliwa kwa kitita cha pauni Mil. 75 alinukuliwa baada ya pambano hilo akisema kuwa anajisikia vizuri kufunga bao hilo.
"Kawaida ni muhimu kwa mshambuliaji kufunga mabao pamoja na kwamba kipaumbele ni kucheza vizuri kwa ajili ya timu. Lakini unajisikia vizuri kupiga bao,"amesema nyota huyo wa Uruguay.
Katika michezo mingine iliyochezwa juzi, Chelsea walipata ushindi mnono ugenini baada ya kuifumua Schalke 04 ya Ujerumani kwa mabao 5-0, huku mkongwe Didier Drogba alifunga bao moja kuthibitisha kuwa bado wamo.
Mabao mengine ya vinara hao wa Uingereza, ambayo imeendeleza rekodi yao ya kucheza mechi mfululuizo bila kupoteza msimu huu yaliwekwa kimiani na nahodha John Terry, Willian, Jan Kirchhoff aliyejifunga, na Ramires.
Ushindi huo wa Chelsea inayofundishwa na Mreno Jose Mourinho, umeihakikishia timu hiyo kwenda hatua ya mtoano kutoka kundi G baada ya kufikka pointi 11, ikifuatiwa na Spoting Lisbon ya Ureno ikijiweka pazuri katika nafasi ya pili baada ya kuinyuka Maribor 3-1.
Matokeo Kamili:
CSKA Moscow     1-1 Roma
BATE  0-3     Porto
Manchester City     3-2 Bayern Munich
APOEL  0-4 Barcelona
PSG     3-1 Ajax
Schalke 04 0-5 Chelsea
Sporting 3-1 Maribor
Shakhtar Donetsk 0-1 Athletic Bilbao
=======

Coastal Union yaita nyota wake Tanga

UONGOZI wa mabingwa wa zamani wa soka nchini, Coastal Union walioanza mazoezi jijini Tanga kujiandaa na Ligi Kuu Tanzania Bara, imewachimba mkwara nyota wake kwa kuwapa muda wa wiki moja wawe wameripoti kambini kabla ya kuchukuliwa hatua.
Aidha klabu hiyo imesema haina mpango ya kufanya usajili wowote kwenye dirisha dogo la usajili linaloendelea kwa sababu kikosi chao kimekamilika kila idara.
Katibu Mkuu wa klabu hiyo, Kassim El Siagi, aliliambia MICHARAZO kuwa, mapumziko ya wiki mbili waliyowapa wachezaji wao walishaisha na timu kuanza mazoezi chini ya makocha wao Wakenya Yusuf Chipo na Ben Mwalala, lakini ni idadi ndogo tu ya wachezaji walioripoti kwenye kambi ya mazoezi na kuufanya uongozi wao kutoa muda wa wiki moja kwa wachezaji hao kuripoti haraka.
"Tumeshanza mazoezi na tumetoa hadi wiki moja kwa nyota wote wawe wamesharipoti, kwa sababu timu inatarajiwa kucheza mechi kadhaa za kirafiki za kujipima nguvu kabla ya kuikabili ligi kuu," alisema.
El Siagi alisema kwa mujibu wa kocha wao, klabu hiyo haihitaji kufanya usajili wowote kwenye dirisha dogo kwa sababu wachezaji waliopo wanakidhi kila idara.
"Hatutaongeza mchezaji yeyote kwenye dirisha dogo, kwa sababu idara zote za wachezaji katika kikosi chetu zimekamilika," alisema.
Coastal waliotwaa ubingwa wa Tanzania mwaka 1988 inakamata nafasi ya nne kwenye msimamo wa Ligi Kuu Tanzania Bara msimu huu ikiwa nyuma ya timu za Mtibwa Sugar, Yanga na Azam baada ya kukusanya pointi 11 kutokana na mechi saba ilizocheza.

Kipusa cha Kaole Kwanza kuanza kurushwa Jan 4

Mwenyekiti wa kundi la Kaole Kwanza, Thea

KUNDI la Kaole Kwanza linaloundwa na wasanii wa zamani wa Kaole Sanaa linatarajiwa kuanza kurusha tamthilia yao mpya iitwayo 'Kipusa' Januari 4, mwakani.
Mwenyekiti wa kundi hilo, Misayo Ndimbagwe 'Thea' aliliambia MICHARAZO mapema leo kuwa, tayari wameshakamilisha kila kitu juu ya kuanza kurushwa kwa igizo hilo ambalo limewashirikisha wasanii mbalimbali nyota nchini akiwamo Bi Hindu, Muhogo Mchungu, Davina, Kipemba, Nyamayao, Bi Staa, Bi Terry, Swebe na wengine.
Thea alisema kituo kimojawapo nchini ndicho kilichopewa jukumu la kuanza kurushwa kwa igizo hilo ambalo lilizinduliwa mapema mwaka huu mbele ya wadau ambao walitoa maoni yao kwa ajili ya kuboreshwa.
"Tumekamilisha kila kitu na tamthilia yetu itaanza kurushwa mapema mwakani na kituo kimoja cha hapa nchini, hivyo mashabiki wajiandae kupata uhondo walioukosa kwa muda mrefu," alisema Thea.
Aidha, Thea alidokeza kuwa baada ya igizo hilo kuanza kurushwa hewani wataanza mchakato wa kuzalisha filamu zao ambazo zitaanza kuingia sokoni kuanzia Februari.
"Tumepania kuwapa uhondo mashabiki wa fani ya uigizaji, baada ya igizo kuanza kurushwa tutaanza kazi ya kurekodi filamu zetu ambazo zitakuwa sokoni kuanzia Februari," alisema Thea, mmoja wa nyota wa filamu aliyepata jina kubwa kupitia Kundi la Kaole Sanaa

Edin Dzeko azidi kuipa presha Man City

MSHAMBULIAJI wa klabu ya Manchester City, Edin Dzeko yupo katika hatihati ya kukosa pambano la nchi yake Bosnia-Herzegovina dhidi ya Israel kuwania kufuzu Fainali za Ulaya kutokana na kupata jeraha akiwa na timu hiyo ya taifa.
Mfumania nyavu huyo aliumia vibaya msuli wa kigimbi katika mguu wake wa kulia na Daktari wa timu ya taifa ya Bosnia-Herzegovina Reuf Karabeg amesema Dzeko, 28 anatarajiwa kukosa mchezo huo.
Karabeg alikaririwa akidai kuwa nyota huyo ameumia vibaya na atahitaji matibabu ambayo yatachukua muda mpaka kuja kupona.
Dzeko amefunga mabao manne katika mechi 17 katika kikosi cha City msimu huu lakini mpaka sasa ameshacheza mechi nane bila kufumania nyavu na kuumia kwake kutazidi kumtia tumbo joto kocha Manuel Pellegrini kutokana na kikosi cha timu yake kusuasua katika Ligi Kuu ya England na Ligi ya Mabingwa Ulaya ikiwa mguu ndani mguu nje kutupwa mashindanoni.

Make Money at : http://bit.ly/best_tips

Bonny Mwaitege Soma Mwanangu!

Bonny Mwaitege

MUIMBAJI nyota wa muziki wa Injili, Bonny Mwaitege ameachia wimbo mpya uitwao 'Soma Mwanangu' ukiwa katika miondoko ya Reggae alioimba na mkali mwenzie Bahati Bukuku.
Kwa mujibu wa Mwaitege anayetamba na nyimbo za 'Utamjuaje', 'Mama', 'Mke Mwema' na nyingine wimbo huo umerekodiwa kwa Kameta.
Ndani ya wimbo huo, inasimulia kisa cha Baba anayemhimiza mwanae kusoma kwa bidii na kuacha kucheza ili kujenga mustakabali wa maisha yake ya baadaye na familia yao kwa ujumla.
"Baba yako napenda mwanangu kusoma....Maisha bila kusoma ni magumu...mama yako pia anapenda mwanangu usome..."

AFCON 2015 ipo haipo? Morocco yajivua rasmi

SHIRIKISHO la Soka Afrika, CAF limetangaza kusaka mwenyeji mpya wa michuano ya Kombe la Mataifa ya Afrika, AFCON, baada ya nchi ya Morocco kuigomea.
CAF sasa inatarajiwa kutangaza mwenyeji mpya wa kuandaa michuano hiyo baada ya Morocco kushikilia msimamo wake wa kutoandaa kwa hofu ya Ebola.
Hata hivyo hofu imetanda kwamba huenda michuano hiyo isiwepo kabisa kwa mwaka ujao kutokana na nchi kadhaa zilizoombwa kuandaa kuchomoa.
CAF inafanya mazungumzo na nchi za Algeria, Angola, Equatorial Guinea, Ghana, Afrika Kusini na Misri, ambapo nchi za Ghana na Afrika Kusini zilishaonyesha kutokuwa tayari kubeba mzigo huo. 
Kwa hali hiyo ni kwamba hata mechi za kuwania kufuzu fainali hizo zilizosalia miongoni mwa timu zinazocheza makundi zinaweza zisiwe na maana yoyote.
Timu zinazochuana katika hatua ya makundi zilitarajiwa kushuka dimbani wikiendi hii kabla ya kumalizia mechi zao za mwisho wiki ijayo ambapo timu 15 zitafuzu kuungana na wenyeji wake.
Mpaka sasa nchi za Algeria na Cape Verde zimeshafuzu hatua hiyo baada ya kung'ara katika makundi yao kabla mechi hazijafikia tamati.

Hatimaye Steve Nyerere afichua kilichomkimbiza Bongo Movie

Steve Nyerere

Steve Nyerere alipochanguliwa kuwa Mwenyekiti wa Bongo Movie akiwa na viongozi wenzake kabla ya kujiuzulu hivi karibuni

ALIYEKUWA Mwenyekiti wa Bongo Movie, Steve Nyerere amefichua kilichomkimbiza kwa kujiuzulu katika Umoja huo wa Waigizaji wa filamu.
Akizungumza na MICHARAZO jana, Steve Nyerere ambaye majina yake kamili ni Steven Mengele alisema, misimamo yake ya kutetea na kujenga nidhamu katika umoja huo sambamba na kuweka mizani sawa kwa wasanii wanachama ndicho kilichomponza, mbali na tofauti za kiitikadi za kisiasa baina yake na viongozi wenzake.
Steve Nyerere alisema baadhi ya viongozi wenzake walikuwa wakimuona kama alikuwa akiitumia Bongo Movie kujijenga kisiasa, bila kujua umaarufu wake kwa baadhi ya viongozi na wanasiasa wameisaidia Bongo Movie kuwaomboleza na kuwazika wasanii wenzao bila ya aibu licha ya umoja huo kutokuwa na fedha.
"Unajua nilikuwa najenga nidhamu na kutaka kila mwanachama kujiona sawa ndani ya Bongo Movie, hilo halikuwapendeza wenzangu na kuanzisha majungu, wakati naingia hakukuwa na akaunti wala fedha, lakini tumeweza kuwazika bila ya kutia aibu wenzetu, Rachel Haule 'Recho', Adam Kuambiana na George Otieno 'Tyson," alisema.
Muigizaji huyo alisema licha ya kujivua uenyekiti, bado anaendelea kuwa mwanachama muaminifu wa Bongo Movie na kuwa tayari kujitolea kwa jambo lolote, licha ya kukiri kwamba ni vigumu kuondoa itikadi zake kwa CCM, kama ambavyo hawezi kumuingilia Prof Jay ambaye ni rafiki yake kwa uaminifu na mapenzi yake kwa CHADEMA.
"Ni mambo madogo madogo ambayo wenzangu wameshindwa kuyavumilia kwa sababu ya kiitikadi na misimamo ya kuwajali hata wasanii chipukizi mradi ni wanachama wa Bongo Movie, lengo likiwa kujenga misingi imara ya kundi hilo hata wale wazoefu watakapokuwa wameachana na fani hiyo," alisisitiza.
Steve Nyerere alisema yeye atakuwa tayari kutoa ushauri na mambo mengine ya maendeleo hata akiwa nje ya uongozi kwa nia ya kuhakikisha Bongo Movie inafika mbele na katu hana kinyongo na yeyote.

Super Nyamwela amaliza Yangele

DANSA kiongozi wa bendi ya Extra Bongo, Hassan Mussa 'Super 'Nyawela' amekamilisha 'audio' na video ya wimbo wake mpya uitwao 'Yangele Yangele' anaojiandaa kuutambulisha kwa mashabiki wakati wowote kuanza sasa.
Akizungumza na MICHARAZO jana, Nyamwela alisema wimbo huo umetengezwa kwenye studio za C9 Records  na vuideo yake imefanywa na Mkenya anayefahamika kwa jina la Yfeel.
Nyamwela alisema amechelewa kuitambulisha 'ngoma' yake hiyo kutokana na kuwa kwenye majonzi mazito ya kuondokewa na mama Mlezi wao, Mama Shuu, aliyekuwa Mke wa Mkurugenzi wa bendi yao, Ally Choki.
"Tumetoka kumaliza 40 ya Mama Shuu jana (juzi), tuliamua kupumzika kabisa masuala ya muziki kuomboleza kifo cha mama yetu na sasa tumerejea upya, nikiwataka mashabiki wangu wajiandae kuipokea kazi yangu mpya ya 'Yangele Yangele' ambayo imekamilika 'audio' na video yake," alisema Nyamwela.
Kabla ya kazi hiyo, dansa huyo wa zamani wa bendi ya African Star, alikuwa akitamba na nyuimbo kama 'Duvele Duvele', 'Tumechete', Maneno Maneno' na nyingine zilizokuwa katika albamu zake mbili za awali za 'Master of the Tample' na 'Afrika Kilomondo'.

Oscar aongezwa miaka 5 zaidi Darajani

Oscar

KLABU ya Chelsea imetangaza kumuongeza mkataba mpya wa miaka mitano kiungo wake mahiri Oscar. Kiungo huyo wa kimataifa wa Brazil amekuwa sehemu muhimu ya kikosi cha Chelsea toka alipojiunga nao akitokea klabu ya Internacional ya Brazil mwaka 2012.
Oscar, 23 amecheza mechi 15 na kufunga mabao manne katika mashindano yote msimu huu akiwa na Chelsea ambao hawajafungwa mpaka sasa.
Nyota huyo aliuambia mtandao wa klabu hiyo kuwa anafurahi kusaini mkataba mpya kwani anafurahia kuitumikia Chelsea na kuishi nchini Uingereza.
Sasa Oscar ambaye ameitumikia Brazil mechi 40 na kufunga mabao 11, ataendelea kuwepo Stamford Bridge mpaka mwaka 2019.

Marefa 23 wateuliwa kushiriki semina ya FIFA

WAAMUZI 23 wa daraja la kwanza wakiwemo wenye beji la Shirikisho la Kimataifa la Mpira wa Miguu (FIFA) wameteuliwa kushiriki semina itakayofanyika Novemba 16 mwaka huu jijini Dar es Salaam.
Washiriki wa semina hiyo ambayo pia itakuwa na mtihani wa utimamu wa mwili (physical fitness test) wanatakiwa kuripoti Novemba 15 mwaka huu kwenye hosteli ya Shirikisho la Mpira wa Miguu Tanzania (TFF) iliyopo Uwanja wa Kumbukumbu ya Karume.
Wakufunzi wa semina hiyo wanaotambuliwa na Shirikisho la Mpira wa Miguu Afrika (CAF) ni Riziki Majala na Soud Abdi.
Waamuzi watakaoshiriki semina hiyo ni Ahmed Juma Simba (Kagera), Arnold Bugado (Singida), Charles Peter Simon (Dodoma), Dalila Jafari Mtwana (Zanzibar), Ferdinand Chacha Baringenge (Mwanza), Florentina Zabron (Dodoma) na Frank John Komba (Pwani).
Grace Wamara (Kagera), Hellen Joseph Mduma (Dar es Salaam), Israel Mujuni Nkongo (Dar es Salaam), Issa Bilali Ali (Zanzibar), Issa Haji Vuai (Zanzibar), John Longido Kanyenye (Mbeya), Jonesia Rukyaa Kabakama (Kagera) na Josephat Deu Bulali (Tanga).
Kudra Omary (Tanga), Martin Eliphas Saanya (Morogoro), Mary Kapinga (Ruvuma), Mfaume Ali Nassoro (Zanzibar), Mgaza Ali Kinduli (Zanzibar), Samwel Hudson Mpenzu (Arusha), Soud Iddi Lila (Dar es Salaam) na Waziri Sheha Waziri (Zanzibar).

Taifa Stars yawasili salama 'Bondeni'

KIKOSI cha wachezaji 23 wa Taifa Stars tayari kimewasili Johannesburg, Afrika Kusini tayari kwa maandalizi ya mechi dhidi ya Kalenda ya Shirikisho la Kimataifa la Mpira wa Miguu (FIFA) dhidi ya Swaziland.
Mechi hiyo itafanyika Jumapili (Novemba 16 mwaka huu) kwenye Uwanja wa Taifa wa Somhlolo jijini Swaziland. Taifa Stars inayodhaminiwa na Kilimanjaro Premium Lager itakuwepo Johannesburg hadi Ijumaa itakapoondoka kwenda Mbabane.
Wachezaji wote walioitwa na Kocha Mart Nooij wapo kwenye msafara huo isipokuwa kiungo mshambuliaji Mrisho Ngasa ambaye amebaki Dar es Salaam kutokana na matatizo ya kifamilia.
Taifa Stars inatarajia kurejea nyumbani Jumatatu (Novemba 17 mwaka huu) saa 12.45 jioni kwa ndege ya South Africa Airways.
Wakati huo huo, kikosi cha maboresho cha Taifa Stars kitacheza mechi ya kirafiki na timu ya Taifa ya Rwanda kwa wachezaji wenye umri chini ya miaka 23. Mechi hiyo itachezwa Desemba 9 mwaka huu nchini Tanzania.
Kikosi cha maboresho cha Taifa Stars kinachoundwa na wachezaji wenye umri chini ya miaka 23 kitakuwa kinakutana mara moja kila mwezi hadi Mei mwakani kwa ajili ya mazoezi na kucheza mechi moja ya kirafiki.
Kocha Mart Nooij atatangaza kikosi kwa ajili ya mechi hiyo na programu nzima mara atakaporejea kutoka Swaziland.

TCRA yawafunda Bloggers kuhusu Uchaguzi Tanzania

Mkurugenzi wa Mamlaka ya Mawasiliano Tanzania, TCRA, Prof John Nkoma akifungua mkutano dhidi yao na Bloggers

Maafisa wa TCRA wakiwa makini kufuatilia mkutano huo leo Mlimani City

Wana Blogu wakiwa makini ni Peter Mwenda na Super D

Mkongwe Beda Msimbe alikuwa makini kufuatilia mada iliyowasilishwa katika mkutano huo

Wana Blogu wakifuatilia

Wanahabari waandamizi wakijadiliana wakati wa mkutano huo

 

 

Injinia Andrew Kasaka akiwasilisha mada ya Muongozo wa Utangazaji wa Uchaguzi

Mkurugenzi wa Idara ya Habari Maelezo, Assa Mwambene akizungumza wakati wa kufunga mkutano huo

Assa Mwambene akizungumza na wanablogu

Viongozi wa Kamati ya Muda ya Chama cha Wamiliki wa Blogu

Mwenyekiti Joacquim Mushi (kati) akiwa na viongozi wenzake

 

William Malecela mmoja wa jumbe wa Kamati ya Muda wa Wamiliki wa Blogu

Mwenyekiti Mushi akizungumza na wanablogu baada ya kuteuliwa kuongoza chama hicho

Wa Micharazo Mitupu naye alikuwapo kupata ujuzi zaidi

MAMLAKA ya Mawasiliano Tanzania, TCRA wamekutana na wamiliki wa mitandao ya kijamii (bloggers) na kuwapa semina juu ya misingi ya kuendesha mitandao yao kipindi cha chaguzi zijazo.
Mkutano huo wa pamoja umefanyika kwenye ukumbi wa mikutano ya Mlimani City, ambapo Afisa Mwandamizi wa Utangazaji wa TCRA, Injinia Andrew Kasaka, aliwasilisha mada maalum.
Katika uwasilishaji wake, Injinia Kasaka alisema ni vyema wamiliki wa Blogu kuzingatia miiko, maadili ya taaluma ya habari kutokana na ukweli blogu zimekuwa na mchango mkubwa katika fani hiyo.
Aidha aliwahimiza wamiliki wa mitandao hiyo kuwa na uzalendo ili kuepusha kutumiwa na kuvuruga amani na utulivu wa nchi kama ilivyowahi kutokea katika mataifa mengine.
"Pia aliwataka wamiliki hao kusajili blogu zao ili watambulike na kuwa rahisi katika kuaminika, sambamba na kuahidi kuendesha semina zaidi mikoani katika Kanda zao za TCRA kuwapa elimu wamiliki juu ya kufahamu mipaka inayowazunguka.
"Mnapaswa kuzingatia kuandika na kuchapisha Habari zenye ukweli, zisizoumiza wengine na zenye kuchochea maendeleo ya nchi sambamba na kuelimisha, kuhabarisha na kuburudisha, kwa sababu blogu zina nguvu kubwa kwa sasa katika teknolojia ya Mawasiliano," alisisitiza Injinia Kasaka.
Kabla ya kuwasilishwa kwa mada, Mkurugenzi Mkuu wa TCRA, Prof John Nkoma, alisema mamlaka hiyo imehitisha mkutano huo baada ya kubaini nguvu kubwa zilizopo kwa mitandao hiyo baada ya awali kufanya mkutano kama huo kwa vyomo vya habatri ya utangazaji kwa maana ya redio na televisheni.
Naye Mkurugenzi wa Idara ya Habari na Mawasiliano, Assa Mwambene alieleza namna ya baadhi ya mitandao ya kijamii inavyotumia uhuru uliopo kwa kujadili vitu ambavyo havijengi.
"Serikali tuliamua kuwahabarisha wananchi juu ya kuumwa kwa Rais na kwenda kutibiwa nje, lakini taarifa hii imekuwa chanzo cha mijadala isiyo na tija, kitu ambacho hakipendezi," alisema.
Aliongeza kuwa "Hatuko hapa kwa ajili ya kutaka kuwabana maana mnaweza kusema Mwambene anatoka serikalini hivyo labda ndiye niliyotoa wazo hili, hapa tunataka kusaidia kuendesha blogu zenu kwa umakini," alisema Mwambene wakati akifunga mkutano huo.
Pia alisistiza mitandao ya kijamii na wanahabari kutumia vyema uhuru wa habari kuepuka kuleta uchochezi au mambo yatakayoivuruga nchi akisema "Uhuru bila mipaka ni hatari".
Katika uchangiaji wa mada wanablogu walipendekeza kuwepo na utaratibu wa mikutano kama hiyo na elimu zaidi kwa wale ambao hawana taaluma ya habari kuepuka kuingia matatani kwa kutoa taarifa ambazo wakati mwingine huwa hazina ukweli na zinazoumiza.
Katika mkutano huo uliunda Kamati ya Muda ya Chama cha Bloggers, ambacho kinaongozwa na Mwenyekiti Joacquim Mushi, Makamu wake akiwa Francis Godwin, Katibu akiwa Khadija Kalili na wajumbe ni Aaron Msigwa, Shamim Mwasha, Henry Mdimu,  William Malecela na na Othman Maulid.
Baadhi wa wajumbe walitoa maoni yao na kusema semina hiyo ni nzuri ila hawajui ni vipi imekuja wakati huu wa kuelekea kwenye uchaguzi na siyo wakati mwingine wowote.
Hata hivyo hofu ilitolewa mapema na Prof Nkoma wakati akijibu maswali ya watu waliotaka kujua iweje kanuni hizo ziguse uchaguzi tu na kuelekeza mipaka ya blogu kufanya kazi zao.

Hakunaga kama Cristiano Ronaldo Hispania

Ronaldo na moja ya Di Stephano

Ronaldo na tuzo zake

Akikabidhiwa tuzo ya Pichichi na Rais wa Atletico Madrid

MSHAMBULIAJI nyota wa Real Madrid, Cristiano Ronaldo amezidi kung’ara baada ya kukabidhiwa tuzo yake ya. Mfungaji Bora wa La Liga 'Pichichi' sambamba na ile ya Mchezaji Bora wa La Liga maarufu kwa jina la Di Stefano ikiwa ni mara ya tatu mfululizo tangu mwaka 2011 alipompoka mshindani wake kwa sasa dunia, Lionel Messi aliyekuwa akiishikilia kwa miaka miwili mfululizo pia.

Tuzo hizo alikabidhiwa na Rais wa Atletico Madrid Enrique Corezo, huku akisema ilikuewa huzuni kwa Alfredo Di Stefano kutukuwepo katika makabidhiano ya tuzo hiyo. Gwiji hilo la Real Madrid alifariki Julai mwaka huu akiwa na miaka 88.

WASHINDI:

TUZO YA PICHICHI

2009-10 Lionel Messi

2010-11 Cristiano Ronaldo 

2011-12 Lionel Messi

2012-13 Lionel Messi

2013-14 Cristiano Ronaldo 

TUZO YA DI STEFANO:

2009-10 Lionel Messi

2010-11 Lionel Messi

2011-12 Cristiano Ronaldo

2012-13 Cristiano Ronaldo

2013-14 Cristiano Ronaldo  

Rais JK anaendeleas vyema Marekani

HALI ya Rais wa Jamhuri ya Muungano wa Tanzania,  Dkt. Jakaya Kikwete aliyepo Maryland Marekani kwa ajili ya matibabu, inaendelea vizuri na ameanza mazoezi ya kutembea ikiwa ni siku ya pili tangu afanyiwe upasuaji wa tezi dume.

Kurugenzi ya Mawasiliano Ikulu imetoa taarifa hiyo na kuongeza kuwa itaendelea kutoa taarifa kadri hali yake itakavyokuwa inaendelea.

Kupitia ukurasa wa Instagram wa mtoto wa Rais Kikwete, Miraj Kikwete (@kikwete) ameweka picha muda mfupi uliopita inayomwonyesha Rais pamoja na maneno haya;- “… #26464 #we #good TABASAMU TU LEO . thank you everyone for your endless support, love and prayers. It means so much to Dad, myself and our family. You are a strength to us. TUNAWASHUKURU KWA KUJALI ….“

48, wengi wakiwa wanafunzi wauwawa kwa bomu Nigeria

WATU wapatao 48 wameuwawa katika shambulizi la bomu la kujitoa muhanga katika shule moja huko kaskazini mashariki mwa Nigeria wengi wao wakiwa wanafunzi.
Mlipuko huo ulitokea jana Jumatatu katika mji wa Potiskum katika jimbo la Yobe wakati wanafunzi wakiwa wamekusanyika kwenye uwanja wa shule katika shule mioja ya sekondari ya serikali.
Wafanyakazi wa huduma wanasema watu wapatao 79 walijeruhiwa katika mlipuko huo , wengi wao wameumizwa vibaya . Magaidi wanasema mlipuaji huyo alivaa kama mwanafunzi. VOA

Taifa Stars yapaa kwenda Afrika Kusini

Wakali wa Tanzania, Taifa Stars

KIKOSI cha timu ya taifa, Taifa Stars, kimeondoka alfajiri ya leo kuelekea Afrika Kusini kwa ajili ya kambi ya siku chache kabla ya kwenda kuvaana na Swaziland katika pambano la kirafiki la kimataifa linalotambuliwa na Shirikisho la Soka Dunia, FIFA litakalochezwa Novemba 16 mjini Mbabane nchini humo.
Kikosi cha wachezaji 24, benchi la ufundi na viongozi wengine wameambatana na timu hiyo kwa ajili ya kuhakikisha wanaendeleza rekodi nzuri dhidi ya Swaziland.
Stars mara ya mwisho kwenye mechi ya kimataifa waliifumua Benin mabao 4-1 uwanja wa Taifa na kuifanya timu hiyo ipae kwenye orodha ya viwango vya kimataifa vya soka vya FIFA.
Hata hivyo timu hiyo imekuwa na matokeo mabaya nje ya nchi kulingananisha ikiwa nyumbani kwani kabla ya kuvaana na Benin ilitoka kunyukwa mabao 2-0 na Burundi katika mchezo wa kirafiki wa kimataifa uliochezwa mjini Bunjumbura.

Rasmi, michuano yaota mbawa 2014

Kenya wataendelea kubaki na taji lao la Chalenji

BAADA ya Ethiopia kuchomoa uenyeji wa michuiano ya Kombe la Chalenji 2014 na Baraza la Vyama vya Soka Afrika Mashariki na Kati, CECAFA kuiomba Sudan kuokoa jahazi, imethibitika safari hii haitakuwapo.

CECAFA imekwama kupata mwenyeji mpya baada ya Sudan nao kukataa ombi hilo.

Michuano hiyo ilitarajiwa kuanza Novemba 24 hadi Desemba 9, mwaka huu huko Ethiopia bingwa mtetezi akiwa ni Kenya.

Katibu Mkuu wa Baraza la Vyama vya Soka vya Afrika Mashariki na Kati (Cecafa) Nicholas Musonye, alisema baada ya Ethiopia kujitoa, imekuwa ngumu kupata nchi mbadala ya kuandaa michuano kwa haraka.

“Hatukupenda, lakini imeshindikana kabisa, tulifanya kila juhudi lakini mambo yamekuwa ni magumu,” alisema Musonye.

Alisema  imekuwa ngumu kupata wadhamini pia kwani waandaaji walijitoa dakika za mwisho, hali iliyowachanganya.

Arsene Wenger 'alivulia' kofia Chelsea

Chelsea inayomkuna Wenger

Kocha wa Arsenal, Arsene Wenger

KASI ya klabu ya Chelsea imemfanya, kocha wa Arsenal, Arsene Wenger kukiri kwamba hakuna klabu yoyote kwa sasa inayoweza kuisimamisha wakali hao wa Darajani.
Wenger amenukuliwa akisema kuwa hakuna timu inayoweza kuwapata vinara wa Ligi Kuu Chelsea msimu huu kwa jinsi ilivyo katika kiwango cha kuvutia zaidi.
Arsenal walichapwa mabao 2-1 ugenini na Swansea City juzi na kuteleza nyuma zaidi ya Chelsea ambao hawajafungwa msimu huu kwa tofauti alama 12.
Chelsea wameshinda michezo yao tisa kati ya 11 msimu huu na kujikusanyia alama 29, nne zaidi ya Southampton wanaoshika nafasi ya pili katika msimamo huo, ambao wamekuwa na mafanikio makubwa tofauti na ilivyotarajiwa na wengi baada ya kumpoteza kocha na wachezaji karibu 10 nyota waliosajiliwa timu mbalimbali za Ligi Kuu ya England.
Katika mahojiano, Wenger amesema kama Chelsea wakiendelea na makali yao hayo hadhani kama kuna timu ya kuwashika msimu huu kwani inaonekana hakuna timu inayoweza kupambana nao kwa sasa.
Chelsea walipambana na kuhakikisha wanatoka nyuma na kuifunga Liverpool mabao 2-1 katika Uwanja wa Anfield Juzi na Wenger anaamini kikosi chao kimejitengenezea hali ya kujiamini.
Hata hivyo kocha huyo aliwahi kunukuliwa wiki chache zilizopita akisema ni ngumu kwa Chelsea kuweza kufikia rekodi yao ya msimu wa 2003-2004 waliocheza mechi 49 bila kupoteza kwa madai ni mapema mno.

Yaya, Enyeama, Gervinho kuwania tuzo ya BBC

Yaya Toure akiwa na tuzo ya BBC aliyotwaa mwaka jana, mwaka huu ataibuka tena kidedea?

YAYA Toure, Kiungo nyota wa kimataifa wa Ivory Coast na klabu ya Manchester City ameteuliwa tena kwa mara ya sita mfululizo kugombea tuzo ya Mchezaji Bora wa mwaka wa Afrika inayotolewa na Shirika la Utangazaji la Uingereza, BBC. 
Yaya ambaye pia Mwanasoka Bora wa Afrika, ameteuliwa kutetea tuzo hiyo ya BBC pamoja na Emerick Aubameyang kutoka Gabon na klabu ya Borussia Dortmund, Yacine Brahimi kutoka Algeria, Vincente Enyeama wa Nigeria na Gervinho wa Ivory Coast. 
Katika orodha hiyo wachezaji wanne walicheza katika michuano ya Kombe la Dunia iliyofanyika nchini Brazil ambapo kwa mara ya kwanza katika historia timu mbili kutoka Afrika zilifanikiwa kuvuka hatua ya makundi. 
Golikipa Enyeama alicheza katika hatua ya timu 16 bora katika michuano hiyo akiwa na Nigeria wakati Brahimi naye alifikia hatua hiyo akiwa na timu yake ya taifa ya Algeria. 
Yaya licha ya kutofanikiwa kuivusha nchi ya Ivory Coast hatua ya makundi ya Kombe la Dunia yeye na Gervinho wamekuwa na msimu mzuri katika vilabu vyao hivyo kuwapata nafasi ya kuwepo katika orodha hiyo. 
Yaya ameisaidia City kunyakuwa taji lake la pili la Ligi Kuu katika kipindi cha miaka mitatu wakati Gervinho amekuwa sehemu muhimu ya kikosi cha AS Roma toka alipondoka Arsenal kwa kuifungia timu hiyo mabao 10 katika mechi 39 za Serie A. 
Kwa upande wa Aubameyang pamoja na kutocheza Kombe la Dunia kwa sababu ya nchi yake ya Gabon kutofuzu michuano hiyo amewekwa katika orodha hiyo kutokana na kuwa katika kiwango kizuri katika klabu yake ya Borussia Dortmund ya Ujerumani. 
Mshindi wa tuzo hiyo natarajiwa kutangazwa Desemba mosi mwaka huu.

Make Money

TCRA, Wanablogu kutetea asubuhi hii

MAMLAKA ya Mawasiliano nchini Tanzania, TCRA, asubuhi hii inatarajiwa kuteta na wamiliki wa mitandao ya kijamii ili kupeana miongozo kuelekea chaguzi zilizopo mbeleni.
Mkutano huo wa pamoja unatarajiwa kuanza saa 3 asubuhi kwenye ukumbi wa Mlimani City, jijini Dar es Salaam ambapo kwa mujibu wa 'bango' la TCRA lengo kuu ni kupeana muongozo wa kuandika taarifa za uchaguzi wa serikali za mitaa na ule wa mkuu wa Rais, wabunge na madiwani.
Hata hivyo mbali na hilo, pia mkutano huo utatoa muongozo kwa wanablogu mingine juu ya kuzingatia maadili na miiko ya taaluma ya mawasiliano.
Kwa kipindi kirefu baadhi ya mitandao na blogu zimekuwa zikiweka taarifa au picha zinazokiuka maadili ya taaluma pamoja na miiko na desturi za kitanzania.
Nini kitakachojadiliwa na kuamuliwa, MICHARAZO itawajuza wasomaji wake bila ya shaka!