Sheikh mwingine apigwa bomu Arusha

SHEIKH  Sheikh wa Msikiti wa Qiblatan  uliopo eneo la Kilombero jijini Arusha, Sudi Ally Sudi (37)amelipukiwa na bomu la kurushwa kwa mkono nyumbani kwake wakati akila daku na mgeni wake.
Kwa mujibu wa taarifa kutoka jijini humo na kuthibitishwa na Jeshi la Polisi, Sheikh Sudi amejeruhiwa sehemu mbalimbali ikiwemo miguu yake yote miwili na sehemu za mapajani pamoja na kifuani na kupoteza baadhi ya vidole vya miguu yote miwili.
Akiwa kwenye hospitali ya mkoa Mount Meru, Sheikh Sudi amesema ‘nilijikuta tu nimeumia baada ya kutupwa bomu nyumbani kwangu na kuumia kwenye miguu’
Muhaji Kifea (38) mkazi wa Dar es Slaam aliyekuwa mgeni wa Sheikh huyo alisema "Jana nilikua nimetokea Nairobi hivyo akawa amenitengea chakula nikawa napata daku pale na wakati huohuo ndio bomu likanilipukia na ilikuwa kama saa tano usiku hivi, walilirusha kupitia dirishani na tayari walikuwa na vitisho juu yake, hata kwenye kutupa bomu walitaka kumdhuru yeye siyo mimi"
Hii taarifa imekuja wakati Mufti Issa Bin Shaaban Simba akiwa ametoa tamko juu ya mgogoro wa muda mrefu wa uongozi kwenye msikiti mkuu wa Ijumaa wa mkoa wa Arusha na msikiti mdogo na kuweka wazi viongozi wanaostahili kuiongoza misikiti hiyo kisheria.
Mlipuko huo wa bomu ni wa nne kutokea jijini humo na kushambuliwa kwa Sheikh huyo ni muendelezo wa viongozi wa dini kushambuliwa nchini katika matukio mbalimbali ndani ya jiji hilo na maeneo mengine ya nchini ikiwamo visiwani Zanzibar ambapo masheikh na mapadri wamejikuta wakiuwawa kwa risasi na wengine kumwagiwa tindikali na watu wasiofahamika.

Pigo! Neymar kukosa mechi zote zilizosalia za Kombe la Dunia

STAA wa timu ya Brazil, Neymar hataendelea na michuano ya Kombe la Dunia 2014 baada ya kuvunjika mfupa unaoshikana na uti wa mgongo wakati wa mechi yao na Colombia usiku wa kuamkia leo.

 Mshambuliaji huyo wa Barcelona amefunga mabao manne katika fainali za mwaka huu, lakini alishindwa kuongeza dhidi ya Colombia kabla ya kutolewa nje kwa machela dakika tatu kabla ya mechi kumalizika.

Kocha wa Brazil Luiz Felipe Soclari alisema: “Sidhani kama ataweza kucheza mechi ijayo”.

“Amekimbizwa hospitali binafsi na madaktari kwasababu aligongwa na goti katika mgongo wake”.

” Alikuwa analia kwa maumivu. Haitakuwa rahisi kwake kuimarika kwa kuzingatia ukweli kwamba ni majeruhi ya mgongo na maumivu aliyonayo ni makubwa. Acha tuwe na matumaini kuwa kila kitu kinakwenda vizuri”.

 

Neymar akitolewa nje ya uwanja wakati wa Robo Fainali dhidi ya Colombia.

Staa huyo mwenye mabao manne mpaka sasa kwenye michuano hiyo, alitolewa uwanjani dakika tatu kabla ya mechi yao dhidi ya Colombia kumalizika.

 

Neymar akiwa chini baada ya kuvunjika mfupa.

Katika mechi hiyo, Brazil walishinda mabao 2-1 na kutinga Nusu Fainali ambapo watakutana na Ujerumani Julai 8 mwaka huu.

 

Hivi ndivyo Neymar alivyoumizwa na Zuniga

Kwa mujibu wa taarifa za daktari wa timu ya Brazil, Neymar atakaa nje kwa takribani wiki nne.

 

Neymar akipatiwa huduma ya kwanza.

 

Wapenzi wa soka nchini Brazil wakiwa nje ya hospitali aliyopelekwa Neymar

'Mtukutu' Luis Suarez apongezwa kwa uungwana

Suarez aliyepongezwa na Blatter

Rais wa FIFA Sepp Blatter

RAIS wa Shirikisho la Kandanda Ulimwenguni (FIFA) Sepp Blatter amempongeza mashambuliaji wa Uruguay Luis Suarez kwa uungwana wake wa kumuomba radhi Giorgio Chiellini wa Italia baada ya kufungiwa kwa miezi minne na shirikisho hilo kwa kumng'ata beki huyo kwenye fainali za Kombe la Dunia.
Blatter, ambaye awali alikataa kuzungumzia kitendo hicho cha ung'ataji au adhabu ya mshambuliaji huyo wa Liverpool, pia amesema ana uhakika kuwa atarejea uwanjani kucheza.
Kashfa ya kung'ata inaelekea haijaathiri jina la Suarez kwenye soko la wachezaji, baada ya Liverpool na Barcelona kuwa katika "mazungumzo mazuri" ya uwezekano wa kuuzwa kwa paundi milioni 80 (sh. bilioni 21.6), na tamko la Blatter si tu litapiga jeki uhamisho huo bali pia kusaidia katika rufaa yoyote ya mchezaji.
Blatter alisema: "Amesema 'Samahani kwa famili ya soka, na hiyo ni fair play. Hiyo inaonyesha ni mchezaji muungwana kiasi gani na nataraji atarudi uwanjani kucheza soka."
Suarez aliomba radhi hadharani wiki iliyopita baada ya kuadhibiwa na FIFA. Kifungo hicho kirefu - ambacho pia kinajumuisha kutocheza mechi tisa za timu ya taifa - kilishutumiwa na baadhi, hasa nchini kwake Uruguay, na Chiellini mwenyewe amedai adhabu ya mshambuliaji huyo ni kubwa mno.
Kutolewa kwa nchi hiyo kwenye michuano hiyo katika hatua ya mtoano na Costa Rica, huku Suarez akiwa amefungiwa, kulimfanya rais wa nchi hiyo kuishutumu FIFA lakini Blatter amekataa kujibu matamshi ya Jose Mujica.