Yanga vitani na Polisi Moro, Simba, Azam hapatoshi Taifa

Yanga kuendeleza sare au kuvunja mwiko Jamhuri

Polisi Moro kuvuna nini kwa Yanga leo?

Simba wataendeleza ubabe wao mbele ya Azam

Azam watakaojiuliza kwa Simba kesho Taifa

Mtibwa Sugar watakuwa wageni wa Ruvu Shooting

Ndanda Fc watakaokuwa ugenini dhidi ya Kagera Sugar

BAADA ya kulazimishwa sare mbili mfululizo kiasi cha kuanza kupagawa, Yanga leo watakuwa uwanja wa ugenini Jamhuri, Morogoro kupambana na Polisi Moro katika mfululizo wa mechi za Ligi Kuu Tanzania Bara.
Yanga imekuwa na bahati mbaya na uwanja wa Jamhuri, hivyo pambano lao la leo watahitajika kupigana kiume ili kupata ushindi na pia kujiweka katika nafasi nzuri ya kuufukuzia ubingwa unaoshikiliwa na Azam ambao wapo kileleni mwa msimamo na watakaokuwa na kibarua kizito kwenye uwanja wa Taifa, jijini Dar kuvaana na Simba.
Yanga waliopo nafasi ya nne kwenye msimamo wakilingana pointi sawa na Polisi Moro, hawajaonja ushindi wowote tangu ligi itoke mapumziko.
Timu hiyo inayonolewa na kocha Hans van der Pluijm na Charles Boniface Mkwasa waliorejeshwa baada ya aliyekuwa kocha wao, Marcio Maximo kutimuliwa baada ya ligi kusimama Novemba 9, ilianza mechi zake kwa kupata sare ya 2-2 na Azam kabla ya kuambulia 0-0 katika mechi iliyojaa ubabe.
Kocha Pluijm atakuwa na kazi kubwa ya kuwazuia vijana wa nyota wa zamani wa kimataifa wa Tanzania aliyetamba na timu za Yanga na Pan Africans, Mohammed Rishard 'Adolph' kutokana na ukweli Polisi waliorejea ligi kuu msimu huu wapo vema.
Yanga itashuka dimbani bila huduma za baadhi ya nyota wake ambao ni majeruhi akiwamo beki kiraka Mbuyi Twite.
Kivumbi cha ligi hiyo kitaendelea pia leo kwenye uwanja wa Mabatini kwa mchezo kati ya Ruvu Shooting dhidi ya Mtibwa Sugar, kabla ya kesho kushuhudiwa michezo kadhaa likiwamo la Azam na Simba ambazo zitaumna kwenye uwanja wa Taifa.
Simba walioshinda mechi zao mbili mfululizo wakitokea kunyakua Kombe la Mapinduzi, wameapa kuwatoa nishai Azam ambao wametoka kupata ushindi katika mechi mbili za ugenini dhidi ya Stand United na Kagera Sugar.
mechi nyingine za kesho zitakutanisha mahasimu wa jadi wa jijini Mbeya, Prisons dhidi ya Mbeya City mechi itakayochezwa uwanja wa Sokoine, Mbeya.
Pia Kagera Sugar watakuwa nyumbani uwanja wa CCM Kirumba, Mwanza kuumana na Ndanda ya Mtwara, huku Stand itaialika Coastal Union uwanja wa Kambarage Shinyanga na Mgambo JKT itakuwa wageni wa JKT Ruvu pambano litakalochezwa uwanja wa Chamazi, jijini Dar es Salaam.
Mpaka sasa msimamo unaaoonyesha Azam wanaongoza msimamo wakiwa na pointi 20 kutokana na mechi 10 wakifuatiwa na Mtibwa Sugar wenye pointi 17 kisha JKT Ruvu wenye pointi sawa na Mtibwa na kufautiwa na Yanga yenye pointi 15 sawa na Polisi Moro wanaowafuata nyuma yao.
Msimamo kamili wa Ligi hiyo mpaka sasa ni kama ifuatavyo;

1			Azam	10	6	2	2	14	7	20
2			Mtibwa Sugar	9	4	5	0	12	7	17
3			JKT Ruvu	11	5	2	4	11	1	17
4			Young Africans	9	4	3	2	11	4	15
5			Polisi Morogoro	11	3	6	2	9	1	15
6			Kagera Sugar	11	3	5	3	8	0	14
7			Coastal Union	10	3	4	3	9	1	13
8			Mgambo JKT	10	4	1	5	5	-4	13
9			Simba	9	2	6	1	9	2	12
10			Ruvu Shooting	11	3	3	5	5	-3	12
11			Mbeya City	9	3	2	4	4	-2	11
12			Stand United	11	2	5	4	7	-6	11
13			Ndanda	11	3	1	7	10	-6	10
14			Prisons	10	1	5	4	6	-2	8

Ronaldo ana miaka 10 kuichezea Real Madrid

Ronaldo na Mendes

WAKALA wa mshambuliaji nyota wa Real Madrid, Cristiano Ronaldo amedai kuwa mteja wake huo bado ana miaka 10 zaidi ya kuendelea kuitumikia klabu hiyo.
Nyota huyo wa kimataifa wa Ureno mapema mwezi huu alinyakuwa tuzo yake ya tatu ya Ballon d’Or ikiwa ni ya pili toka atue Santiago Bernabeu lakini hivi karibuni amekaririwa akidai kuwa anafikiria kuhamia nchini Brazil kabla ya kutundika daruga zake.
Hata hivyo wakala huyo Jorge Mendes ana uhakika Ronaldo atamalizia soka lake akiwa Madrid huku akidai kuwa nyota huyo bado ana miaka 10 zaidi ya kucheza soka katika kiwango cha juu.
Mendes amesema ana uhakika Ronaldo atastaafu akiwa Madrid na umri wa miaka 38 au 39 kwasababu bado ana miaka mingi ya kucheza soka.
Mendes aliendelea kudai kuwa kikubwa kinachomfanya kuamini kwamba anaweza kufikia huko ni kutokana na jinsi anavyojiweka fiti mpaka kuwa mfano kwa wachezaji wenzake

Algeria yagongwa, Afrika Kusini huzuni, Mali, Ivory Coast kivumbi leo

Kara Mbodji akishangilia bao la kusawazisha la Senegal dhidi ya Afrika Kusini

Asamoah akishangilia bao pekee la Ghana dhidi ya Algeria

Ubabe mtupu kati ya Algeria na Ghana

WAKATI timu ya Afrika Kusini ikijiweka katika mazingira magumu ya kusonga mbele kwenye kundi C la michuano ya Kombe la Mataifa ya Afrika, Ghana wenyewe wamezinduka na kuidunga 'vijogoo' wa Afrika, Algeria kwa kuichapa bao moja katika mechi za raundi ya pili ya kundi hilo.
Bafana Bafana walishindwa kulinda bao lao dhidi ya Senegal katika mechi iliyochezwa usiku wa jana na kuambulia pointi moja ikiwaacha wakiwa mkiani mwa msimamo wa kundi hilo la 'kifo'.
Afrika Kusini walioanza vibaya michuano hiyo kwa kufungwa mabao 3-1 na Algeria, walitangulia kupata bao dakika chache baada ya kipindi cha pili kuanza kupitia kwa Oupa Manyisa kabla ya Senegal walioilaza Ghana kwenye mchezo wao wa kwanza kusawazisha dakika ya 60 kupitia kwa Kara Mbodji.
Sare hiyo imeiweka Senegal kileleni mwa kundi hilo wakiwa na pointi nne wakifuatiwa na Algeria ambayo ilicharazwa bao 1-0 na Ghana iliyopo nafasi ya tatu kwa bao la dakika za jioni lililowekwa kimiani na nahodha wa Black Stars, Asamoah Gyan.
Kivumbi cha michuano hiyo kuhitimisha raundi ya pili kitaendelea leo kwa michezo ya kundi D ambapo Mali watavaana na Ivory Coast kabla ya Cameroon kujiuliza kwa Guinea. Timu zote nne katika mechi zao za awali waliambulia sare ya 1-1 na hivyo kulingana kwa kila kitu katika kundi hilo.

Nahodha wa Gabon akiri kuchemsha kwa Congo

Pierre Emerick Aubameyang

MSHAMBULIAJI nyota wa timu ya taifa ya Gabon, Pierre-Emerick Aubameyang amekiri kuwa chini ya kiwango katika mchezo waliofugwa dhidi ya Congo Brazzaville ambao timu yake ililazwa bao 1-0.
Baada ya kuibuka na ushindi katika mchezo dhidi ya Burkina Faso katika mchezo wao wa ufunguzi Jumamosi iliyopita, Gabon walikuwa wakipewa nafasi kubwa ya kushinda katika mchezo huo lakini mambo yalibadilika baada ya Congo kuwafunga bao 1-0.
Aubemeyang ambaye alikuwa nyota katika mchezo wao wa kwanza amekiri kuwa hakuwa katika kiwango chake katika mchezo dhidi ya Congo.
Nyota huyo anayekipiga katika klabu ya Borussia Dortmund ya Ujerumani amesema walishindwa kutengeza na kutumia mchezo wao hali ambayo iliwafanya kuiga mchezo wa wapinzani jambo lililokuwa baya kwao. Hata hivyo, Aubameyang anaamini wanaweza kuamka katika mchezo wa mwisho na kuhakikisha wanaibuka na ushindi.
Timu hiyo itashuka dimbani kesho dhidi ya wenyeji Guinea ya Ikweta katika pambano la kuamua timu zipi za kutinga robo fainali za zipi za kurudi makwao.
Katika kundi hilo Congo wanaongoza msimamo wakiwa na pointi nne wakifuatiwa na Gabon, kisha Guinea ya Ikweta yenye pointi 2 na inayoburuza mkia ni Burkina Faso yenye pointi moja.

Prof Muhongo kujiuzulu uwaziri?

Waziri wa Nishati na Madini, Prof Sospeter Muhongo

HABARI zilizotufikia hivi punde zinasema kuwa Waziri wa Nishati na Madini, Prof Sospeter Muhongo ambaye amekuwa akisakamwa kutokana na sakata za uchotwaji wa fedha za Akaunti ya Tegeta Escrow anazungumza na wanahabari asubuhi hii.
Taarifa hizo hazijaweka bayana Prof Muhongo atazungumza kitu gani, lakini inadhaniwa huenda akatangaza kuachia ngazi katika nafasi hiyo kutokana na shinikizo kubwa lililopo ndani na nje ya serikali na chama chake cha CCM.
Hata hivyo kwa namna Waziri huyo alivyo ng'ang'ari inadaiwa huenda akatoa ufafanuzi juu ya tuhuma zinazoelekezwa kwake na kutakiwa kujiuzulu, japo Rais Jakaya Kikwete katika hutoba yake alisema amemweka kipioro Waziri huyo aliyetajwa kama 'Dalali' katika sakata zima la Escrow kwa mujibu wa ripoti ya PEC inayoongozwa na Mwenyeki wake, Zitto Kabwe.
MKICHARAZO itawaletea taarifa kamili juu ya mkutano huo unaofanyika jijini Dar es Salaam.

Wenger afichua sababu za kutomsajili di Maria

MENEJA wa Arsenal, Arsene Wenger ametaka kanuni za kutoa kibali cha kufanya kazi kwa ajili ya wachezaji ambao hawamo kwenye Umoja wa Ulaya zifutwe.
Wenger anajaribu kumsajili Gabriel Paulista kutoka Villarreal ambaye atahitaji kibali cha uidhinisho toka nchini kwake sababu hajawahi kulitumikia taifa lake.
Kocha huyo amekosoa mpango wa mapendekezo ya kupunguza idadi ya wachezaji toka mashirikisho yasiyo ya Umoja wa Ulaya katika Ligi Kuu Uingereza msimu ujao.
Kwa sasa kibali cha kufanyia kazi kwa nchi zisizo Umoja wa Ulaya kinahitaji mchezaji awe anatoka katika nchi zilizo ndani ya nafasi 70 za viwango vya FIFA na awe amecheza kwa asilimia 75 katika timu ya taifa ndani ya miaka miwili.
Chama cha Soka cha Uingereza kinataka kupunguza idadi ya wachezaji wasiokua wenyeji wa Umoja wa Ulaya kufikia asilimia 50 kwenye ligi.
Lakini Wenger anadhani kuondoa kanuni itakuwa bora zaidi kwa ajili ya wachezaji chipukizi wa nchi hiyo. Wenger amesema alitaka kumsajili winga wa kimataifa wa Argentina Angel Di Maria wakati akiwa na umri wa miaka 17 lakini kibali cha kazi kikaleta shida.

Serikali yalaani ubaguzi aliofanyiwa Tambwe mechi ya Ruvu

Amissi Tambwe (wa Tano toka Kulia) akichuana kwenye mechi yao na Ruvu Shooting ambapo alilalamika kubaguliwa na kukabwa na George Assey (wa kwanza kulia) katika pambano lililoisha kwa sare ya 0-0

WIZARA ya Habari Utamaduni na Michezo imeliagiza Shirikisho la Soka Tanzania (TFF), kutoa adhabu kwa timu ya Ruvu Shooting kutokana na kitendo cha ubaguzi kilichofanywa na wachezaji wa timu hiyo dhidi ya mshambuliaji wa Yanga kutoka nchini Rwanda, Amissi Tambwe.

Akizungumza na Ripota wa Globu ya Jamii, Naibu Waziri wa Habari, Juma Nkamia amesema kuwa TFF isikae kimya kutokana na matamshi ya udhalilishaji juu ya Tambwe na kuiagiza TFF kuchukua hatua za kinidhamu haraka iwapo itathidibitika mshambuliaji huyo alitolewa maneno hayo ya udhalilishaji ili iwe fundisho kwa wengine.

"Hakuna nchi yoyote duniani inayopenda vitendo vya ubaguzi, kitendo ambacho upendi kufanyiwa usimfanyie mwenzie, nimesikia malalamiko ya Tambwe kama ni kweli Ruvu Shooting wamemuita mkimbiza wajue sio kitu kizuri tena wale ni jeshi, nadhani wanajua madhara ya vita.

"Wenzetu Burundi hawakupenda kuingia vitani, hakuna nchi yoyote inayopenda kuwa vitani, vita ni mbaya hata hapa inaweza kutokea, ni jambo la kumshukuru Mungu mpaka leo mna amani, uwezi kujua mtu unayemwambia ameumia kiasi gani na hiyo vita ni ndugu wangapi au marafiki wangapi amewapoteza sio kitu kizuri, naiagiza TFF ishugulikie suala hili kwa kuchukua hatua za haraka."alisisitiza Nkamia.

Kauli ya Nkamia imekuja siku moja baada ya Tambwe kulalamikia kitendo cha kuitwa mkimbizi na wachezaji wa Ruvu Shooting wakiongozwa na George Michael ikiwa ni pamoja na kumkaba nusura wamtoe roho.

"Maneno makali waliyonitamkia yananiuma sana roho hadi sasa, wameniita mkimbizi, eti nimekimbia vita nyumbani Burundi, vita hata hapa inaweza kutokea, hakuna anayependa mabaya kama hayo yatokee, kumwambia mtu haujui kapoteza ndugu wangapi, si sahihi kabisa, cha kushangaza wale ni wanajeshi lakini hawaonyeshi kuwa wanajua athari za vita." kauli iliyotolewa na Tambwe jana.

Hata hivyo Chama cha Waamuzi nchini (FRAT), kimetangaza kumfungia mwamuzi wa kati wa mchezo huo Mohamed Theofil, huku ikiwaweka kwenye uchunguzi waamuzi wasaidizi Michael Mkongwa na Yusuf Sekile.

Mwenyekiti wa FRAT, Salum Chama aliiambia Globu ya Jamii kuwa wamefikia uamuzi wa kumsimamisha Theofil baada ya ripoti ya Kamisaa kuonyesha kuna mapungufu yaliyofanywa na mwamuzi huyo ambaye katika mchezo huo uliomalizika kwa suluhu, alishindwa kumudu mchezo kutokana na rafu za mara kwa mara kitendo kilicholazimu mpira kusimama kila dakika.

"Ripoti ya kamisaa imeonyesha kuna udhaifu mkubwa uliofanywa na mwamuzi, kamati yangu imemfungia kupisha uchunguzi, na bado tunaendelea na uchunguzi pia kwa waamuzi wasaidizi, kikao cha kamati yangu kitakaa Februari 6 kuwajadili na kuangalia adhabu stahiki itakayofaa.

"Kitendo kinacholalamikiwa sana ni kile cha Tambwe, na ni kweli kila mtu ameona, hata kama ripoti ya kamisaa isingesema tungechukua hatua kwa sababu wapo viongozi wa TFF walioona, tunachunguza ripoti ya mechi asesa, kamisaa,"alisema Chama.

Hata hivyo, Chama alisema kuwa hawafanyi kazi kwa shinikizo la Yanga ambao waliwapa mpaka Jumamosi wawe wameshatoa adhabu kwa waamuzi wa mchezo wao na Ruvu Shooting la sivyo watagomea Ligi.

Kwa hisani ya Michuzi blog

Real Madrid yamnasa Lucas Silva toka Cruzeiro

KLABU ya Real Madrid imefanikiwa kumnaza beki wa kati wa timu ya Cruzeiro ya Brazil, Lucas Silva.
Awali klabu ya Cruzeiro iliweka bayana kuwa mchezaji huyo mchezaji wao huyo alikuwa akikaribia kutua Real Madrid.
Makamu wa Rais wa klabu hiyo, Marcio Rodriguez amedai kuwa uhamisho wa Lucas Silva kwenda Real Madrid umeshafikia hatua nzuri ya makubaliano.
Kwa kipindi kirefu Madrid iliyo chini Carlo Ancelotti imekuwa ikimfukuzia kiungo huyo chipukizi mwenye umri wa miaka 21.
Rodriguez amesema uhamisho wa Silva tayari umekamilika na kilichokuwa kikisubiriwa ni Madrid wenyewe kutangaza rasmi.
Rodriguez aliendelea kudai kuwa hawata pata tabu kutafuta mbadala wake kwani kuna wachezaji wengi ambao wako tayari kupandishwa.
Hata hivyo imefahamika kuwa Madrid imeafiki kunyakua mchezaji huyo na kwa sasa ni mali tayari kuanza kupiga mzigo Santiago Bernabeu.

Ivory Coast, Cameroon Chupuchupu, wenyeji kujaribu tena leo

Vita ya Ivory Coast na Guinea ilikuwa hivi

Seydou Keita wa Mali akichuana na mchezaji wa Cameroon

MALABO, Guinea ya Ikweta
VIGOGO vya soka barani Afrika, Ivory Coast na Cameroon zimeanza Fainali za Kombe la Mataifa ya Afrika, Afcon 2015 kwa kuponea chupuchupu vipigo toka kwa wapinzani wao katika mechi zao tofauti za Kundi D, zilizochezwa kwenye uwanja wa Malabo, mjini Malabo.
Ivory Coast walicheza mapema na Guinea katika mechi ya Kundi D, walinusurika kipigo toka kwa Guinea wakiwa pungufu baada ya nyota wake, Gervinho kulimwa kadi nyekundu katika kipindi cha pili kwa kuchomoa bao dakika 18 kabla ya pambano lao kumalizika.
Guinea walionyesha kandanda safi wakiwabana nyota wa Ivory Coast walioongozwa na nahodha wake, Yaya Toure, Mchezaji Bora wa Afrika kwa mwaka wa nne mfululizo, walitangulia kupata bao dakika ya 36 kupitia kwa Mohammed Yattara.
Hata hivyo Ivory Coast ilipambana na kurejesha bao hilo dakika ya 72 kupitia mtokea benchi Seydou Doumbia na kuipa pointi moja muhimu kigogo hicho kilichokuwa kikipewa nafasi kubwa kushinda pambano hilo na miongoni mwa zinazopewa nafasi ya kubwa bingwa.
Katika pambano jingine lililofuata Cameroon ililazimika kusubiri hadi dakika ya 84 kuchomoa bao mbele ya wapinzani wao Mali waliokuwa wakiumana nao kwenye uwanja wa Malabo.
Shujaa wa Cameroon alikuwa ni beki Ambroise Oyongo aliyefunga bao la kusawazisha baada ya Mali kutangulia kupata bao katika dakika ya 71 kupitia kwa Sambou Yatabare.
Katika mfululizo wa michuano ya fainali hizo za 30, timu za kundi A leo zitashuka dimbani kuumana ambapo wenyeji Guinea ya Ikweta itakuwa dimbani kujiuliza na Burkina Faso, huku Gabon wakipepetana na Kongo wakati kesho kutakuwa na mechi za kukata na shoka kwa timu za Kundi B, Zambia kupepetana na Tunisia kabla ya Cape Verde kupepetana na DR Congo katika mechi zitakazochezwa kwenye uwanja wa Ebebiyin, mjini Ebebiyin.
Katika mechi za kwanza kwa timu za kundi hilo kila moja iliambulia sare ya bao 1-1, Zambia ikitoshana nguvu na DR Congo na Tunisia na Cape Verde zilishindwa kutambiana.
Ijumaa kutakuwa na mechi za kundi C ambapo Ghana itashuka tena dimbani mjini Mongomo kuumana na Algeria baada ya kutoka kupokea kipigo cha mabao 2-1 dhidi ya Senegal ambayo itashuka dimbani kucheza na Afrika Kusini.

Kocha Aston Villa asisitiza Benteke haendi kokote

MENEJA wa klabu ya Aston Villa, Paul Lambert amesema mshambuliaji wao nyota, Christian Benteke haondoki klabu hapo, hata kama kuna tatizo la ufungaji katika kikosi chake.
Klabu ya Villa ndfiyo timu yenye idadi ndogo ya magoli katika Ligi Kuu ya England na imekuwa ikidaiwa kuwa huenda ikaachana na Benteke ili kusajili mchezaji mwingine mkali wa kutatua tatizo jilo la ufungaji.
Hata hivyo, Lambert amesema kuwa hakuna mahali kokote mshambuliaji huyo atakapokwenda licha ya kikosi chake kushika nafasi ya 15 katika msimamo wa ligi pointi tatu juu ya eneo la hatari ya kushuka daraja.
Kikosi hicho cha Villa hakijafunga bao lolote katika mechi tano zilizopita za karibuni ikiwa na mabao 11 katika mechi 22 walizocheza, lakini Lambert amesema bado wanamhitaji Benteke.
Pia kocha huyo alimsifia Benteke akisema kuwa ni mmoja wa washambuliaji bora barani Ulaya na kwamba klabu yao haiwezi kumuacha kirahisi licha ya kasi yake ya kufumania nyavu kupungua baada ya kutoka kwenye majeraha.
Mshambuliaji huyo kutokla Ubelgiji, amefunga mabao mawili tu msimu huu katika mechi 13 alizoichezea timu yake na amekuwa akidaiwa kunyemelewa na baadhi ya klabu katika dirisha la usajili linaloendelea.

Ronaldo adaiwa kujituliza kwa Mtangazaji wa runinga

MSHAMBULIAJI nyota wa klabu ya Real Madrid, Cristiano Ronaldo aliyetangaza kuachana na mpenzi wake wa muda mrefu mwanamitindo , Irina Shayk, amedaiwa kuangukia mikononi mwa kimwana mpya Mtangazaji wa kituo cha Televisheni chaHispania, Lucia Villalon.
Kwa mujibu vyanzo vya habari vya karibuni na mwanasoka huyo vinasema kuwa Mreno huyo aliyetoka kunyakua tuzo ya Mwanasoka Bora wa Dunia (FIFA Ballon 'dOr) kwa mara ya pili mfululizo na tuzo ya tatu kwake kwa sasa anatoka na mtangazaji huyo.
Picha iliyomuonyesha Ronaldo akiwa na kimwana huyo wakipongezana mara baada ya nyota huyo kufanikiwa kunyakua tuzo hiyo ya Ballon d'Or akiwashinda Lionel Messi na Manuel Neuer, imedaiwa ndiyo chanzo cha hisia hizo kwamba huenda mtangazaji huyo ndiyo aliyeziba nafasi ya Irina, ambaye hakuhudhuria sherehe za utoaji wa tuzo hizo zilizofanyika nchini Uswisi.
Ronaldo alifichua juu ya tetesi ya kumwagana na Irina, aliyemudu naye katika mahusiano kwa miaka mitano na kueleza alikuwa anapaswa aache kuendelea na mambo yake baada ya tukio hilo la kumwagana na mwanamitindo huyo.
Hata hivyo vyombo vya habari vimedokeza, Ronaldo na Villalon wanatoka pamoja na ndiyo maana kimwana huyo mwishoni mwa wiki alitupia kwenye akaunti yake ya twitter ujumbe kuonyesha alikuwa akifuatilia pambano baina ya Getafe na Real Madrid lililoisha kwa Madrid kushinda mabao 3-0, mawili kati ya hayo yakifungwa na Ronaldo na jingine likitumbukizwa wavuni na Gareth Bale.

Jamie Carragher awaponda wachezaji Arsenal

Jamie Carragher

BEKI wa zamani wa klabu ya Liverpool, Jamie Carragher amewakosoa wachezaji wa Arsenal kwa kushangilia kwao baada ya kuichapa Manchester City kwa mabao 2-0 katika Uwanja wa Etihad Jumapili iliyopita.
Mabao yaliyofungwa na Santi Cazorla na Olivier Giroud yalitosha kuwapa Arsenal ushindi dhidi ya mabingwa hao wa Ligi Kuu kikiwa ni kipigo cha kwanza katika mechi 12 walizocheza.
Baada ya mchezo huo Aaron Ramsey na Alex Oxlade-Chamberlain wote walituma picha zikiwaonyesha wakishangilia katika mitandao ya kijamii jambo ambalo halijamfurahisha Carragher.
Carragher amesema haikatazwi kushangilia lakini sio timu nzima kama walivyofanya wakati hakuna taji lolote waliloshinda mpaka sasa hivyo anadhani wanapaswa kuacha.
 Carragher pia alishangazwa na aina ya mchezo uliotumiwa na meneja Arsene Wenger katika mchezo huo kwani alikuwa akizuia zaidi jambo ambalo sio kawaida yake kwani amezoea mchezo wa wazi.

Liverpool chupuchupu kwa Chelsea Kombe la Ligi

Eden Hazard akifunga bao la penati lililowapa uongozi Chelsea kabla ya Liverpool kulirejesha

Raheem Sterling  akishangilia bao la kusawazisha la Liverpool

Wachezaji wa Liverpool wakilalamika baada ya Diego Costa (10) aliyekaa chini kuonekana kuushika mpira lanoni

BAO la dakika ya 59 lililofungwa na mshambuliaji Raheem Sterling liliiokoa Liverpool isiumbuke nyumbani baada ya kulazimisha sare ya bao 1-1 dhidi ya vinara wa Ligi Kuu ya England, Chelsea katika pambano la kwanza la Nusu Fainali ya Kombe la Ligi (Capital One).
Katika pambano hilo lililochezwa kwenye uwanja wa Anfield, wenyeji walishtukizwa baada ya Chelsea kupata penati baada ya Eden Hazard kufanyiwa madhambi na beki Emre Can na mshambuliaji huyo kutoka Ubelgiji aliukwamisha wavuni mkwaju wa adhabu hiyo katika dakika ya 18.
Bao hilo lilidumu kipindi chote cha kwanza na kipindi cha pili kilipoanza wenyeji walionyesha kucharuka kusaka bao la kusawazisha na juhudi zao zilizaa matunda baada ya Sterling kusawazisha katika dakika ya 59 mbele ya msitu wa mabeki wa Chelsea na kuwapa nafuu 'vijogoo' hao ambao wataifuata Chelsea uwanja wao wa Stanford Bridge katika mchezo wa marudiano ya nusu fainali  wiki ijayo.
Katika pambano hilo mwamuzi Martin Atkinson alilalamikiwa na wachezaji wa Liverpool kwa kuwanyima penati baada ya Diego Costa kuonyesha kuushika mpira akiwa langoni mwa timu yake.
Mshindi wa pambano hilo atafuzu fainali kucheza na mshindi wa mechi ya nusu fainali ya pili kati ya timu ya Tottenham Hotspur  na Sheffield United inayotarajiwa kuchezwa leo katika mkondo wa kwanza kabla ya kurudiana tena Alhamisi ijayo.

Kavumbagu wairejesha Azam kileleni

Kikosi cha Azam

MABAO mawili kutoka kwa Mrundi, Didier Kavumbagu na jingine la Kipre Tchetche, limeiwezesha Azam kurejea kileleni katika msimamo wa Ligi Kuu Tanzania Bara naada yua kutungua Kagera Sugar mabo 3-1.
Pambano hilo la kiporo lilichezwa kwenye uwanja wa CCM Kirumba jijini Mwanza, na iliowachukua Azam dakika tatu kuandika bao kupitia kwa Kipre Tchetche kabla ya Kavumbangu kufunga bao la pili.
Kagera walipunguza idadi ya magoli kipindi cha pili kutipia Rashid Mandawa, lakini Kavumbagu alirejea tena nyavuni kuandika bao la tatu na lililokuwa la saba kwake msimu huu na kuipa ushindi muhimu mabingwa watetezi hao walifikisha pointi 20 baada ya mechi 10.
Azam imeiengua Mtibwa Sugar wenye pointi 17, ingawa wakata miwa hao wa Manungu wana mchezo mmoja mkononi na Jumamosi wanatarajiwa kuvaana na Ruvu Shooting uwanja wa Mabatini, wakati Azam watakuwa na kibarua kigumu jijini Dar dhidi ya Simba waliorejea upya kwenye ligi hiyo chini ya kocha Goran Kopunovic.
MSIMAMO LIGI KUU TANZANIA BARA 2014-2015
                                P   W    D    L    F    A   GD   Pts
01. Mtibwa Sugar     09  04  05  00  12  05  07   17
02. Azam                 10  06  02  02  14  07  07   20
03. JKT Ruvu           11  05  02  04   11   10  01  17
04. Yanga                09  04  03  02  11   07  04  15
05. Polisi Moro         11  03  06  02   09  08  01  15
06. Kagera Sugar     11  03  05  03   08  08  00  14
07. Coastal Union     10  03  04  03   09  08  01  13
08. Mgambo JKT       10  04  01  05   05  09  -4  13
09. Simba                09  02  06   01   09   07  02  12
10. Ruvu Shooting    11  03  03   05   05   08  -3  12
11. Mbeya City         09   03  02   04  04   06  -2   11
12. Stand Utd           11  02  05   04   07   13  -6  11
13. Ndanda Fc          11  03  01   07  10    16  -6  10
14. Prisons               10  01  05   04  06   08  -2   08
Wafungaji:
7- Didier Kavumbagu(Azam)
5- Ame Ali (Mtibwa), Rashid Mandawa (Kagera Sugar)
4- Rama Salim (Coastal), Danny Mrwanda, Simon Msuva (Yanga) Samuel Kamuntu (JKT Ruvu)
3- Ally Shomari, Emmanuel Okwi (Simba),  Jacob Massawe (Ndanda)

Ratiba ya mechi zijazo
Jan 24, 2015 
Azam vs Simba 
Kagera Sugar vs Ndanda
Stand Utd vs Coastal Union 
Polisi Moro vs Yanga

Mbeya City vs Prisons
Ruvu Shooting vs Mtibwa Sugar 
Jan 25, 2015JKT Ruvu vs Mgambo JKT

Chelsea, Liverpool hapatoshi leo Nusu Fainali Capital One

manahodha wa Liverpool, Steven Gerrerd na John Terry wa Chelsea watazibeba vipi timu zao kwenye mechi ya Capital One Cup leo?

Makocha Brendan Rodgers na Jose Mourinho watavuna nini?

ZOTE zikiwa zimetoka kupata ushindi muhimu viwanja vya ugenini kwenye mechi za Ligi Kuu ya England mwishoni mwa wiki, klabu za Chelsea na Liverpool leo zitakuwa vitani kwenye pambano la Nusu Fainali ya Kombe la Ligi (Capital One Cup).
Liverpool iliyotoka kuitoa nishai Aston Villa kwa kuicharaza mabao 2-0 siku ya Jumamosi, itakuwa uwanja wa Anfield kuikaribisha Chelsea walioitoa nishai Swansea City kwa kuifumua mabao 5-0 kwenye uwanja wa ugenini pia.
Pambano hilo litakalochezeshwa na mwamuzi Martin Atkinson, litazikutanisha timu hizo ambazo zilikutana Novemba 8 mwaka jana kwenye mechi ya ligi kwenye dimba hilo na wenyeji LIverpool kukubali kichapo cha mabao 2-1 toka wa wageni wao Chelsea.
Kocha  Jose Mourinho ana rekodi nzuri dhidi ya Liverpool, lakini hiyo haimpi jeuri ya kulidharau pambano hilo kama alivyonukuliwa mwenyewe akidai wanaenda Anfield kwa ajili ya kuska ushindi kujiweka pazuri kabla ya mechi ya marudiano wiki ijayoStanford Bridge.
Kwa mujibu wa rekodi zilizopo Jose Mourinho ameiongoza Chelsea dhidi ya Liverpool katika mechi 19 akishinda 10 na kupata sare michezo minne na kupoteza mitano.
Chelsea imefika kwenye hatua hiyo baada ya kuichapa timu ya Derby Count kwa mabao 3-1 wakati LIverpool iliing'oa AFC Bournemouth pia kwa magoli 3-1 na zitarudiana Jumanne ijayo.
Mechi nyingine ya nusu fainali ya michuano hiyo ya Kombe la Ligi itazikutanisha timu za Tottenham Hotspur dhidi ya Sheffield United mchezo utakaochezwa kesho kwenye uwanja wa White HartLane nyumbani kwa Spurs kabla ya timu hizo kurudiana Jumatano ijayo nyumbani kwa Sheffield United.

Ghana, Wasauzi wafa AFCON, leo zamu ya Ivory Coast, Cameroon

Algeria wakishangilia ushindi wao dhidi ya Bafana Bafana

Senegal walivyokuwa wakiiadhibu Ghana katika mechi ya kundi C

WAKATI timu za Senegal na Algeria wakianza vyema mechi zao za Fainali za Kombe la Mataifa ya Afrika , AFCON inayoendelea nchini Guinea ya Ikweta kwa kuzitandika timu za Ghana na Afrika Kusini, vigogo vingine vya soka Afrika, Ivory Coast na Cameroon zenyewe zitakuwa dimbani leo kujaribu bahati yao.
Ivory Coast na Cameroon zilizopo kundi D zitacheza mechi zao za kwanza za kukamilisha raundi ya kwanza ya makundi kwa kupepetana na Guinea na Mali katika mechi zitakazochezwa usiku wa leo katika mji wa Malabo.
Tembo wa Afrika, Ivory Coast wataanza kibarua chao mapema kwa kuumana na Guinea kabla ya Cameroon kuivaa Mali katika pambano la usiku.
Timu hizo zilizofanya vema kwenye mechi zao za kuwania kufuzu fainali hizo zitakuwa zikihitaji ushindi katika mechi zao ili kujiweka katika nafasi nzuri ya kusonga mbele baada ya 'vigogo' wenzao Ghana usiku wa jana kutolewa nishai na Senegal kwa kucharazwa mabao 2-1 huku Afrika Kusini ambao walifuzu fainali hizo bila kupoteza mchezo wowote katika kundi lake lililokuwa na mabingwa watetezi Nigeria waliokwama kwenda Guinea ya Ikweta ilinyukwa mabao 3-1 katika mechi za kundi la kifo la C.
Gervinho, Wilfried Bony wanatarajiwa kuiongoza Ivory Coast katika pambano la mapema usiku, ili kuibeba timu yao ambayo iliukosa mwaka 2012 michuano hiyo ilipofanyika katika nchi ya Guinea ya Ikweta iliyoshirikiana na Gabon kuziandaa fainali hizo zilizotwaliwa taji na Chipolopolo ya Zambia.
Mpaka sasa raundi ya kwanza ya makundi ikitarajiwa kukamilisha leo, ni timu tatu tu zilizoweza kupata ushindi katika mechi zao za awali, wakiwamo Gabon waliowatoa nishai Burkina Faso katika mechi za kundi A ambazo zitashuka tena dimbani kesho kwa mechi za pili ambapo wenyeji waliolazimishwa sare tya 1-1 na Jamhuri ya Kongo watavaana na Burkina Faso na vinara wa kundi hilo Gabon itaumana na Kongo.

Louis Van Gal awacharukia mashabiki Man Utd

Kocha Louis Van Gaal

KOCHA wa klabu ya Manchester United, Louis Van Gaal amesisitiza kuwa hakubadili mfumo wa kiuchezaji katika mchezo dhidi ya Queens park Rangers kutokana na malalamiko ya mashabiki.
Mashetani Wekundu hao walianza na mfumo wa kuchezesha mabeki watatu nyuma ilishindwa kuonyesha makeke mpaka walipobadilisha na kuanza kucheza 4-4-2 baada ya mashabiki kupaza sauti zao kutoka jukwaani ndipo matunda yalipoanza kuonekana.
Lakini Van Gaal amesema kubadili mfumo ilikuwa mipango yake ya kiufundi katika mchezo huo hivyo kwamba amesikiliza mashabiki walichokisema sio kweli.
Kocha huyo aliendelea kudai kuwa United ina mashabiki zaidi ya milioni 600 hivyo hadhani kama ataweza kuchukua maoni ya kila mshabiki. Van Gaal amesema kazi yake ni kuangalia, kuwasiliana, kuchambua na kuona makosa yanayofanywa na wachezaji wake wakiwa uwanjani na sio kusikiliza mashabiki wanasemaje.
Mashabiki hao wa Manchester City pia walionyeshwa kushangaza na kocha wao kumcheza Angel di Maria kama mshambuliaji na Wayne Rooney kucheza kama kiungo huku beki Jonas akiachiwa kupiga mipira ya kona.

Jennifer Mgendi kweli Sura Sio Roho, Goliati amchelewesha

BAADA ya kusumbua sokoni na filamu ya Mama Mkwe, muimbaji nyota wa muziki wa Injili na muigizaji wa filamu, Jennifer Mgendi yupo katika maandalizi ya kutengeneza filamu mpya iitwayo 'Sura Sio Roho' ambayo itawashirikisha wakali kadhaa wa fani hiyo nchini.
Akizungumza na MICHARAZO, Jennifer anayetamba kwa sasa na wimbo wa 'Wema ni Akiba' alisema filamu hiyo mpya inatarajiwa k
"Kwa sasa nipo katika maandalizi ya mwisho kabla ya kuanza kurekodi filamu yangu mpya itakayofahamika kwa jina la 'Sura Sio Roho' ambayo itawashirikisha wakali wanaotamba kwenye fani ya muziki wa Injili na filamu nchini," alisema Jennifer.
Mkali huyo ambaye anajiandaa kuitoa hadharani albamu yake mpya ya 'Wema ni Akiba' itakayokuwa na nyimbo nane, alisema filamu hiyo itaingia sokoni kabla ya sikukuu ya Pasaka inayotarajiwa kusherehekewa baadaye mwaka huu.
Kabla ya 'Mama Mkwe', Jennifer Mgendi alitamba na filamu kadhaa zikiwamo 'Teke la Mama', na 'Chai ya Moto'.

urekodiwa ikiwashirikisha wasanii kama mchekeshaji maarufu Senga, Mussa Banzi, Bahati Bukuku, Bi Eshter, yeye mwenyewe (Jennifer) na wengine.
Katika hatua nyingine muimbaji huyo alifichua sababu ya kukwama kwa albamu yake mpya  iitwayo 'Wema ni Akiba' na kudai imetokana na kutakakuongeza wimbo mwingine mpya utakaokuwa wa nane.
Jennifer aliutaja wimbo huo ulioichelewesha albamu hiyo ni  'Goliati', lakini akaahidi albamu hiyo itakuwa mtaani kabla ya kumalizika kwa mwezi huu wa Januari kwa sababu mambo yanaenda vema.
"Albamu yangu ya nane iitwayo 'Wema ni Akiba' imekwama kutokana kwa sababu nilikuwa namalizia wimbo mwingine wa nyongeza uitwao 'Goliati', nilikuwa nataka kuwapa burudani zaidi mashabiki wangu, nikaona nyimbo saba kama ni chache mno kwao, lakini sasa wajiandae kuipokea wakati wowote," alisema.
Jennifer alisema mara baada ya albamu hiyo upande wa 'audio' kuingia sokoni ataanza mchakato wa kutengeneza video yake ambayo amepanga kuitoa Juni mwaka huu kabla ya kuitengenezea filamu ambayo amepanga kuitoa mwezi Septemba.
"Video ya Wema ni Akiba itatoka Juni wakati filamu yenye jina kama hilo itakufuata mwezi Septemba na kazi yangu ya mwisho kwa mwaka huu wa 2015 nimepanga kutoa filamu iitwayo 'Goliati'," alisema.
Jennifer anayetamba na albamu ya 'Hongera Yesu' alisema ameiweka ratiba yake hadharani kwa kazi alizopanga kuzitoa mwaka huu ili mashabiki wake wajue kitu gani kitafuata baaada ya kingine kutoka kwake kwa mwaka 2015.

Kichupa kipya cha Avril ft Ommy Dimpoz-Hello baby

Wenyeji AFCON waanza na sare, Gabon yaua 2-0

Nahodha wa Guinea ya Ikweta, Emilio Nsue akiifungia timu yake bao katika mechi dhidi ya Kongo

Pierre-Emerick  Aubameyang akishangilia bao la kuongoza na Gabon wakati akiiongoza timu yake kushinda mabao 2-0 dhidi ya Burkina Faso (Picha:SuperSport)

Mashabiki wa soka nchini Guinea ya Ikweta wakimimika uwanjani kushuhudia ufunguzi wa michuano hiyo mjini Bata

BATA, Guinea ya Ikweta
FAINALI za Kombe la Mataifa ya Afrika (AFCON) zimeanza kwa kishindo kwa kushuhudiwa wenyeji, Guinea ya Ikweta ikilazimishwa sare ya 1-1 huku Gabon wakiifumua wanafainali zilizopita, Burkina Faso kwa mabao 2-0 katika mechi za ufunguzi zilizochezwa mjini Bata.
Wenyeji wakiwaanikizwa na washangiliaji wao, walitangulia kupata bao katika mechi ya mapema kupitia kwa Nsue aliyefunga katika dakika ya 16 kabla ya Kongo kuchomoa zikiwa zimesalia dakika tatu kupitia kwa Thievy Bifouma na kuwanusuru wakali kuambulia pointi moja katika kundi lao la A.
Katika mechi iliyofuata, Gabon ikiongoza na mshambuliaji nyota anayeichezea Borussia Dortmund, Pierre-Emerick Aubameyang wakipata ushindi wa mabao 2-0 dhidi ya Burkina Faso.
Aubameyang alianza kwa kufunga bao la kuomngoza katika dakika ya 19 kabla ya Malick Evouna kuongeza bao la pili lililowakatisha tamaa 'Farasi Weupe' wa Burkinabe baada ya kufunga bao katika dakika ya 72.
Katika mfululizo wa michuano hiyo leo timu za Kundi B zitashika dimba la Ebebiyin kwa  mabingwa mara tatu wa fainali hizo, Tunisia watavaana na Cape Verde huku  Zambia wakitarajiwa kuumana na DR Congo.
Zambia na DR Congo ndiyo watakaoanza kuumizana saa 1 usiku kabla ya Tunisia na Cape Verde kukutana katika mechi ya kisasi baada ya timu hizo kufanyiana mtimanyongo kwenye mechi za kuwania fainali za Kombe la Dunia kwa Tunisia kuichongea Cape Verde waliokuwa wamefuzu hatua ya mwisho kwa madai ya kumtumia mchezaji asiyestahili na Cape Verde kuzikosa fainali hizo, ingawa Tunisia walikwama licha ya kupeta katika rufaa yao baada ya kung'oka kwa Algeria walioenda kufanya maajabu kwa kufika raundi ya 16 Bora.
Jumla ya timu za mataifa 16 zinachuana kwenye fainali hizo ambazo zinachezwa Guinea ya Ikweta baada ya Morocco kugoma kuiandaa kwa madai ya kuhofia maambukizo ya Ugonjwa wa Ebola.
Kitu cha kustaajabisha ni kwamba waliokuwa mabingwa watetezi NIgeria wameshindwa kwenda kwenye fainali hizo zinazochezwa kuanzia jana na kutarajiwa kumalizika Februari 8 ambapo bingwa mpya atafahamika.

Hapatoshi leo England, Man City vs Arsenal

KIVUMBI cha Ligi Kuu ya England kinatarajiwa kuendelea leo kwa mechi mbili likiwamo linalovuta hisia za wengi litakalochezwa kwenye uwanja wa Etihad mjini Manchester kati ya wenyeji Manchester City dhidi ya Arsenal.
Pambano jingine la leo litazikutanisha timu za West Ham Utd watakaokuwa nyumbani kuwakaribisha Hull City katika uwanja wa Boleyn.
Mabingwa watetezi Manchester City wataikaribisha Arsenal wakitoka kulazimishwa sare katika mechi yao ya mwisho, ilihali Arsenal wakitoka kupata ushindi mnono wa mabao 3-0 dhidi ya Stoke City.
Ingawa Arsenal itakosa huduma za beki wake Mathieu Debuchy aliyeumia bega katika mechi yao iliyopita sambamba na kuwakosa wakali wengine ambao ni majeruhi kama ambavyo watetezi Man City watakavyokosa huduma za wakali wake akiwamo Yaya Toure na Wlifried Bony waliopo Afrika kwa sasa..
City itakuwa ikisaka ushindi nyumbani kuweza kuendelea kuwabana Chelsea wanaoongoza msimamo wa ligi hiyo wakati wao wakiwa wapo nafasi ya pili.
Watetezi hao wana pointi 47 wakati wapinzani wao Arsenal wakiwa na pointi 36 wakishika nafasi ya tano.
Ligi hiyo itaendelea kesho kwa pambano moja tu litakalozikutanisha timu za Everton dhidi ya West Bromwich Albion mechi itakayochezwa kwenye uwanja wa Goodson Park.