Simba chali Kaitaba, Azam ikitakata Dar

WAKATI wawakilishi pekee wa Tanzania katika michuano ya Kimataifa, Azam wakitaka jijini Dar kwa kuigaragaza Prisona ya Mbeya kwa mabao 3-0, mabingwa watetezi Simba wamejikuta wakiangukia pua mjini Kagera baada ya kudunguliwa bao 1-0 na wenyeji wao Kagera Sugar.
Azam walipata ushindi huo kwenye uwanja wake wa nyumbani wa Chamazi, na kuweza kupunguza pengo la pointi kati yao na vinara wa Ligi Kuu Tanzania Bara, Yanga wanaoongoza wakiwa na pointi 48.
Mabao mawili na kinara wa ufungaji bora kwa sasa Kipre Tchetche na moja ya John Bocco 'Adebayor' yalifanya Azam ikifikishe pointi 40 na kuweka matumaini ya kuikamata Yanga ambayo haikushuka dimbani leo.
Bao la kwanza la Azam lilifungwa na Kipre katika kipindi cha kwanza kabla ya Bocco kuongeza la pili kipindi cha pili na Kipre kuongeza bao la tatu dakika za jioni na kuifanya Azam kutakata kabla ya kuvaana na Barrack YCII watakaorudiana nao katika mechi ya Kombe la Shirikisho Afrika siku ya Jumamosi.
Wakati Azam wakimeremeta Dar, mabingwa watetezi wa Ligi Kuu, Simba yenyewe walikiona cha mtema kuni baada ya kulambwa bao 1-0 na Kagrea Sugar katika pambano jingine lililochezwa uwanja wa Kaitaba, mjini Bukoba.
Bao la sekunde chache baada ya kuanza kwa kipindi cha pili lililofungwa kwa kichwa na beki Amandus Nesta akiiunganisha kona ya Salum Kanoni iliifanya Kagera kufika pointi 34 sawa na Simba.
Hata hivyo Kagera imekamata nafasi ya nne kutokana na kuzidiwa uwiano wa mabao ya kufunga na kufungwa na Simba ambao wamezidi kuwasononesha mashabiki wao ambao wamekuwa hawana raha kwa timu yao kuwa na matokeo mabaya msimu huu tofauti na matarajio yao.
Ushindi huo wa Kagera imekuwa muendelezo wa kuvinjuka 'vigogo' kwenye uwanja wake wa nyumbani kwani hata Yanga walipoenda mjini humo walipigwa bao 1-0 na kuibua tafrani kwa waandishi wa habari waliotuhumiwa kuhujumu pambano hilo.
Kagera mbali na kuikamata Simba kiponti pia imeziengua timu za Mtibwa Sugar na Coastal Union ambazo sasa zimeporomoka katika nafasi walizokuwa wakizishikilia hadi nafasi ya tano na sita badala ya zile za nne na tano walizokuwa wakishikilia awali.
Baada ya kipigo hicho Simba inatarajiwa kusafiri mpaka jijini Mwanza kuvaana na timu ya Toto Africans ambayo huwa inawasumbua kwenye dimba la CCM Kirumba.

KIDO AMTAKA TENA MCHUMIATUMBO

 

Bondia mbavu nene Ramadhan Kido anamta tena mbavunene mwenzake Alphonce mchumiatumbo warudiane baada ya pambano lao la mwanzo lilofanyika uwanja taifa kuchapwa amepania kulipa kisasi ,”mchumiatumbo amenifanya nimeshindwa kulala kwa muda mrefu nikimfikiria yeye kanipigajepigaje jibu sipati,nimeamua kurudi tena ulingoni kwa kujipima na musa mbabe jumapili ya tarehe saba mwezi wa nne pale CCM Mwinjuma,mwananyamala hapahapa jijini dar es salaam ,najua musa ni bondia mzuri lakini siwezi kupoteza mara mbili mfululizo huu mwiko wangu nitahakikisha nafia ulingoni na ntajituma  kwa nguvu zangu zote na kuhakikisha nampiga ko mbaya,kwani siku hiyo ya tarehe saba april sitakuwa na huruma hata kidogo,lolote na litokee hata nikiua sawa tu nina uchungu sana na ngumi na nataka nimuoneshe mchumia tumbo nakuja kivingine,na nikipigwa katika pambano la mwananyamala ni bora niache ngumi

Ibra Class atamba kumgaragaza Mwamakula

BONDIA Ibrahimu  Class 'King Class Mawe' anaendelea kujiandaa 

kumkabili Amosi Mwamakula katika pambano la utangulizi wakati wa

mchezo wa kati ya Francis Cheka na Thomas Mashali.

Pambono la raundi nane linatarajiwa kufanyika katika Ukumbi wa PTA

Sabasaba, Dar es Salaam Mei Mosi mwaka huu, linatarajiwa kuwa la vuta

nikuvute kutokana na kila mmoja kujigamba kujiandaa vema.

Kocha wa King Class Mawe, Rajabu Mhamila 'Super D' alisema kuwa

bondia wake anajianaa vema kwa ajili ya  kumchakaza Mwamakula bila ya huruma ili

kuendelea kujiwekea rekodi nzuri.

"Bondia wangu yuko katika maandalizi ya kutosha kuhakikisha anafanya

vizuri katika pambano hilo la utangulizi kati ya Cheka na  Mashali" alisema

Super D.Mbali na kuwepo mapambano ya ngumi kutakuwa na uuzwaji wa DVD  za mafunzo ya mchezo

huo zenye mapambano makubwa ya mabondia wa ndani na nje ya nchi.

Aliongeza kuwa baadhi ya mapambano yaliyomo ni katika CD na DVD

hizo ni ya Kalama Nyilawila dhidi ya Francis Cheka, Mbwana Matumla na

Fransic Miyeyusho, Said Mundi na King Class Mawe. nyingine zitakuwa

zenye mapambano ya mabingwa wa Dunia akiwemo Manny Paquaio, Floyd Maywherth, Roy Jones,Miguel Cotto,Linox Lewis na wengine wengi DVD hizo zilizoandaliwa kwa ubora wa hali ya juu zitakuwa zikiuzwa kwenye mpambano huo na Kocha wa Kimataifa wa mchezo huo. Rajabu Mhamila ‘Super D’, alisema kuwa kutakuwa na DVD ili kuweza kuwauzia mashabiki kwa ajili ya kujifunza Kanuni na Sheria za mchezo huo.
“Ninatarajia kuwepo kwa ajili ya kuwauzia DVD mashabiki wa ngumi watakaokuwepo katika Mpambano  ili kuweza kujifunza mambo mbalimbali ikiwa ni pamoja na sheria za mchezo wa ngumi”, alisema Super D .

FIFA KUJA KUWASIKILIZA WAGOMBEA UCHAGUZI TFF

Na Boniface Wambura

SHIRIKISHO la Kimataifa la Mpira wa Miguu (FIFA) ambalo lilisimamisha mchakato wa uchaguzi wa Shirikisho la Mpira wa Miguu Tanzania (TFF) kutokana na baadhi ya wagombea kulalamika kuenguliwa sasa litatuma ujumbe wake nchini katikati ya mwezi ujao.

Ujumbe huo ambao moja ya shughuli zake kuwasikiliza wote walioenguliwa na Kamati ya Rufani ya Uchaguzi ya TFF na hawakuridhika na uamuzi huo, utakuwepo nchini Aprili 16 na 17 mwaka huu.

Kwa mujibu wa barua ya Katibu Mkuu wa FIFA, Jerome Valcke kwenda kwa Rais wa TFF, Leodegar Tenga, kazi ya ujumbe huo ni kubaini tatizo lililopo na kutoa ripoti kwa mamlaka zinazohusika ndani ya FIFA kwa ajili ya kutoa mwongozo.

Ujumbe huo utakutana na pande mbalimbali zinazohusika wakiwemo wagombea, kamati za uchaguzi za TFF. Lakini pia ujumbe huo unatarajia kumtembelea Waziri wa Habari, Vijana, Utamaduni na Michezo, Dk. Fenella Mukangara pamoja na watendaji wake wizarani.

Uchaguzi wa viongozi wa TFF ulikuwa ufanyike Februari 24 mwaka huu, lakini ukasimamishwa na FIFA baada ya baadhi ya wagombea walioenguliwa kulalamika kuwa hawakutendewa haki na wangependa shirikisho hilo liingilie kati.

 AMOUR MZUNGU AMTISHIA NYAU MARWA

Zungu (kushoto) wakati akipima ubavu na Kiza Kinene (kulia)

BONDIA machachari mwenye makazi yake kisiwani Unguja Amour Said”Zungu”  amejitapa kumpiga vibaya na kumstaafisha ngumi bondia mkongwe aliyewahi kuchukua medali na mataji kadhaa katika ngumi za ridhaa na kuwa bingwa katika ngumi zakulipwa Joseph Marwa katika  pambano litakalofanyika katika ukumbi wa  CCM Mwinjuma-mwananyamala April  7.

Zungu alisema kuwa kwa namna alivyojiandaa atamnyuka Marwa maarufu kama Smart Man'.

"Marwa umri umekwenda, japo alikuwa mwalimu wangu, lakini lazima nimnyuke," alisema.

Mabolndia hao watapigana katika pambano la raundi nane na watasindikizwa na mabondia wanaokuja vema katika mchezo huo nchini kwa sasa kama Issa Omar na Shaaban Madilu watakaocheza raundi kumi za ubingwa wa taifa wa oganaizesheni ya ngumi za kulipwa Tanzania (TPBO),Ambao upo wazi kugombaniwa na mabondia hao.

Banka wenzake wazidi kuipaisha Bandari Kenya

Wabongo wanaokipiga Bandari-Kenya, Mohammed Banka, Thomas Maurice, David Naftari na Meshack Abel wakiwa katika pozi

WACHEZAJI nyota wa zamani wa Simba, Yanga, Mohammed Banka, Thomas Maurice na David Naftar wameendelea kuing'arisha Bandari Kenya baada ya kuisaidia kupata ushindi wake wa pili mfululizo katika Ligi Kuu ya Kenya kwa kuwalaza Sony Sugar mabao 3-0.

Bandari ikiwa uwanja wake wa nyumbani mjini Mombasa, ilipata ushindi huo na kufikisha jumla ya pointi 8 na kushika nafasi ya nne katika msimamo wa ligi hiyo inayoongozwa na KCB yenye pointi 11.

Maurice alianza kuiandikia bao Bandari kwa kichwa akiiunganisha faulo iliyopigwa kiufundi na Banka kabla ya Naftari aliyewahi kung'ara Simba kufunga bao la pili na bao la mwisho lilitupiwa kambani na Eric Okoth aliyefunga pia kwa kichwa.

Bandari itashuka tena dimbani, Jumamosi kuvaana na mabingwa watetezi Tusker, huku Banka akisema kikosi chao kimejiandaa vya kutosha kuweza kuwashikisha adabu wapinzani wao hao wanaopkamata nafasi ya pili kutoka mkiani ikiwa imecheza mechi mbili tu.

Simba, Azam kuvuna nini Ligi Kuu Tanzania Bara?

Kikosi Cha Kagera Sugar

KIVUMBI cha Ligi Kuu Tanzania Bara kinatarajiwa kuendelea tena keshokutwa kwa michezo miwili itakayozikutanisha timu za Azam na mabingwa watetezi Azam zitakazokuwa katika viwanja viwili tofauti kusaka pointi tatu muhimu za ligi hiyo baada ya kuwa 'likizo' kwa muda.
Simba wenyewe watakuwa ugenini mjini Kagera kuwakabili wenyeji wao Kagera Sugar katika pambano litakalochezwa kwenye uwanja wa Kaitaba, wakati wawakilishi pekee wa Tanzania katika michuano ya kimataifa, Azam watakuwa jijini Dar es Salaam kuikaribisha Prisons ya Mbeya.
Mechi zote hizo zinatarajiwa kuwa na upinzani mkali japo macho na masikio yataelekezwa zaidi Kaitaba katika pambano la Simba na Kagera Sugar kutokana na mwenendo wa mabingwa hao watetezi katika ligi hiyo.

Simba ambayo ilizinduka na kuongozwa na kamati maalum ya ushindi kurejesha matumaini kwa wana Msimbazi kwa kuikwanyua Coastal Union mabao 2-1 baada ya kupoteza mwelekeo watakuwa na kibarua kigumu Kagera kudhidhirisha kuwa hawakubahatisha kwa Wagosi wa Kaya.
Tayari kikosi hicho cha Simba kimeelezwa kimeshatua Bukoba, kuvaana na watengeneza Sukari hao walioapa kuisurubu Simba baada ya mechi yao ya awali kumalizka kwa sare ya mabao 2-2 jijini Dar.
Ushindi wowote kwa Kagera utavuruga mipango ya Simba kutetea kiti chake kinachoelekea kutua Yanga inayoongoza msimamo ikiw ana pointi 48 ambayo hata hivyo haitakuwa dimbani hiyo Jumatano.

Baadhi ya wachezaji wa Simba

Pia ushindi huo utamaanisha kwamba Kagera itaziengua Mtibwa Sugar na Coastal Union na kuikamata Simba iliyopo nafasi ya tatu kwa sasa ikiwa na pointi 34. Kagera wenyewe kwa sasa wana pointi 31 wakiwa nafasi ya sita hivyo wakishinda watafikisha idadi ya pointi 34 kama za Simba.
Katika pambano la jijini Dar, Azam itakuwa ikihitaji ushindi mbele ya maafande wa Magereza ili kuwafukizia Yanga waliowaacha nyuma kwa pointi 11, japo wapo mnbele mchezo mmoja.

Azam ina pointi 37 ikiwa imeshuka dimbani mara 19, na katika mechi yake ya mwisho kabla ya kwenda Liberia kwenye pambano lake la Kombe la Shirikisho Afrika dhidi ya Barrack YCII waliambulia sare ya bao 1-1 na Polisi Morogoro.
Hata hivyo, Azam wasitarajie mteremko kwa Prisons wanaonolewa na kocha Jumanne Chale ambayo inapigana kuepuka janga la kushuka daraja ikiwa ipo nafasi ya 11 katika  msimamo wa ligi hiyo.
Kwa namna yoyote mechi zote hizo mbili zinaweza kubadilisha msimamo wa ligi hiyo kwa nafasi nyingine isipokuwa ile ya uongozi inayohodhiwa na Yanga yenye pointi 48.

Msimamo kamili wa Ligi Kuu Tanzania Bara kwa sasa ni;

			P	W	D	L	F	A	D	Pts
1		Young Africans	20	15	3	2	37	12	+25	48
2		Azam	19	11	4	4	32	16	+16	37
3		Simba	19	9	7	3	28	16	+12	34
4		Coastal Union	21	8	8	5	23	19	+4	32
5		Mtibwa Sugar	21	8	8	5	23	19	+4	32
6		Kagera Sugar	20	8	7	5	21	17	+4	31
7		Ruvu Shooting	19	8	5	6	21	17	+4	29
8		JKT Oljoro FC	21	6	7	8	20	24	-4	25
9		JKT Mgambo	21	7	3	11	14	21	-7	24
10		Ruvu Stars	20	6	4	10	19	32	-13	22
11		Tanzania Prisons	20	4	8	8	11	17	-6	20
12		Polisi Morogoro	21	3	8	10	11	21	-10	17
13		Toto Africans	21	3	8	10	17	28	-11	17
14		African Lyon	21	4	4	13	14	32	-18	16