Japhet Kaseba azidunda Australia

 
BINGWA wa Taifa wa Ngumi za Kulipwa, Japhet Kaseba 'Champion' yupo nchini Australia kwa ajili ya kupigana na bondia Jeremy van Dieman wa nchini humo katika pambano la kimataifa.
Pambano hilo la uzito wa Heavy Light  (kilo 79) linatarajiwa kufanyika kwenye Ukumbi wa Metro City, uliopo mjini Northbridge nchini humo.
Kwa mujibu wa taarifa zilizotumwa nchini na Kaseba akiwa Australia, mabondia hao walipimwa uzito jana tayari kwa pambano hilo la leo ambalo litakuwa la kwanza kwake kimataifa tangu aliporejee kwenye ngumi.
"Nipo Australia na tumetoka kupima uzito kwa ajili ya pambano letu la kesho (leo) la kimataifa dhidi ya mwenyeji wangu Jeremy van Dieman ambaye nitapigana naye kwenye Ukumbi wa Metro City, Magharibi mwa Australia," alisema Kaseba.
Kaseba alisema mara baada ya pambano hilo ambalo ametamba kufanya vizuri ili kujitengenezea mazingira ya kuwania ubingwa wa dunia, atarejea nchini siku ya Jumapili majira ya saa nane mchana.
"Nitarejea nchini Jumapili ya Novemba 17 saa nane mchana, nawaomba Watanzania waniombee kila la heri niweze kufanya vema katika mchezo huo wa Ijumaa (leo)," alisema Kaseba, bingwa wa zamani wa Dunia wa Kick Boxing.
Kaseba mwenye rekodi ya kucheza michezo minne akishinda miwili na kupoteza miwili, atavaana na Dieman anayeshikilia nafasi ya tisa nchini mwake kwenye uzito huo wa Heavy Light huku akicheza michezo minne na kutoka sare miwili.

Haya ndiyo majembe 32 ya Taifa Stars yatakayoivaa Harambee Stars

Kocha Kim Poulsen

Kocha Mkuu wa Taifa Stars, Kim Poulsen ameunda kikosi cha wachezaji 32 kwa ajili ya mechi ya kirafiki ya kimataifa dhidi ya Kenya (Harambee Stars) itakayochezwa Jumanne, Novemba 19 mwaka huu Uwanja wa Taifa, Dar es Salaam.

Kikosi hicho kinajumuisha wachezaji 16 walioitwa Taifa Stars inayodhaminiwa na Kilimanjaro Premium Lager, na wengine 16 kutoka Future Taifa Stars. Awali kambi ya Future Taifa Stars iliyoanza Novemba 9 mwaka huu na kuvunjwa leo asubuhi ilikuwa na wachezaji 30.

Wachezaji walioitwa ni makipa wanne; Aishi Manula (Azam), Ally Mustafa (Yanga), Deogratias Munishi (Yanga) na Ivo Mapunda (Gor Mahia, Kenya). Mabeki ni Aggrey Morris (Azam), Ismail Gambo (Azam), Kelvin Yondani (Yanga), Michael Pius (Ruvu Shooting), Nadir Haroub (Yanga) na Said Moradi (Azam).

Viungo wakabaji ni Erasto Nyoni (Azam), Himid Mao (Azam), Shomari Kapombe (AC Cannes, Ufaransa) na Vincent Barnabas anayechezea Mtibwa Sugar ya Morogoro.

Viungo ni Amri Kiemba (Simba), Athuman Idd (Yanga), Frank Domayo (Yanga), Haruna Chanongo, Hassan Dilunga (Ruvu Shooting), Jonas Mkude (Simba), Ramadhan Singano (Simba), Salum Abubakar (Azam) na William Lucian (Simba).

Viungo washambuliaji ni Faridi Musa (Azam), Joseph Kimwaga (Azam), Mrisho Ngasa (Yanga), Mwingi Kazimoto (Markhiya, Qatar) na Simon Msuva (Yanga).

Washambuliaji ni Elias Maguli (Ruvu Shooting), Juma Liuzio (Mtibwa SugarMbwana Samata (TP Mazembe, DRC) na Thomas Ulimwengu (TP Mazembe, DRC).

Kilimanjaro Marathon yazinduliwa rasmi, zawadi zaanikwa

Mashindano ya 12 ya Kilimanjaro Marathon yanayotarajiwa kufanyika Moshi Machi 2, 2014 yamezinduliwa jijini Dar es Salaam leo.

Katika uzinduzi huo, Meneja wa Bia ya Kilimanjaro, George Kavishe alisema: “Ninayo furaha kutangaza kwamba huu utakuwa mwaka wa 12 kwa mbio za Kilimanjaro Marathon kufanyika chini ya udhamini wa Kilimanjaro Premium Lager.

Kwa mara nyingine, ni fahari kubwa kwa Kilimanjaro Premium Lager kudhamini tukio hili maarufu na lenye msisimko mkubwa katika kalenda ya michezo ya Tanzania.”

Kavishe alitangaza nyongeza ya asilimia 25 kwenye zawadi za fedha kwa washindi wa mbio za kilometa 42 za Kilimanjaro Premium Lager Marathon, ambapo jumla ya zawadi ya fedha itaongezeka kutoka Tsh milioni 15 hadi Tsh milioni 20, huku washindi wa kwanza, wa pili na wa tatu wanaume kwa wanawake wakipokea jumla ya Tsh milioni nane na kiasi kilichobaki kikigawanywa miongoni mwa washindi wanne hadi wa 10.

Kavishe alisema kwamba ni bahati kubwa kwa Kilimanjaro Premium Lager kudhamini mashindano haya yenye msisimko mkubwa katika kalenda ya michezo nchini Tanzania na kwamba Bia ya Kilimanjaro Premium Lager itatoa zawadi kubwa za fedha kwa wanariadha wakati wengine watabaki wana kumbukumbu isiyofutika ya ukaribu wa hali yajuu.

Ili kuwahamasisha na kuwapa motisha wanariadha wa Tanzania kuongeza viwango vyao na kutumia muda mfupi kumaliza mbio hizo, Kilimanjaro Premium Lager imetenga Shilingi milioni mbili kama bonasi au malipo ya nyongeza kwa wanariadha wa Tanzania watakaovunja rekodi kwenye mashindano hayo.

Zawadi zitakazotolewa kwenye 2014 Kilimanjaro Marathon zimenyumbulishwa kitakwimu kama ifuatavyo hapa chini;

2014 KILI MARATHON PRIZES			2013 KILI MARATHON PRIZES
	MALE	FEMALE		MALE	FEMALE
1ST	4,000,000	4,000,000	1ST	3,000,000	3,000,000
2ND	2,000,000	2,000,000	2ND	1,500,000	1,500,000
3RD	1,000,000	1,000,000	3RD	850,000	850,000
4TH	900,000	900,000	4TH	650,000	650,000
5TH	600,000	600,000	5TH	500,000	500,000
6TH	400,000	400,000	6TH	350,000	350,000
7TH	350,000	350,000	7TH	250,000	250,000
8TH	300,000	300,000	8TH	200,000	200,000
9TH	250,000	250,000	9TH	150,000	150,000
10TH	200,000	200,000	10TH	100,000	100,000
SUB TOTAL	10,000,000	10,000,000	SUB TOTAL	7,550,000	7,550,000
GRAND TOTAL	20,000,000		GRAND TOTAL	15,100,000

Kavishe alisema anatarajia kwamba zawadi hizo za fedha zitawavutia wanariadha mashuhuri na kuwapa moyo wengine kuvunja rekodi za mashindano hayo.

Aliongeza kwamba Kilimanjaro Marathon imepiga hatua kutoka tukio la mkoa hadi kuwa mashindano makubwa ya kimataifa. “Tunatambuliwa na IAAF na Chama cha Kimataifa cha Mbio za masafa Marefu. Licha ya mafanikio haya, tunaendelea kujitahidi kuboresha mbio hizi mwaka hadi mwaka,” alisemaKavishe.

Tunashukuru kwa jinsi walivyoungwa mkono na Wizara ya Michezo na mamlaka za Serikali ya Mkoa wa Kilimanjaro, Riadha Tanzania, Chama cha Mbio za Ridhaa Kilimanjaro, pamoja na wadhamini wenzawao ambao ni Vodacom (5km Fun Run), GAPCO, Simba Cement, CFAO Motors, KK Security, Keys Hotel, TPC Sugar, FNB Bank, UNFPA, TanzaniteOne na Kilimanjaro Water kwa kusaidia kuikuza Kilimanjaro Marathon kuwa moja ya mashindano makubwa zaidi ya mbio za masafa marefu barani Afrika.

Future Young Taifa Stars yainyoa Stars 1-0

Mshambulia wa Taifa Stars, Mrisho Ngasa (kulia) akichuana na mchezaji wa Future Young Taifa Stars, Kabanda katika mchezo kirafiki uliofanyika leo kwenye Uwanja wa Karume jijini Dar es Salaam. (Picha na Francis Dande)

Kiungo wa Taifa Stars, Athuma Idd "Chuji" akichuana na mchezaji wa Future Young Taifa Stars,Paul Nonga.

Beki wa Stars Erasto Nyoni (kushoto), akichuana na mshambuliaji wa Future Young Taifa Stars, Simon Msuva.

Erasto Nyoni akipimana ubavu na Simon Msuva.

Chuji akimtoka Paul Nonga.

Uniwezi bwana mdogo......Chuji akichuana na Paul Nonga wa Future Young Taifa Stars.

Makocha wakijadiliana jambo wakati wa mchezo huo.

Mashabiki wakishuhudia mechi hiyo kupitia katika jengo la Machinga Complex.

Msuva akitoka baada ya kuumia.

Moja ya hekaheka.

Mwili wa Dk Mvungi kuletwa Ijumaa kuzikwa Jumatatu

Dk Mvungi alipokuwa akisafishwa kwenda Afrika kusini kwa matibabu zaidi

MWILI wa aliyekuwa Mjumbe wa Tume ya Mabadiliko ya Katiba ya Tanzania, Dk Sengondo Mvungi (61) unatarajiwa kuwasili nchini Ijumaa tayari kwa ajili ya mazishi yake, huku Chama cha NCCR-Mageuzi kikiwataka watanzania kuwa na utulivu kufuatia kifo cha kiongozi wao huyo muhimu.
Akitoa taarifa ya ratiba ya mazishi ya Dk Mvungi, Mwenyekiti wa chama hicho, James Mbatia alisema wamesikitishwa na kifo cha kiongozi huyo ambaye alikuwa kiungo muhimu.
Mbatia alisema Dk. Mvungi ameacha pengo kubwa ndani ya chama ambalo halitazibika kutokana na kukitumikia kwa moyo mmoja.
Alisema baada kukaa kama chama, familia na serikali, walikubalina na kwamba mwili wake uwasili Novemba 15 mwaka huu toka Afrika Kusini na kupelekwa moja kwa moja katika Hospitali ya Jeshi la Wananchi wa Tanzania (JWTZ) Lugalo ambako utahifadhiwa.
Novemba 16 mwaka huu, mwili huo utapelekwa katika Kanisa la Mtakatifu Joseph, Jimbo Kuu Katoliki Dar es Salaam saa 3:00 asubuhi hadi 6:00 mchana kwa ajili ya ibada ya kumwombea.
Mbatia alisema baada ya ibada, mwili huo utapelekwa katika Viwanja vya Karimjee kwa ajili ya watu mbalimbali kutoa heshima ya mwisho kuanzia saa 6:30 mchana hadi 10: 00 jioni.
Baada ya hatua hiyo, mwili huo utapelekwa nyumbani kwake Kibamba kupumzishwa ili siku ya Jumapili  Novemba 17  uweze kusafirishwa kijijini kwao Kisangara – Mwanga mkoani Kilimanjaro kwa ajili maziko yatakayofanyika  Novemba 18 mwaka huu.
Katika hatua nyingine, Rais Jakaya Kikwete na mkewe Salma jana walikuwa miongoni mwa waombolezaji waliofika nyumbani kwa marehemu Dk.  Mvungi kwa ajili ya kuhani.
Rais Kikwete walifika nyumbani hapo saa 6:00 mchana ambapo alipata fursa ya kumpa pole mke wa marehemu, Anna Mvungi, wanafamilia na wananchi waliofika katika msiba huo.
Pia viongozi kadhaa wa serikali, siasa, wanasheria na wananchi wengine walifika nyumbani hapo kuomboleza msiba huo.
Salamu za rambi rambi zimekuwa zikitolewa na watu mbalimbali vikiwemo vyama vya siasa na asasi za kijamii kufuatia kifo cha Dk Mvungi aliyevamiwa na kucharangwa mapanga na watu wanaodaiwa kuwa majambazi Novemba 3 nyumbani kwao Kibamba Msakuzi.
Dk Mvungi alifariki mchana wa jana akipatiwa matibabu nchini Afriuka Kusini alkikopelekwa baada ya hali yake kuzidi kuwa mbaya alipokuwa amelazwa katika hospitali ya Muhimbili Kitengo cha Mifupa (MOI).

Said Ndemla: Kinda la Simba lililoifunika Yanga Okt 20

 

YANGA ilipokuwa ikiongoza kwa mabao 3-0 katika kipindi cha kwanza cha pambano lao dhidi ya watani zao, Simba lililochezwa Oktoba 20 mwaka huu hakuna aliyekuwa akiamini kama mabao hayo yangerudishwa na Simba.
Hii ni kwa sababu Yanga ilitawala mchezo huo na kuifunika kabisa Simba na hasa 'dimba' la kati na kuifanya Simba ya King Abdallah KIbadeni kuonekana siyo lolote wala chochote mbele ya vijana wa Jangwani wa Ernie Brandts.
Hata hivyo badiliko lililofanywa na Kibadeni kwa kumtoa Abdulhalim Humud 'Gaucho' na Haruna Chanongo na kuwaingiza William Lucian 'Gallas' na Said Ndemla, lilileta maajabu ya aina yake kwenye uwanja wa Taifa.
Simba iliwafunika Yanga na kurejesha mabao yote matatu na lau kama dakika zingeongeshwa zaidi katika pambano hilo ni dhahiri Simba ingeibuka na ushindi kwa vile ilionekana kupata uhai na kuwakimbiza Yanga watakavyo.

Unajua kwa nini?
Moja ya 'mashine' zilizoingizwa, iliwafunika nyota wote wa Yanga waliotawala awali  dimba la kati, akikaba vilivyo na kusukuma mashambulizi ya Simba langoni mwa wapinzani wao kiasi mabeki ya Yanga kutamani mpira uishe.
Said Khamis Ndemla ndiye aliyekuwa akifanya kazi hiyo na kuwafanya wale wote walioikatia tamaa Simba kupata uhai na hasa Simba ilipoanza kurudisha bao moja baada ya jingine na hatimaye kusawazisha bao na kuwa mabao 3-3.
Ndemla, chupukizi ambaye hilo lilikuwa pambano lake la kwanza kubwa kwa wapinzani wa jadi Simba na Yanga, alifanya kazi ambayo ilithibitisha kuwa Tanzania imejaliwa hazina kubwa ya vipaji vya soka iwapo vikitumiwa vyema.
Hata mwenyewe anakiri itamchukua muda mrefu kulisahau pambano hilo kwa namna alivyocheza kwa jihad na kusaidiana na wenzake kulazimisha sare ya mabao 3-3 wakati tayari Simba ilionekana imekubali kuelekea 'Kibla'.

"Siwezi kulisahau pambano la Simba na Yanga kwa sababu lilikuwa pambano langu la kwanza kubwa na gumu lenye ushindani na la kwanza kwangu kati ya Simba na Yanga na bahati nzuri niling'ara," anasema.
Ndemla, anayevutiwa na soka la kiungo wa Ujerumani anayeichezea klabu ya Bayern Munich, Bastian Schweinsteiger anasema anaamini kujiamini na kipaji alichojaliwa kilimbeba na kumfanya awe anafanya mambo makubwa dimbani.
Mkali huyo ambaye licha ya kumudu nafasi ya kiungo pia anamudu kucheza kama winga wa kulia na mshambuliaji namba 10, anasema anashukuru Mungu kwa kipaji alichonacho na kuota kuja kucheza soka la kulipwa barani Ulaya.
"Licha ya kufurahia kuichezea Simba, lakini ndoto zangu ni kuja kucheza nje ya nchi na hasa bara la Ulaya, naamini ninao uwezo mkubwa," anasema.
 
DALILI NJEMA
Ndemla aliyezaliwa Machi 11, 1994 jijini Dar es Salaam akiwa ni mtoto wa pili kati ya watoto wanne wa familia ya Mzee Khamis Ndemla, anasema licha ya kucheza kitambo kifupi, lakini soka limempa mafanikio ya kujivunia.
Anasema ukiacha mambo binafsi ambayo hakupenda kuyaanika gazetini, lakini tayari ameshanyakua mataji na medali kadhaa katika mchezo huo.
"Kwa kipindi kifupi tu nimeshanyakua vikombe vitatu na medali nikiwa na Simba B. Nimetwaa nao ubingwa wa Uhai, Kinesi na ule wa ABC Super8," anasema.
Anasema mafanikio hayo ni dalili njema kwake katika usakataji wake wa soka huku akisisitiza kuwa hajaridhika wala kuvimba kichwa na badala yake atazidisha juhudi ili aweze kufika mbali zaidi.
Kabla ya Simba kumuona, Ndemla aling'ara katika soka akisoma Shule ya Msingi Uzuri na Makongo, huku chandimu alicheza Soccer Rangers iliyokuza kipaji chake kabla ya kunyakuliwa na Messina Linea na baadaye Red Coast.
"Nikiwa naichezea Red Coast kwenye michuano ya Kinesi, ndipo Simba B waliponiona na kunishawishi kujiunga nayo nikianzia katika kikosi hicho kabla ya kupandishwa timu ya wakubwa," anasema.
Ndemla, anasema Simba ilivutiwa naye hasa baada ya kuifungia timu yake ya Red Coast mabao 2-0 dhidi yao na kumsajili kikosi chake cha vijana alichoichezea msimu miwili kabla ya mwaka huu kupandishwa timu kubwa.
Mchezaji huyo anayekiri kama siyo soka anmgependa kuwa mfanyabiashara anasema hakuna tukio la furaha kwake kama siku Simba iliponyakua ubingwa wa Super8 na kulizwa na kifo cha baba yake mzazi.
"Kwa kweli huzuni yangu ni kumpoteza baba yangu mzazi na furaha ni siku nilipotwaa ubingwa wa Super8 kwa kuwanyuka Mtibwa Sugar," anasema.

VIJANA
Ndemla anayependa kula kunywa ugali kwa samaki na mboga za majani na kunywa juisi ya matunda, anasema soka la Tanzania linazidi kupanda juu na kutaka vijana wapewe zaidi nafasi akiamini watalikomboa taifa kimataifa.
Anasema vijana wakipewa nafasi itawasaidia kujiamini na kupigana kwa mafanikio ya taifa kama mataifa mengine yaliyosonga mbele na kutamba katika soka la kimataifa kwa kutegemea nguvu ya vijana wenye vipaji.
Shabiki huyo wa Chelsea, hata hivyo anawakumbusha wachezaji wenzake kuzingatia nidhamu, kujituma na kuwasikiliza makocha wao iwapo wanataka kufika mbali na kulingana na nyota wanaowashabikia wanaotamba duniani.
"Bila nidhamu, kujituma na kuwaizngatia makocha ni vigumu kufikia kwenye malengo, pia ikumbukwe soka la sasa ni ajira," anasema.
Ndemla anayependa kutumia muda wake wa ziada kupumzika nyumbani na kusikiliza muziki akimzimia Diamond, anasema hakuna mchezaji yeyote nchini anayemnyima raha awapo dimbani kwa vile anajiamini.
Kiungo anayefurahia tukio la kwenda kujifunza soka nchini Ujerumani akiwa na kituo cha TSS cha Mwanza anasema anawashukuru wazazi wake kwa kumuunga mkono katika kucheza kwake soka na hasa mama yake.
Pia anawamwagia sifa na pongezi makocha wake wote waliomsaidia katika kukuza soka lake tangu utotoni mpaka sasa hasa Ramadhani Kipira, Max, Suleiman Matola, Ngongo na Abdul Mashine.

Young Stars, Taifa Stars kumenyana kesho Karume

TIMU za Taifa za Future Taifa Stars na Taifa Stars zinacheza kesho (Novemba 13 mwaka huu). Mechi hiyo ya kirafiki itafanyika Uwanja wa Kumbukumbu ya Karume jijini Dar es Salaam kuanzia saa 10 kamili jioni.
Mechi hiyo ni maalumu kwa Benchi la Ufundi la Taifa Stars linaloongozwa na Kim Poulsen kuangalia wachezaji kumi kutoka Future Taifa Stars watakaoongezwa katika Taifa Stars tayari kwa mechi ya kirafiki ya kimataifa itakayochezwa Novemba 19 mwaka huu jijini Arusha.

Watazamaji 300 tu wataruhusiwa kushuhudia mechi hiyo kwa kiingilio cha sh. 5,000.
Taifa Stars inayodhaminiwa na Kilimanjaro Premium Lager imeingia kambini leo (Novemba 12 mwaka huu). Miongoni mwa wachezaji wanaotarajia kuripoti ni kipa Ivo Mapunda wa Gor Mahia.

Bodi ya Ligi yafungia viwanja 7 yaadhibu wachezaji, klabu

BODI ya Ligi Kuu Tanzania (TPL Board) imefungia viwanja saba vilivyokuwa vikitumiwa na timu za Ligi Kuu ya Vodacom (VPL) na Ligi Daraja la Kwanza (FDL) hadi vitakapofanyiwa marekebisho ili kukidhi mahitaji ya mechi za mpira wa miguu.
Uamuzi huo umefikiwa na TPL Board katika kikao chake cha kwanza kilichofanyika juzi (Novemba 10 mwaka huu) jijini Dar es Salaam ambapo pamoja na mambo mengine kilipitia ripoti za mechi za VPL na FDL katika mzunguko wa kwanza.
Viwanja vilivyofungiwa na marekebisho yanayotakiwa kufanyika kwanza ili viruhusiwe kutumika tena ni Uwanja wa Kaitaba mjini Bukoba (majukwaa yake yamechakaa, hivyo kuhatarisha usalama wa watazamaji), na Uwanja wa CCM Mkwakwani jijini Tanga (vyumba vya wachezaji kubadilishia nguo (dressing rooms) havina hadhi).

Uwanja wa Kumbukumbu ya Sokoine jijini Mbeya (sehemu ya kuchezea- pitch ni mbovu), Uwanja wa Kumbukumbu ya Sheikh Kaluta Amri Abeid jijini Arusha (pitch ni mbovu), Uwanja wa Ali Hassan Mwinyi (vyumba vya kubadilishia kutumika kwa ajili ya shule ya awali), Uwanja wa Majimaji mjini Songea (pitch ni mbovu) na Uwanja wa Jamhuri mjini Morogoro (pitch ni mbovu).
Klabu ambazo timu zake zinatumia viwanja hivyo zimeshaarifiwa rasmi juu ya uamuzi huo ambapo ama vinatakiwa kuwasiliana na wamiliki wa viwanja hivyo ili wafanye marekebisho au kutafuta viwanja vingine vya kuchezea mechi zao.
Kwa upande wa ripoti za mechi za VPL; Mbeya City imepigwa faini ya sh. 500,000 na kupewa onyo kali kwa timu yake ya U20 kutocheza mechi ya utangulizi walipocheza na Yanga. Pia wanatakiwa kulipa gharama za uharibifu baada ya washabiki wao kuvunja kioo cha basi la Yanga baada ya gharama hizo kuthibitishwa na Bodi ya Ligi.
Pia Mbeya City imepigwa faini ya sh. 500,000 kwa washabiki wake kushambulia basi la wachezaji wa Tanzania Prisons baada ya mechi dhidi yao, na kulipa gharama za uharibifu baada ya kuthibitisha na Bodi ya Ligi.
Coastal Union imepigwa faini ya sh. 500,000 kutokana na vurugu za washabiki wake ilipocheza na Azam kwenye Uwanja wa Mkwakwani ambapo mwamuzi msaidizi Hassan Zani alishambuliwa kwa mawe na kujeruhiwa mkononi na kichwa, tukio lililosababisha mchezo kusimama kwa dakika tatu.
Beki wa Coastal Union, Hamad Khamis wa Coastal Union amepigwa faini ya sh. 500,000 kwa kumpiga kichwa kwa makusudi Kipre Tchetche wa Azam. Kitendo hicho kilisababisha refa amtoe nje kwa kadi nyekundu, hivyo atakosa mechi tatu zinazofuata za timu yake.
Mchezaji Cosmas Lewis wa Ruvu Shooting alifanya kitendo cha utovu wa nidhamu kwa kupiga kelele wakati mgeni rasmi akisalimia timu na kukataa kupeana mkono na kamishna kwenye mechi dhidi ya Rhino Rangers, hivyo amefungiwa mechi tatu na kupigwa faini ya sh. 500,000.
Mtunza vifaa (Kit Man) wa JKT Ruvu, Selemani Oga aliondolewa kwenye benchi la ufundi wakati wa mechi yao dhidi ya Mbeya City kwa kosa la kutoa lugha chafu kwa refa, hivyo suala lake litapelekwa katika Kamati ya Maadili.
Kocha Msaidizi wa Oljoro JKT, Fikiri Elias amepigwa faini ya sh. 500,000 na kufungiwa mechi tatu kwa kumshambulia kwa matusi refa wakati wa mechi yao dhidi ya Ashanti United. Naye mtunza vifaa wa timu hiyo Elas Justin amepelekwa Kamati ya Maadili kwa kumshambulia refa kwa matusi ya nguoni.
Simba wamepigwa faini ya sh. 500,000 kutokana na vurugu za washabiki wake wakati wa mechi dhidi ya Kagera Sugar.
Katika FDL, mchezaji Ally Mtoni wa Villa Squad amepigwa faini y ash. 200,000 na kufungiwa mechi tano. Kosa lake ni kujisaidia haja ndogo golini wakti wa mechi dhidi ya Ndanda FC iliyochezwa mjini Mtwara.
Kamishna Paul Opiyo wa mechi ya FDL kati ya Villa Squad na Transit Camp kwa kutokuwa makini. Katika ripoti yake ameeleza kuwa Transit Camp ilichelewa kufika uwanjani, lakini hakusema ilichelewa kwa muda gani.
Kocha wa Polisi Dar es Salaam, Ngelo Nyanjabha na Meneja wa timu hiyo Mrimi Masi wamepigwa faini ya sh. 200,000 na kufungiwa mechi tatu kila mmoja kwa kuongoza kundi la washabiki kumvamia refa wa mechi yao dhidi ya Villa Squad iliyochezwa Dar es Salaam.
Pia Bodi ya Ligi imeagiza Polisi waandikiwe barua ya onyo kwa vile wakati waamuzi wanapigwa walikuwepo lakini hawakutoa msaada kwa wakati.
Kocha wa Friends Rangers, Kheri Mzozo amepigwa faini ya sh. 200,000 na kufungiwa mechi sita kwa kosa la kumtukana refa na kutishia kuhamamisha washabiki waingie uwanjani kufanya fujo kwenye mechi dhidi ya Villa Squad.
Naye Kocha msaidizi wa timu ya Transit Camp, Haji Amiri amepigwa faini ya sh. 200,000 na kufungiwa mechi sita kwa kutoa lugha ya matusi kwa mwamuzi wa akida wakati wa mechi dhidi ya Friends Rangers.
Adhabu zote zimetolewa kwa mujibu wa kanuni. Pia Bodi ya Ligi imeahirisha kufanya uamuzi wa mechi kati ya Stand United na Kanembwa JKT iliyochezwa Uwanja wa Kambarage ili kukusanya taarifa zaidi. Mechi hiyo haikumalizika. Bodi ya Ligi itakutana tena Jumapili (Novemba 17 mwaka huu).

TANZIA! MASKINI DK MVUNGI HATUNAYE

Dk Mvungi enzi za uhai wake

Dk Mvungi alipokuwa akiipigania roho yake baada ya kujeruhiwa na majambazi

ALIYEKUWA Mjumbe wa Tume ya Katiba, Dk Sengondo Mvungi amefariki dunia mchana wa leo.

Taarifa zilizotufikia kutoka Milpark Hospitali, zinasema kuwa Dk Mvungi alifariki majira ya saa 9 Alasiri alipokuwa akitibiwa baada ya kupigwa mapanga na watu wanaodaiwa kuwa ni majambazi waliomvamia nyumbani kwake Kibamba Msakuzi, Kinondoni.

Kabla ya kupelekwa Afrika Kusini, Dk Mvungi alikuwa akitibiwa katika hospitali ya Moi Muhimbili kabla ya kukimbizwa nje ya nchi kwa matibabu zaidi.

Taarifa za kifo chake zimethibitishwa na Mwenyekiti Taifa wa NCCR-Mageuzi, James Mbatia.
Dk Mvungi ambaye pia alikuwa Mjumbe wa Tume ya Mabadiliko ya Katiba alijeruhiwa  Novemba  3, mwaka huu.

MICHARAZO inaungana na familia, ndugu na jamaa wa marehemu Dk Mvungi katikamkipindi hiki kigumu cha msiba huo mzito na kuwataka wawe na subira kwa kutambua kuwa 'KILA NAFSI ITAONJA MAUTI' Dk Mvungi katangulia sisi tuy nyuma yake. Mungu aiweke mahali pema roho ya marehemu.