Eto'o, Xabi Alonso kama Lampard soka la kimataifa

Samuel Eto'o

Lampard

Xabi Alonso

SIKU chache baada ya Frank Lampard kutangaza kustaafu soka la kimataifa – jana ilikuwa siku nyingine kwa wanasoka wawili wa kimataifa barani nao walitangaza uamuzi wa kuachana na soka la kimataifa.

Samuel Eto’o na Xabi Alonso kwa wakati tofauti jana walitumia mitandao ya kijamii kutangaza uamuzi wao wa kuachana na soka la kimataifa.
Alianza Xabi Alonso kupitia mtandao wa Twitter kutangaza kustaafu kuichezea timu ya taifa ya Spain.
Kiungo huyo wa Real Madrid ameshaitumikia Spain kwa muda wa miaka 11 na ameifungia nchi hiyo magoli 16 katika mechi 114.
Wakati huo huo mfungaji mabao mengi zaidi wa timu ya taifa ya Cameroon Samuel Eto’o ametangaza kustaafu soka la kimataifa.
Mshambuliaji huyo ambaye ameifungia Cameroon mabao 56 amejiunga na Everton ya Uingereza juzi .
Kufuatia kauli hiyo mshambuliaji huyo sasa hatakuwepo katika kipindi chote cha cha kombe la mataifa bingwa barani Afrika mwezi Januari mwakani.
“Nataka kuwajuza kuwa nimestaafu mashindano yote ya kimataifa ”aliandika Etoo katika mtandao wake wa kijamii wa Instagram .

Bosi wa zamani wa TBS atupwa jela miaka mitatu

Charles Ekelege akiwa Mahakama ya Hakimu Mkazi Kisutu Dar es Salaam leo ambapo alihukumiwa kutumikia kifungo cha mwaka mmoja baada ya kupatikana na hatia ya matumizi mabaya ya madaraka na kulipa faini ya sh.milioni 68.

Ekelege akiteta jambo na kijana aliyedaiwa kuwa ni mtoto wake.

 Ekelege akiteta jambo na familia yake akiwa Mahakamani hapo.

Hapa Ekelege akiwa amekaa nje ya Mahakama hiyo na familia yake  kabla ya kuhukumiwa.

 Askari polisi akiwa na familia ya Ekelege (wa pili kulia), wakati akitoka kwenye mahakama hiyo ----

Aaliye kuwa Mkurugenzi wa Shirika la viwango Tanzania TBS Bw Charles Hekelege, ametiwa hatiani na kufungwa miaka mitatu jela baada ya kukutwa na kosa la kuhujumu uchumi. Hekelege amefungwa jumla ya miaka mitatu jela kwa makosa matatu kila kosa moja mwaka mmoja kwa maana hiyo atatumikia mwaka moja gerezani.

www.habariza jamii.com

Afande Bright aachia mpya za Injili

Kava la albamu ya Afande Bright linavyoonekana kwa wanayoitaka wanaweza kuwasiliana kwa namba zinazoonekana chini kushoto kwenye kava hilo

Afande Bright katika pozi

MSANII aliyekuwa anakuja juu kwenye muziki wa kizazi kipya aliyejitosa kwenye muziki wa Injili baada ya kuponea chupuchupu kufa ajalini, Bright Mbwilo 'Afande Bright' ameachia albamu yake ya kwanza ya miondoko hiyo mipya iitwayo 'Ahsante Bwana'.
Akizungumza na MICHARAZO, Bright alisema albamu hiyo ambayo kwa sasa ipo sokoni wakati akijipanga kuitengenezea video yake, ina nyimbo nane.
Bright alizitaja nyimbo hizo ni 'Ahsante Bwana', 'Upendo', 'Vita', 'Hamjui', 'Itakuwaje', 'Twakuheshimu', 'Jinsi Gani' na 'Vita Remix', huku akisema karibu nyimbo zote ni simulizi la kweli zilizowahi kumpata au kuwapata watu wake wa karibu.
"Baada ya kunusurika katika ajali mjini Morogoro, nimeamua kumgeukia Mungu na sasa naimba muziki wa Injili nikiwa nimeachia albamu inayofanya vyema sokoni na kwenye vituo vya redio iitwayo 'Ahsante Bwana' yenye nyimbo nane," alisem Bright.
Aliongeza kabla ya kutumbukia kwenye muziki huo wa kumtukuza MUNGU alikuwa kiimba muziki wa kizazi kipya na aliwahi kutoa albamu moja iliyofanya vyema sokoni iitwayo 'Tanzania' iliyokuwa na nyimbo nane.
Baadhi ya nyimbo hizo ni 'Tanzania', 'Ndani ya Dancehall', 'Zako Style', 'Kiza Kinene', 'Jakaya', 'Nimedata', 'Hawapendi', 'Watanzania', 'Nikiachwa leo' na 'Leave Me Alone'.

TFF yaongeza usajili kwa saa 48

Viongozi wakuu wa TFF

DIRISHA la usajili la Ligi Kuu ya Vodacom Tanzania Bara kwa wachezaji wazalendo limesogezwa mbele kwa Saa 48 kuanzia jana, kutokana na timu kushindwa kukamilisha usajili katika muda husika jana.
Akizungumza leo jijini Dar Katibu wa Shirikisho la Soka Tanzania (TFF), Selestine Mwesigwa alisema sababu za kusogeza mbele ni klabu zote za Ligi Kuu kushindwa kukamilisha usajili jana.
“Nadhani wameshindwa kuutumia huu mfumo wetu mpya wa elektroniki, sasa tumewapa Saa 48 zaidi warekebishe, zikiisha hizo, hapo hakuna nafasi tena, tunasonga mbele,” amesema Mwesigwa. 
Amesema kwamba hadi muda wa kufunga usajili jana Saa 6:00 usiku, ni timu moja tu, Kimondo FC ya Daraja la Kwanza ndiyo iliyokuwa imefanikiwa kukamilisha usajili wake katika mfumo huo. 
“Napenda kuchukua fursa hii kuwapongeza Kimondo kwa kumudu kuutumia mfumo huu na kuwasilisha usajili wao ndani ya muda,” amesema. 
Aidha, Mwesigwa amesema kwamba dirisha la usajili kwa wachezaji wa kigeni litafungwa Septemba 6, mwaka huu. 
“Hili dirisha la wachezaji wa kigeni likifungwa, hakuna nyongeza ya muda tena, kwa kuwa hili lipo katika mfumo wa kimataifa chini ya FIFA, likifungwa, limefungwa dunia nzima, hivyo nawasihi viongozi wa klabu wahakikishe hawafanyi makoasa,”amesema.  

Twiga Stars kwenda Bondeni kirafiki

KIKOSI cha timu ya Taifa ya Wanawake (Twiga Stars) inatarajia kuondoka nchini Ijumaa (Agosti 29 mwaka huu) kwenda Afrika Kusini kwa ajili ya mechi ya kirafiki na timu ya Taifa ya nchi hiyo (Banyana Banyana). Twiga Stars inakwenda huko kwa mwaliko wa Chama cha Mpira wa Miguu Afrika Kusini (SAFA) kwa ajili ya mechi hiyo itakayochezwa Jumapili (Agosti 31 mwaka huu) katika mji wa Polokwane.

Msafara wa timu hiyo utaongozwa na mjumbe wa Kamati ya Utendaji ya Shirikisho la Mpira wa Miguu Tanzania (TFF), Saloum ambapo utajumuisha wachezaji 18 na benchi la ufundi lenye watu watano.
Wachezaji kwenye msafara huo ni Amina Bilali, Anastaz Katunzi, Asha Rashid, Donisia Minja, Esther Chabruma, Etoe Mlenzi, Fatuma Jawadu, Fatuma Makusanya, Fatuma Maonya, Fatuma Swaleh, Happiness Mwaipaja, Maimuna Said, Mwajuma Abdillahi, Mwanahamis Shurua, Shelda Mafuru, Sophia Mwasikili, Therese Yona na Zena Rashid.
Benchi la Ufundi linaongozwa na Kocha Rogasian Kaijage, na msaidizi wake Nasra Mohamed. Wengine ni Christine Luambano (daktari), Furaha Mnele (Meneja) na Mwanahamisi Nyomi (mtunza vifaa). Timu hiyo inatarajia kurejea nchini Septemba 2 mwaka huu kwa ndege ya Fastjet.

Breaking News: Okwii arejea Simba kama utani

Emmanuel Okwi karudi nyumbani Msimbazi

WAKATI Shirikisho la Soka Tanzania (TFF) likiongeza muda wa usajili kwa saa 48, klabu ya Simba imemrudisha kundini kiungo wao mshambuliaji, Mganda Emmanuel Okwi.
Okwi aliyekuwa akiichezea Yanga imedaiwa amekamilisha usajili wake wa kukipiga Simba na tayari jina lake ni miongoni mwa majina 29 yaliyopelekwa TFF kwa ajili ya kuombewa usajili kwa msimu mpya wa Ligi Kuu Tanzania Bara itakayoanza Septemba 20.
Mwenyekiti wa Kamati ya usajili ya Simba, Zakaria Hanspope amethibitisha kumsainisha miaka miwili mshambuliaji huyo anayeichezea pia timu ya taifa ya Uganda The Cranes.
Kurejea kwa Okwi ndani ya Msimbazi ni kama imeirahisishia kazi Yanga iliyokuwa njia panda kuamua nani ikate jina lake kati ya nyota wake wa kigeni sita waliokuwa wapo kwenyue kikosi chao.
"Ni kweli Okwi tumemsajili kwa miaka miwili na atakuwa kwenye kikosi cha Simba kwa msimu ujao," Hanspope amenukulia akisema kwa kujiamini.
Yanga ilikuwa katika sintofahamu ya kuamua imuache nani kati ya Okwi na Jaja Brazil aliyepigiwa debe na kocha Marcio Maximo, ambaye hata hivyo uongozi ya Jangwani ulikuwa haujaridhika naye.
Hayo yakijiri TFF imeongeza siku mbili zaidi za usajili wa wachezaji wa ndani ingawa zoezi hilo lililikuwa limekamilika usiku wa jana.
Kwa usajili wa Mapro zoezi litaendelea hadi Jumamosi ijayo yaani Septemba 6.

Sanchez aibeba Arsenal, Napoli hoi Ulaya

Cazorla akishangilia nao la sanchez. Yeye alikosa penati usiku huu

Sanchez akishangilia bao lake

Welshere akisikitika baada ya kukosa bao

Nenda nje bwana we si uonyeki mara moja'

Sanchez akifunga bao la Arsenal

Mathieu Debuchy akisikitika baada ya kulimwa kadi ya pili ya njano iliyoambana na nyekudnu na kutolewa uwanjani usiku huu.

Oyooooooooooooo!

STRIKA mpya wa Arsenal kutoka Chile, Alexis Sanchez  usiku huu ameibuka shujaa baada ya kuivusha timu yake hiyo kwenye hatua ya makundi kwa mwaka wa 17 mfululizo baada ya kufunga bao pekee dhidi ya Besiktas ya Uturuki.
Katika mchezo huo Arsenal ilijikuta wakicheza pungufu baada ya Methieu Debuchy kulimwa kadi nyekundu baada ya kupewa kadi mbili za njano, moja kila kipindi katika pambano hilo lililochezwa uwanja wa Emirates, mjini London.
Sanchez aliyesajiliw ana Arsenal hivi karibuni akitokea Barcelona alifunga bao hilo pekee katika dakika ya 45 za kipindi cha kwanza akimalizia kazi nzuri ya Jack Wilshere na kuifanya Ze Gunnerz kufuzu kwa ushindi wa jumla wa bao 1-0.
Katika mechi ya kwanza baina ya timu hiyo wiki iliyopita zilishindwa kutambiana kwa kutofungana mjini Instabul.
Katika mechi nyingine za Ligi hiyo ya mabingwa Ulaya,  Malmo ya Sweden iliitambia Salzburg ya Uswisi kwa kuichapa mabao 3-0 na kufuzu kwa jumla ya mabao 4-2 kwani katika mechi ya kwanza Malmo walifungwa mabao 2-1 ugenini.
Bayer Leverkusen wakiwa nyumbani nchini Ujerumani walipata ushindi mnono wa mabao 4-0 dhidi ya  Copenhagen na kufuzu kwa mabao 7-2 kwani mechi ya awali walishinda ugenini mabao 3-2, huku Athletico Bilbao ikiizima napoli kwa mabao 3-1 baada ya wiki iliyopita kutoshana nguvu ya kufungana bao 1-1.

Diamond azidi kutusua kimataifa, Mdogomdogo wambeba

NYOTA wa muziki wa kizazi kipya nchini, Nasib Abdul 'Diamond' amezidi kuangukiwa na neema ibaada ya kuteuliwa kuwania tuzo za muziki za kimataifa za IRAWMA kupitia wimbo wake mpya wa Mdogo Mdogo.

Nyimbo nyingine zilizopo katika kinyang'anyiro hicho katika category ya 'Best African Song/Entertainer' ni pamoja na Aye wa Davido toka Nigeria, Bundeke wa Awilo Longomba toka Congo, Tam Tam wa Willy Paul Msafi toka Kenya, Sitya Loss wa Eddy Kenzo toka Uganda na Mama Africa wa Brakets toka Nigeria

Hii ni mara ya nne kwa Diamond kupenya kwenye tuzo za kimataifa baada ya mwaka huu kuteuliwa kuwania tuzo za MTV za Afrika Kusini, BET za Marekani na AFRIMMA ambapo ndipo pekee alipoibuka kidedea.

Kuteuliwa kuwania tuzo hizo za sasa zinazidi kumpa nafasi msanii huyo kuzidi kutamba anga la kimataifa.

Sijadungwa Mimba na Mchungaji Gwajima-Flora Mbasha

NYOTA wa muziki wa Injili nchini, ambaye pia ni Mke wa Emmanuel Mbasha amefunguka na kusema kuwa hana mahusiano yoyote ya kimapenzi na na Mchungaji wa Kanisa la kanisa la Ufufuo na Uzima Josephat Gwajima,

Flora Mbasha akichat Live katika ukurasa wa Facebook wa EATV, amefunguka na kusema kuwa hata mimba aliyonayo siyo ya mchungaji Gwajima kama inavyopakaziwa na baadhi ya vyombo vya habari.

Flora amesema hayo leo alipokuwa akichat Live kupitia ukurasa wa Facebook wa EATV katika kipengele cha Kikaangoni Live kinachofanyika kila siku ya Jumatano kuanzia saa Sita kamili.
Flora amesema kuwa hawezi kuwa na mahusiano ya kimapenzi na mtu ambae ni ndugu yake hivyo
Mchungaji Gwajima ni mjomba wake na si mpenzi wake kama ambavyo watu wamekuwa wakizusha kwa lengo la kumchafua na kumshushia hadhi.
"Hayo ni maneno tu ya watu mtaani ila Mchungaji
Gwajima ni mtumishi wa Mungu na ni uncle wangu ninawezaje kuwa na mahusiano na uncle wangu..? " Alisema Flora, wakati akijibu ya maswali ya mashabiki ambayo mengi yao yalikuwa yakimtuhumu na huku watu wengi wakitaka kujua ukweli juu ya ugomvi uliopo kati yake na Mumeo kama ni kweli au ni skendo tu za magazeti.
Flora aliweka wazi kuwa kuna vyombo vya habari ambavyo vimekuwa na lengo la kumchafua na kumualibia sifa ndio maana walitumia gharama kubwa kufanya wanavyoweza ili kutimiza malengo yao.
Muimbaji huyo amedai kuwa alimua kukaa kimya kwa kuwa hakukuwa na ukweli wowote.
"Hizo stori mnazosikia hazina ukweli wowote na ndio maana niliamua kukaa kimya sikutaka kujibizana kwenye vyombo vya habari kwa uongo wa
baadhi ya magazeti ya udaku ila ninasikitika sana kwani kuna watu wamekaa na kujipanga kisawa sawa kwa ajili ya kuhakikisha wanaharibu huduma yangu kwa gharama zozote, lakini bado ninasonga mbele kwani mwanzilishi wa huduma yangu ni Mungu na huyo ndiye atakayeimaliza na sio mwanadamu. 
"Hata hivyo ninawashukuru kwa kuwa wamenitabilia nkuja kumiliki jumba na magari ya kifahari ingawa yote ni ubatili"
 
HAJAACHANA NA MBASHA KWA AJILI YA GWAJIMA
Flora Mbasha amesema kuwa watu wengi wanasema kuwa ameachana na Mumewe kisa Gwajima hilo swala halina ukweli wowote hajaachana na Mbasha sababu ya Gwajima na amedai kuwa bado anampenda sana ila anampenda Mungu zaidi.
Ila amekuwa na matatizo katika ndoa yake kati yake na mumewe na ni matatizo yao ya ndani ambayo asingependa kuyaweka wazi katika vyombo vya habari maana kufanya hivyo ni sawa na kumvunjia heshima mumewe, maana mambo ya chumbani ni siri yao wenyewe asingependa kuwa wazi sababu wanamtoto mkubwa sasa.
"Sijamwacha mume wangu sababu ya Gwajima na kweli bado napenda sana Mbasha lakini nampenda zaidi Mungu"
Wakati anazungumzia suala hili Flora ameweka wazi kuwa kwa sasa ni mjamzito na ujauzito huo ni wa Mume wake ambae ni Emmanuel Mbasha maana ameishi nae katika ndoa zaidi ya miaka kumi na katika kipindi chote hicho hajawahi hata siku moja kumsaliti Mumewe na kwenda kwenye michepuko hivyo huo ujauzito ni wa Mume wake Emmanuel Mbasha na siyo Gwajima.

Balotelli aandaliwa kuiua Spurs Jumapili

Balotelli akiwa na wachezaji wenzake wakifanya mazoezi

KOCHA Brendan Rodgers wa Liverpool ameweka bayana kwamba anatarajia kumtumia Mario Balotelli, mshambuliaji wake mpya waliyemsajili akitokea AC Milan kwa mechi yao ya Jumapili dhidi ya Tottenham Hotspur.
Nyota huyo wa Italia alijiunga na vijogoo hao wa Merseyside na kuishuhudia Liverpool ikikanyagwa mabao 3-1 na Manchester City walipoifuata Etihad, uwanja aliokuwa akiiutumia strika huyo miezi sita iliyopita.
Rodgers, aliuambia mtandao kwamba anamuandaa nyota huyo mwenye vituko ambaye tayari ameanza kuyazoea mazingira ya Anfield kwa kufanya mazoezi na wenzake ili kuwakabili vinara hao wa ligi, Spurs kwenye uwanja wa ugenini wa White Hartlane.
"Nadhani wikiendi hii atakuwa tayari kuanza kuitumia timu," kocha Rodgers alisema.
Vijogoo hao walioanza ligi kwa kishindo kwa kuifunga Southampton kwa mabao 2-1 na kushtukizwa na mabingwa watetezi kwa kulazwa mabao 3-1 huku Balotelli akishuhudia jukwaani.

Crystal Palace yamrejesha Neil Warnock klabuni

Kocha Warnock aliyerejea tena Crystal Palace

KLABU ya Crystal Palace imemrejesha kikosini aliyekuwa meneja wake, Neil Warnock.
Kocha huyo alitimka katika klabu hiyo 2010 kwenda kuiongoza QPR na kuipandisha Ligi Kuu kabla ya kutimuliwa mwaka 2012 amesaini mkataba wa miaka miwili kuinoa timu hiyo ambayo ilikuwa ikifundishwa na Keith Millen.
"Neil amekubali kusaini mkataba wa miaka miwili na anatarajiwa kuongoza timu katika pambano la Jumamosi dhidi ya Newcastle United," Mtandao wa klabu hiyo (www.cpfc.co.uk) uliandika leo Jumatano.

Huu ndio ujio mpya wa Benjamini wa Mambo Jambo

MWANAMUZIKI Benjamin wa Mambo Jambo ameamua kuvunja ukimya akijiandaa kurudi kwa kishindo na ngoma mpya inayofahamika kama Kata K. Mwanamuziki huyo amebainisha kuwa alikuwa masomoni kiasi cha kushindwa kuwashushia mashabiki wake burudani zilizozoeleka, ila kwa sasa amewataka mashabiki hao kaeni mkao wa kula kwani amerejea kimoja katika 'game'.

Manchester United yahaha kusaka saini ya Arturo Vidal

KIPIGO cha aibu cha mabao 4-0 toka kwa timu ya daraja la kwanza ya MK Dons waliowang'oa kwenye Kombe la Ligi kimemzindua Kocha wa Manchester United, Luis Van Gaal ambaye amehamishia nguvu zake kumnasa kiungo wa Juventus, Arturo Vidal.
Van Gaal na Afisa mkuu wa klabu hiyo Ed Woodward wanahaha kusaka saini ya Vidal baada ya kumaliza kusajili Angel Di Maria jana. 
United imekuwa ikipinga kumhitaji Vidal kwa kipindi kirefu lakini sasa wanadaiwa kuanza mazungumzo kama wanayofanya dhidi ya Ajax Amsterdam kwa ajili ya kumsajili Daley Blind. 
Majeruhi pekee ndiyo yalioonekana kumzuia Van Gaal kumsajili nyota huyo wa kimataifa wa Chile ambaye ana thamani ya paundi milioni 30 lakini kutokana na matokeo mabovu ya hivi karibuni klabu imeona hakuna jinsi bali kutumia fedha ili wajiimarishe. 
Upasuaji wa goti msimu uliopita ulimzuia Vidal kuitumikia Juventus toka mwishoni mwa Machi mwaka huu ingawa baadae alipona na kupata muda wa kuwepo katika kikosi cha Chile katika michuano ya Kombe la Dunia. 
Ujio wa Vidal, 27 United kutasaidia kuimarisha safu ya kiungo ambayo imeonekana kuyumba na kupelekea kipigo cha mabao 4-0 jana dhidi ya timu ya daraja la chini ya MK Dons katika mchezo wa Kombe la Ligi. 
Kama United wakifanikiwa kumsajili Vidal watakuwa wamefikisha kiasi cha paundi milioni 150 walizotumia msimu huu kwa ajili ya usajili baada ya kuvunja rekodi nchini Uingereza kwa uhamisho wa Di Maria.

Morocco yaikwepa Stars, sasa kukipiga na Burundi

Morocco iliyoichomolea Stars

MOROCCO imechomoa kucheza na Tanzania katika kalenda ya FIFA na sasa Taifa Stars itacheza na Burundi Septemba 5, mwaka huu mjini Bujumbura.
Katibu wa Shirikisho la Soka Tanzania (TFF), Selestine Mwesigwa amesema Morocco imejitoa kwa sababu imesema haitaweza kuwapata wachezaji wake wa kimataifa.
Mwesigwa amesema sasa Taifa Stars itacheza na Burundi mjini Bujumbura siku hiyo hiyo. Burundi iliitoa nishai Stars siku ya Uhuru kwa kuilaza mabao 3-0.
Kocha Mholanzi, Mart Nooij, tayari ameita kikosi cha wachezaji 26 kwa ajili ya mchezo huo.

Hao ni makipa; Deogratias Munishi (Yanga) na Mwadini Ali (Azam). Mabeki ni Said Morad (Azam), Oscar Joshua (Yanga), Shomari Kapombe (Azam), Nadir Haroub (Yanga), Kelvin Yondani (Yanga SC), Aggrey Morris (Azam), Joram Mgeveke (Simba) na Charles Edward (Yanga).
Viungo; Erasto Nyoni (Azam), Mwinyi Kazimoto (Al Markhiya, Qatar), Amri Kiemba (Simba), Himid Mao (Azam), Salum Abubakar (Azam), Said Ndemla (Simba), Said Juma (Yanga) na Haruna Chanongo (Simba).
Washambuliaji; John Bocco (Azam), Khamis Mcha (Azam), Simon Msuva (Yanga), Thomas Ulimwengu (TP Mazembe, DRC), Mbwana Samata (TP Mazembe, DRC), Mrisho Ngassa (Yanga), Mwegane Yeya (Mbeya City) na Juma Liuzio (ZESCO, Zambia).
Kikosi hicho kinatarajiwa kuingia kambini Jumapili (Agosti 31 mwaka huu) mchana katika hoteli ya Accomondia mjini Dar es Salaam na kitakuwa kikifanya mazoezi Uwanja wa Karume, Dar es Salaam.

Ebola waitisha Congo, yagoma kwenda Nigeria

NCHI ya Congo imetangaza kugoma kwenda Nigeria kucheza pambano lao la kuwania kufuzu Fainali za Afrika za 2015 kwa ilichodai inahofia tisho la ugonjwa wa Ebola.
Hata hivyo Shirikisho la Soka la Nigeria (NFF) limedai kuwa halijapata taarifa yoyote rasmi kutoka Shirikisho la Soka la Afrika-CAF juu ya madai ya Congo Brazzaville kuelekea katika mchezo huo uliopangwa kuchezwa huko Calabar. 
Congo ambao watakuwa wageni wa Nigeria katika mchezo huo utakaochezwa Septemba 6 mwaka huu wametuma malalamiko CAF kueleza wasiwasi wao juu usalama katika mchezo huo. 
Congo wamesisitiza hawatakwenda katika mji wa Calabar au mwingine wowote nchini Nigeria kwa ajili ya mchezo huo kufuatia mlipuko wa ugonjwa wa Ebola.
Ugonjwa huo usiokuwa na tibaumeripotiwa kuua zaidi za watu 1427 katika miji ya nchi za Liberia, Guinea, Sierra Leone na Nigeria, huku wengine  zaidi ya 2,615 wakiambukizwa toka ugonjwa huo ulipolipuka Machi mwaka huu. 
Kocha wa timu ya taifa ya Congo, Claude Leroy amesema itakuwa ngumu na hatari kwenda Nigeria kwa ajili ya mchezo huo na kudai kuwa hata majirani zao Cameroon tayari wamefunga mipaka yao ili kuepusha maambukizi zaidi. 
Hata hivyo NFF wamesisitiza kuwa mchezo utafanyika kama ulivyopangwa katika Uwanja wa UJ Esuene uliopo mji wa Calabar.

Chegge atambia video ya Wauwe

NYOTA wa muziki wa kizazi kipya nchini, Said Chegge 'Chegge Chigunda' ametamba video yao mpya ya wimbo 'Wauwe' ni funika bovu na anaamini itasumbua katika vituo vya runinga ndani na nje ya nchi.
Chegge aliyeshirikiana na Mheshimiwa Temba kutoa wimbo na video hiyo aliiambia MICHARAZO kuwa, ukali wa video hiyo unathibitisha Watanzania wanavyoweza kutengeneza kazi kinyume na wanaokimbilia nje ya nchi.
"Hatujisifu, lakini video ya 'Wauwe'  imetulia na ni bonge la kazi ambayo inathibitisha kuwa wapo Watanzania wenye uwezo mkubwa wa kuzalisha video tofauti na tazamo wa baadhi ya wasanii kukimbilia nje," alisema.
Chegge alisema kazi kubwa iliyofanywa na Adam Juma wa Next Level itazidi kuliweka kundi lao la TMK Wanaume Family matawi ya juu.
Wimbo huo Chegge na Mhe Temba wameshirikiana na mkali wa Moto Band aliyeibuliwa na kituo cha Mkubwa na Wanae, Maromboso na video yake imewajumuisha nyota mbalimbali akiwamo Jokate na Julio wa Big Brother

Tanzania Kwanza yaishutumu UKAWA kwa kiburi

Augostino Matefu (kulia)

Viongozi wakuu wa UKAWA wanaoshutumiwa na Tanzania Kwanza

NA SULEIMAN MSUYAWAKATI Wabunge wajumbe wa Bunge la Katiba Wanaounga Mkono Rasimu iliyotolewa na iliyokuwa Tume ya Rasimu ya Katiba wakijulikana kwa jina maarufu la (UKAWA) wakiendelea na msimamo wao wa kutorejea Bungeni Kamati ya Tanzania Kwanza imewashutumu kuwa kiburi chao kinasababishwa na wafadhili kutoka Ujerumani na Uholanzi.
Hayo yamebainishwa na Mwenyekiti wa Kamati hiyo Augustino Matefu wakati akizungumza na mwandishi wa habari hii jijini Dar es Salaam.
Alisema takribani wiki moja iliyopita alipozungumza na wanahabari alitoa siku saba za UKAWA kurejea Bungeni na kinyume cha hivyo ataweka wazi juu ya nini kinawapa kiburi wabunge hao.
Matefu alisema  vyama vya CDU na Consecutive  kupitia benki moja kubwa ya nchini Ujerumani na taasisi inayojulikana kwa jina la (KAS) wamekuwa wakiwapatia viongozi wawili wa Chama Cha Demokrasia na Maendeleo (CHADEMA) fedha haramu zaidi ya bilioni 4.6 kwa lengo la kugomea bunge la katiba linaloendelea mkoani Dodoma.
“UKAWA wanapokea fedha kutoka Ujerumani ndio maana wanakataa kuingia bungeni na kama kuna mtu anabisha aende mahakamani na sisi tunaonyesha ushahidi kwani fedha hizo zimeingia katika akaunti ya Freeman Mbowe na Dk. Wilbrod  Slaa na ipo taasisi hapa nchini ndio inapokea”, alisema
Alisema vyama hivyo vya siasa vinavyosaidia UKAWA kupitia viongozi wakuu wa CHADEMA vina lengo la kuvunja amani ya nchi jambo ambalo Tanzania Kwanza hawawezi kulivumilia.
Mwenyekiti huyo alisema UKAWA kupitia akaunti ya Mbowe na Slaa mnamo tarehe 4 hadi 15 mwezi Machi waliingiziwa shilingi bilioni 1.7, mwezi Machi huo tarehe 26 mwaka huu UKAWA walipokea shilingi milioni 380 kupitia akaunti ya Mbowe.
Matefu alisema hivi majuzi Mbowe amepokea shilingi milioni 580 kwa lengo la kufadhili maandamano ambayo kwa mujibu wa Matefu yataweka nchi hatarini ambapo aliomba Watanzania kutounga mkono.
Aidha alisema hivi karibuni vyama hivyo vya Ujerumani vimeahidi kuingizia vyama vya umoja wa UKAWA shilingi bilioni 4.6 hiyo ikiwa ni baada CHADEMA kuonyesha msimamo wa kutoridhia maridhioano na chama tawala CCM kwa kile anachodai Matefu kuwa CCM itaongoza milele.
Mwisho.

Wajasiriamali 200 wapewa mafunzo Kanda ya Ziwa

NA SULEIMAN MSUYA
ZAIDI ya Wajasiriamali 200 kutoka katika mikoa mbalimbali ya Kanda ya Ziwa wameshiriki mafunzo ya jinsi ya kuandaa bidhaa kabla ya kuingia sokoni yaliyoandaliwa na kampuni ya Usalama Chakula na Ubora (Food Safety and Quality Consultancy Co. Limited) jijini Mwanza.
Hayo yamebainishwa na Mkurugenzi Mtendaji wa kampuni hiyo Petronella Mlowe wakati akizungumza na mwandishi wa habari kwa njia ya simu akiwa mkoani Mwanza.
Mlowe alisema katika mafunzo hayo yaliyofanyika jana na leo jijini Mwanza yamepata mafanikio makubwa kwa kuwepo kwa mwitikio kwa wajasiriamali wakiume zaidi ya wanawake.
Alisema pamoja na mwitikio mkubwa kutoka kwa wajasiriamali amebaini kutokuwepo kwa elimu ya kutosha kwa wahusika wa mafunzo hayo hasa kwenye maandalizi ya bidhaa jambo ambalo amesema kuwa ni muhimu serikali ikatumia vyombo vyake kuwajengea uwezo wajasiriamali.
“Mafunzo yamekuwa ya mafanikio makubwa sana hasa kwa wanaume wengi wamejitokeza jambo ambalo limenipa matumaini ya kuendelea na kampeni hii ambayo ina lengo la kukuza uchumi wa wa wajasiriamali wa Kitanzania”, alisema.
Mkurugenzi huyo alisema mafunzo hayo yalishirikisha wajasiriamali kutoka mikoa ya Mwanza, Shinyanga, Bukoba na Geita ambapo waliomba kampuni hiyo kuendelea na mpango huo ili kuhakikisha kuwa wanapata mafanikio.
Alisema wajasiriliamali wengi ni wale ambao wanajihusisha na uuzaji wa asali, maembe, chili, pilipili na bidhaa nyingine mbalimbali ambazo zimekuwa zikiuzwa katika soko la ndani ila la nje hazipatikani.
Pia alitoa wito kwa asasi, taasisi na mashirika mengine ambayo yanajihusisha na kuelimisha kutoa elimu ya jinsi ya kuandaa bidhaa hasa katika kuweka lebo ili kuhakikisha kuwa ubora wa bidhaa unapatikana ili kuleta ushindani wa ndani na nje ya nchi.
Mlowe alisema kampuni yao itaendelea kushirikiana na wajasiriamali ambapo zoezi hilo linaendelea katika mkoa wa Dar es Salaam kuanzia tarehe 28 hadi 29 mwezi huu lengo likiwa ni kuhakikisha kuwa wajasiriamali wanapata uelewa mzuri juu ya uandaji wa bidhaa.

Eto'o hatimaye aangukia miaka miwili Everton

Samuel Eto'o akisaini mkataba wa kuichezea Everton

Samuel Oto'o

MSHAMBULIAJI nyota wa nchi ya Cameroon aliyekuwa akiichezea Chelsea kabla ya kumaliza mkataba wake wa mwaka mmoja hivi karibuni, Samue Eto'o amesaini rasmi mkataba wa miaka miwili wa kukipiga Everton.

Awali Eto'o alikuwa akitajwa kunyemelewa na Liverpool lakini ujio wa Muitalia Mario Balotelli ulimfanya nyota huyo wa zamani wa Barcelona na Inter Milan kutua kwa Ze Toffies.

Zitto Kabwe ajitosa 'bifu' la Diamond, Ali Kiba

Zitto Kabwe kati kati na wasanii wa Leka Dutigite

Ali Kiba na Diamond ambao wanadaiwa hawaivi, japo Kiba amekanusha taarifa hizo akidai hana 'bifu' na Diamond

MBUNGE wa Kigoma Kaskazini (Chadema), Zitto Kabwe, amejitosa kusuluhisha ugomvi wa muda mrefu wa wasanii wawili wa muziku wa kizazi kipya nchini, Ali Kiba na Nasibu Abdul 'Diamond'.
Zitto alitoa kauli hiyo juzi wakati akihojiwa katika Kipindi cha Mkasi kinachorushwa na Kituo cha Televisheni cha EATV baada ya kuulizwa kuwa ni jitihada gani amezifanya kusuluhisha ugomvi wa wasanii hao akiwa kama mlezi wa wasanii wanaotoka mkoani Kigoma.
Alisema anafahamu kuwapo kwa ugomvi wa kutoelewana kati ya wasanii Ali Kiba na Diamond na kwamba alishawahi kufanya jitihada za kuwaita kila mmoja kwa nyakati tofauti.
Alifafanua kuwa katika kuhakikisha anawasuluhisha wasanii hao, anaifanya kazi hiyo kwa umakini kwa sababu hataki kuonekana anaingilia maisha ya watu na kwamba ana imani atafanikiwa kuwapatanisha.
Kuhusu madai kwamba ana uhusiano wa kimapenzi na msanii Mwasiti Almas, alisema ni kweli kumekuwapo na uvumi huo lakini kimsingi hana uhusiano wowote wa kimapenzi na msanii huyo.
"Nasikitishwa na madai hayo yanayotolewa na baadhi ya watu, Mwasiti ni kama dada yangu ambaye nimekuwa nikimsaidia katika kazi zake, kuhusishwa naye kimapenzi ni jambo linalonisononesha,"alisema.
Zitto alisema wanaomhusisha katika suala la mapenzi na msanii huyo ni kwa sababu Mwasiti ameimba wimbo ambao amemtaja yeye (Zitto) lakini kiukweli hana uhusiani naye wa kimapenzi.
Alipoulizwa ni lini ataoa, alisema bado 'yupo yupo' na kwamba kuna mwanamke aliyemtaja kwa jina la Jack ambaye amezaa naye mtoto ambaye kwa sasa miaka nane na anasoma darasa la pili nchini Uganda.
Zitto alizungumzia pia kampuni ya Leka Dutigite inayounganisha wasanii wa Kigoma All Stars, na kusea kuwa ni kampuni ambayo kila msanii anayetoka mkoani Kigoma ana hisa na ikipata faida wanagawana.
Zitto alisema Leka Dutigite pia inamiliki kampuni nyingine ambayo imekuwa ikipata kazi mfano katika Shirika la Hifadhi za Taifa (Tanapa) na yeye kama mlezi amekuwa akitoa fedha zake kusaidia.

Hatimaye Di Maria rasmi Man Utd

HATIMAYE Muargentina, Angel Di Maria ametua na kusaini mkataba wa miaka mitano kuichezea Manchester United.

Mkataba huo ndiyo rekodi mpya ya usajili baada ya Man United kukubali kutoa pauni milioni 59.7 ambazo ni pauni milioni 60 ili kumpata.

Atakuwa akilamba mshahara wa pauni 200,000 kwa wiki, anachukua nafasi ya pili kwa mshahara mkubwa baada ya nahodha wake, Wayne Rooney.

Mchezaji huyo hata hivyo aliingia Old Trafford na mguu mbaya baada ya klabu yake hiyo kulambwa mabao 4-0 na timu ya Daraja la Kwanza katika mechi ya Kombe la Ligi na anategemea kuwemo katika kikosi cha Mashetani hao Wekundu katika mechi ya Ligi Kuu siku ya Jumamosi dhidiya Banley.

Giroud awapa presha Arsenal

HUENDA Olivier Giroud akakaa nje ya dimba kwa miezi mitatu ijayo baada ya vipimo kuonyesha kuwa amevunjika mfupa katika unyayo wakati wa mechi dhidi ya Everton Jumapili kwenye Uwanja wa Goodison Park, kwa mujibu taarifa kutoka Ufaransa.
Jarida la Ufaransa la L'Equipe limeripoti matokeo hayo ya majeraha ya Giroud yamezua hofu kwa Kocha wa Arsenal, Arsene Wenger na kwamba sasa atalazimika kurudi sokoni kwa kasi kununua mshambuliaji.
Wenger alikuwa amesisitiza kwamba hana mpango wa kusajili mshambuliaji katika dirisha hili la usajili wa majira ya joto, akiamini kuwa usajili mpya wa Alexis Sanchez, huku hivi karibuni Theo Walcott akitarajiwa kurejea pamoja na uwapo wa Yaya Sanogo kungemwezesha kuwa na safu bora ya ushambuliaji.
Hata hivyo, kitendo cha Giroud kutokea benchi katika Uwanja wa Goodison Park Jumamosi na kusawazisha kulimpa matumaini kocha huyo, hatua iliyomfanya kumtabiria kuwa atamaliza Ligi Kuu England akiwa na mabao 25.
Kama taarifa hizo zitathibitishwa, mipango yake hiyo itafanyiwa mabadiliko, wakati huu ambao chumba cha majeruhi cha  Arsenal kikianza kusheheni wagonjwa ndani ya wiki mbili hizi za mwanzo wa msimu mpya.
Kuwa majeruhi kwa Giroud, kutamlazimisha Wenger kusaka huduma ya mshambuliaji wa Queens Park Rangers, Loic Remy, licha ya mapema majira haya ya joto kutupilia mbali uwezekano wa kumsajili Mfaransa huyo.

Arsenal katika mtihani mzito leo Ulaya

WAKATI kiungo wake mahiri, Jack Wilshere akiamini kuwa sare ya 2-2 waliyopata na Everton mwishoni mwa wiki itawasaidia kuwapoa morali wa kufanya vyema katika Ligi ya Mabingwa Ulaya, Arsenal ina mtihani mgumu leo.

Klabu hiyo ya meneja Arsene Wenger inaikaribisha Besiktas ya Uturuki katika mechi ya marudiano ya mtoano wa Ligi ya Mabingwa Ulaya, Ze Gunnerz wakihitaji ushindi ili kuingia kwenye makundi.

Katika mechi ya mkondo wa kwanza timu hizo zilipokutana mjini Instabul, zilishindwa kutambiana baada ya kutoka sare ya bila magoli, huku Arsenal ikimpoteza nyota wake kwa kupewa kadi mbili za njano na kufuatia nyekundu.

Walshere anaamini Arsenal wapo poa baada ya kufanikiwa kutoka nyuma kwa kufungwa mabao 2-0 na kufanikiwa kutoa sare ya mabao 2-2 dhidi ya Everton Jumamosi iliyopita. 

Akihojiwa Wilshere amesema alama waliyopata dhidi ya everton ilikuwa ni muhimu kwani inawapa nguvu kwa ajili ya mchezo wao wa leo ambapo sare ya aina yoyote inaweza kuwaondoa mashindano ikiwa ni mara ya kwanza baada ya miaka mingi kwa vijana hao wa Emirates.

Kocha amuonya Balotelli, amwambie akiharibu inakula kwake

MARIO Balotelli yuko katika "nafasi yake ya mwisho" baada ya kujiunga na Liverpool kwa ada ya uhamisho ya paundi milioni 16, alisema kocha Brendan Rodgers.
Mshambuliaji huyo wa Italia mwenye umri wa miaka 24 aliishuhudia kutokea jukwaani Liverpool ililala 3-1 ugenini dhidi ya klabu yake ta zamani ya Manchester City juzi baada ya kujiunga akitokea AC Milan kwa mkataba wa miaka mitatu.
Balotelli alikuwa maarufu kwa matukio ya utata wakati akichezea Man City lakini Rodgers anakubali kuwa kumsajili nyota ni "kama kucheza kamari" lakini anasema anaweza kujirekebisha.
"Tunaweza kumfanya awe bora kama mchezaji na ajutambue kama mtu mzima," alisema.
"Ni kijana mzuri. Alikuwa mwerevu sana. Anatambua mahala alipo ni wapi, katika wakati wake huu, na anatambua kwamba pengine hii ni fursa yake ya mwisho.
"Muda utaongea. Hakika ni kama kamari. Sitasema kwamba hafiti, ila anatambua anapaswa kufiti katika utamaduni wetu."

Mbunge Viti Maalum ataka viti maalum vifutwe Katiba Mpya

Ritta Kabati alipokuwa kitoa mtazamo wake kuhusu viti maalumu vya ubunge

MBUNGE wa Viti Maalumu Mkoa wa Iringa, Ritta Kabati (CCM) amesema moja ya mambo anayounga mkono katika mchakato wa Katiba Mpya ni kufutwa kwa viti maalumu vya ubunge.

Akizungumza hivi karibuni nje ya jengo la CCM Mkoa wa Iringa, Kabati alisema Viti Maalumu vina faida zake katika mchakato wa maendeleo lakini vinawadhalilisha sana wanawake.

“Siku hizi wabunge wanawake wa viti maalumu tunaitwa wabunge wa vitanda maalumu, huu ni udhalilishaji kwa sababu wengi wanahisi upatikanaji wake una mahusiano yasiofaa,” alisema.

Alisema utaratibu unaotumiwa na nchi kama Uganda na Rwanda kupata wawakilishi wanawake katika mabunge yao ndio unaopaswa kutumiwa na Tanzania na kama ikishindikana basi wanawake nao wapewe nafasi sawa na wanaume ya kugombea moja kwa moja kwenye majimbo ya Uchaguzi.

“Tumetembelea Uganda na Rwanda, kule hawaiti viti maalumu vya wanawake, wanaita viti vya wilaya vinavyoshindanisha wanawake wa vyama mbalimbali katika wilaya hizo,” alisema.

Katika kuelekea Uchaguzi Mkuu wa mwakani, Kabati alisema endapo viti maalumu vitafutwa ataamua wapi atupe karata yake kati ya jimbo la Iringa Mjini au Kilolo.

“Kilolo ni kwetu na Iringa Mjini ni kwetu, kwahiyo kama Katiba Mpya itaondoa viti maalumu basi nitaamua wapi niende kati ya majimbo hayo,” alisema.